Read bassa ỤBANỤ 35 Bible Online

ỤBANỤ 35 - bassa bible

ỤBANỤ 35

¹Go Moses sotulonu tu'ulwatagwụ te E'isrɛl kpaaŋ, bɛɛ hiɛŋ, Iyi nɛ AGWANGWAMA ihi peni-unu maa hiɛ njɛ na.

²Ijitɛ icihiŋ ahiɛ shɛ hia nda ugondu, ama ụjita ucenje ụ shɛ ụjita hiŋ tijilo, ụ shɛ Ụjita-ụhinjanụ wa AGWANGWAMA, bụtụ be elele na njɛ ugondu nụ ụjita ata, ɛ zhɛ a kwụna bụ.

³Ta shana ma ulwa nụ Ụjita-ụhinjanụ tutu ofwo elele na tugwungwu ti hiŋ ti teje o.

⁴Go Moses mbishi tu'ulwa te E'isrɛl kpaaŋ, bɛɛ hiɛŋ, Iyi nɛ AGWANGWAMA ihi peni-unu ibɛ nɛ, bi hiɛŋ,

⁵Lashɛgana ma AGWANGWAMA upwaŋ na ashashɛ hiŋ; bụtụ be elele na ya kwụlanɛ, ga 'waŋnanɛ AGWANGWAMA upwaŋ ata na amɛ ubwa oko, ibɛ shɛ azhɛnarɛya, na azụrụfa, nɛ ɛtumburɛ;

⁶nu uduhwa wa ababa, nu uduhwa ushenje, ni inɛ ishenje howuu, ni ihwehwe ilinɛn nɛ a hiɛŋshɛ tanɛ tanɛ, ne tihiŋzhe ti iyweywe,

⁷ni i'wɛbɛ ya adagba nɛ aa kwụnɛ iyi ishenje, ni i'wɛbɛ iyweywe, ni i'wɛ'wɛ ekeshia,

⁸na manɛbɛ iwɛ ụsụtụla, ni iyi ụhiụŋ ụlatụ nɛ oo zwono manɛbɛ mu tududugono bụtụ, ni iturɛre ụlatụ nɛ oo hwoŋzhingo,

⁹na atayɛ onɛkis, na atayɛ na ee shebi, iwɛ efod keeni iwɛ iyi tu'ubono na agba.

¹⁰Butubwenyi be elele na shɛ bugwoni bi iyi na ashashɛ hiŋ, ga zhajɛ, iwɛ maa nda iyi nɛ AGWANGWAMA peni-unu ibɛ,

¹¹tu udulo ata u tugwuno, ti iyi tu'ubono tu bwa na azuba, to tusotulongonu tu bwa, ta shɛkpada shɛ bwa, ti imbele ibwɛ, ti i'wɛ'wɛ ya atukpa ubwa, na akatakpa ubwa;

¹²ti ikpɛtɛ ɛtɛ, medenji imbele ibɛ, no tu'urugono ti ibɛ, keeni tugwuno tu tuswata no odubo;

¹³tu uteburu, ti imbele ubwa, ti i'wɛŋni'wɛŋni ibwɛ kpaaŋ, keeni ibrɛd ɛtɛ ee peni Agwatana;

¹⁴tu uteburu ụsụtụla iwɛ uhioko-uhwaŋna ubwa du, medenji i'wɛŋni'wɛŋni ibwɛ, keeni asụtụla ubwa, medenji manɛbɛ iwɛ uhioko-uhwaŋna ata ubwa;

¹⁵tu utukwu-ụrụpɛ iturɛre tuhwoŋzhingo, medenji imbele ibwɛ, ta manɛbɛ mu tududugono, ti iturɛre ụlatụ, to tugwuno tu tuswata no odubo udulo ata;

¹⁶tu utukwu-ụrụpɛ tuhwoŋzhingo, ta agbahwụ ɛtumburɛ ubwa maa ulwa na patana, medenji imbele ibwɛ, ti i'wɛŋni'wɛŋni ibwɛ kpaaŋ, tu ugbamgbam ụ'wụtụ iwɛ tumama nyashɛnga, medenji ụkwụka ubwa maa u patana;

¹⁷to tugwuno ta tukapa ukpogwu, medenji i'wɛ'wɛ ye ezweni ibwɛ, ta atukpa ubwa, to tugwuno tu tuswata no odubo ukpogwu ata;

¹⁸tu n-ngbalụ mu udulo ata, tu n-ngbalụ mu ukpogwu ata, medenji ihwehwe ibwɛ;

¹⁹to otogwo ata aa nɛ tanɛ tanɛ maa onongbo no hwuŋtongono ta a nda ugondu no ohwolu tijilo, to otogwo tijilo iwɛ Aron, na shɛ bunongbo, keeni otogwo miaụŋ mu bwa me eyi, a na ɛɛ zhɛ no hwuŋtongono maa a njɛ ugondu tunongbo.

²⁰Nazhɛ tu'ulwatagwụ ta atwa Isrɛl kpaaŋ ti beni ee genji Moses.

²¹Bụtụ be elele na kaa yaa kwụlanɛ na amɛ ubwa, keeni bụtụ be elele na mpiala mi ishicinjɛ, be suje upwaŋ ata wa AGWANGWAMA, ba zhajɛ iwɛ ugondu udulo ata tu'ulwa, ti i'wɛŋnɛ ugondu nɛ namɛ apata hwɛɛ, ti iwɛ otogwo ata tijilo onongbo.

²²Gabata aa zhagajɛ, te etwenyi, te eyikwo; bụtụ be elele na yaa kwụlanɛ na amɛ ubwa, be suje shɛtakwụ shi n-nyanụ, na shɛtakwụ sha cɛbɛ, na tɛkanɛ, no shi'umwo, kpaaŋ ibɛ i shɛ iyi tisemberi ya azhɛnarɛya. Bụtụ be elele na 'waŋnɛ upwaŋ ubwa, bo tulonono uŋ AGWANGWAMA.

²³Bụtụ be elele na 'yajɛ ihwehwe uduhwa wa ababa, ti inɛ uduhwa ushenje, kwo kaa inɛ ishenje howuu, keeni ihwehwe ilinɛn nɛ aa hiɛŋshɛ tanɛ tanɛ, kwo kaa tihiŋzhe ti iyweywe, ti i'wɛbɛ ya adagba nɛ aa kwụnɛ iyi ishenje, kwo kaa i'wɛbɛ iyweywe, be suje iŋ.

²⁴Bụtụ be elele na eri ba pana upwaŋ wa azụrụfa, kwo kaa ɛtumburɛ, be suje ijɛ ɛtɛ baa shɛkana AGWANGWAMA. Bụtụ be elele na kaa 'yajɛ ụ'wụ'wụ we ekeshia na shɛ aa nda uhwara we elele nu ugondu ata, be suje iŋ.

²⁵Eyikwo elele na 'yebi ihiɛŋshɛ ihwehwe tizhe ni i'ɛlɛ ya aba, e suje ihwehwe nɛ aa hiɛŋshɛ, ibɛ shɛ inɛ uduhwa wa ababa, ti inɛ uduhwa ushenje, ti inɛ ishenje howuu, keeni ihwehwe ilinɛn nɛ aa hiɛŋshɛ tanɛ tanɛ.

²⁶Eyikwo elele na shɛ egwoni a na ya a kwụlanɛ na shɛmɛ sha aba ɛ hiŋshɛ tihiŋzhe ti iyweywe.

²⁷Nazhɛ ehiu suje atayɛ onikis, keeni atayɛ na ɛɛ zhɛ a ta ni efod keeni iwɛ iyi tu'ubono na agba,

²⁸ti iyi ụhiụŋ ụlatụ, ta manɛbɛ ma asụtụla, ta manɛbɛ mu tududugono bụtụ, ti iturɛre ụhiụŋ ụlatụ.

²⁹Atwa Isrɛl kpaaŋ, te etwenyi, te eyikwo a na yaa kwụlanɛ na shɛmɛ sha aba maa e peni upwaŋ iwɛ ugondu we elele na AGWANGWAMA peni aŋ unu tedure no Moses, e peni AGWANGWAMA apwaŋ aba u tukwulana.

³⁰Nazhɛ go Moses mbishi E'isrɛl ata, bɛɛ hiɛŋ, Kwụba ma, AGWANGWAMA kaa suyanɛ Bɛzalɛl, yɛu Uri, na shɛ bụjalụ Hu nụ ụlamụ Juda.

³¹Bee shidinji bu kaa nu Mpiala ma Agwatana, ta ahaŋsa, ti iyi ti'eshicigo, ti iyi-tumapa, ti iyi ti'yebo, tu ugondu i'ɛlɛ tugwoni we elele kpaaŋ tɛnda,

³²maa bu na manganga ugondu tugwoni, maa bu na nda ugondu na azhɛnarɛya, ta azụrụfa keeni ɛtumburɛ,

³³maa 'yebo ta atayɛ tɛshaba, ta ashɛmbɛrɛ tuswananga ni iyi, ti ishebi i'wɛ'wɛ, keeni ugondu tugwoni we elele swoswoswo kpaaŋ tɛnda.

³⁴AGWANGWAMA shiyeneni bu na amɛ maa mbisogono anya atwa ugondu ata, abana Oholiab, yɛu Ahisamak, na shɛ ụlamụ Dan.

³⁵Bi shidinji aŋ na shihaŋsa iwɛ maa e 'yebi ugondu i'ɛlɛ swoswoswo kpaaŋ, tu ugondu ụlụma tɛnda, tu ugondu tugwoni, ti irikwi tuzwono ni ihwehwe uduhwa wa ababa, ti inɛ uduhwa ushenje, ti inɛ ishenje howuu, ti inɛ ilinɛn nɛ aa hiɛŋshɛ tanɛ tanɛ, to tugwuno tuna. A shɛ atwa na 'yebi ugondu tugwoni we elele kpaaŋ, e 'yebi iyi i'nyɛtɛ tɛta.