Read bassa ỤBANỤ 37 Bible Online

ỤBANỤ 37 - bassa bible

ỤBANỤ 37

¹Gɛ Bɛzalɛl njɛ ikpɛtɛ ɛtɛ nụ ụ'wụ'wụ we ekeshia. Ụnjɛswa ibɛ shɛ imbele i'ɛlɛ iyebi na ashashɛ, uholo ibɛ shɛ ombolo u'ala oko na ashashɛ, uzoto ibɛ shɛ ombolo u'ala oko na ashashɛ.

²Bee sweni iŋ azhɛnarɛya tụrụmbɛɛ, ta amɛ ta aba ibɛ, baa njɛ azhɛnarɛya derere bee peteni ni izhɛmi ibɛ tutu rungwutwonu.

³Nazhɛ baa ndanɛ iŋ tɛkanɛ ti neshi iwɛ akatakpa ibɛ eneshi, tɛkanɛ ti yebi tu namɛ zalụ bu ko, tɛkanɛ ti yebi ti nya tu namɛ zalụ bi yebi.

⁴Bee shebeni iŋ imbele nụ ụ'wụ'wụ we ekeshia, bee sweni iŋ azhɛnarɛya.

⁵Bee hwuŋtengeni imbele ɛtɛ na tɛkanɛ ti i'ɛŋbi ikpɛtɛ ɛtɛ, maa a na 'waŋna iŋ ni ibɛ.

⁶Baa ndanɛ iŋ tu'urugono na azhɛnarɛya tụrụmbɛɛ; ụnjɛswa tuba ụ shɛ imbele i'ɛlɛ iyebi na ashashɛ, uholo tuba ụ shɛ ombolo u'ala oko na ashashɛ.

⁷Bee jibi azhɛnarɛya baa njɛ iyi-uumwa ya apiambɛ iyebi, nɛ 'yajɛ ụpɛshɛka bụtụ, baa gɛgacanjɛ iŋ nu ukwunanga tu'urugono ta ata zalụ hweehwe,

⁸ijɛ ɛtɛ uumwa ike namɛ nu ukwunanga uko, inɛ iyebi namɛ nu ukwunanga uyebi, bee cimbengeni iyi-uumwa ɛtɛ maa i shɛ iyi ike no tu'urugono ta ata zalụ hweehwe.

⁹Iyi-uumwa ɛtɛ kaa berishiji apiambɛ aba na azuba, apiambɛ ata aba ubi tu'urugono ta ata na azuba, o momo pononu shishe, aa ngbaracɛ tu'urugono ta ata.

¹⁰Baa ndaananɛ uteburu nụ ụ'wụ'wụ we ekeshia. Ụnjɛswa ubwa ụ shɛ imbele i'ɛlɛ iyebi, uholo ubwa ụ shɛ ombolo u'ala oko, uzoto ubwa ụ shɛ ombolo u'ala oko na ashashɛ.

¹¹Bee sweni uŋ azhɛnarɛya tụrụmbɛɛ, bee jibi azhɛnarɛya derere, bee peteni ni izhɛmi ubwa tutu rungwutwonu.

¹²Baa njɛ akpada tɛjɛlanɛ ti izhɛmi ubwa na azhɛnarɛya tutu rungwutwonu, uholo wa aba ụ shɛ ụbabasụ u'ala uko, bee jibi azhɛnarɛya anya derere, bee peteni ni izhɛmi wa aba tutu rungwutwonu.

¹³Baa ndanɛ uŋ tɛkanɛ ta azhɛnarɛya ti neshi, bee hwuŋtengeni tɛkanɛ ta ata ne esugwulumi ubwa eneshi no ofwo akatakpa ubwa eneshi.

¹⁴Tɛkanɛ ta ata ti cimbengeni to gwumwonu na azhɛnarɛya ata ee peteni ni izhɛmi tutu rungwutwonu, na tɛkanɛ ta ata ɛɛ zhɛ o hwuŋtongono imbele ɛtɛ ɛɛ zhɛ na 'waŋna uteburu ata.

¹⁵Bee shebi imbele nụ ụ'wụ'wụ we ekeshia, inɛɛ nɛ ɛɛ zhɛ na 'waŋna uteburu ata, bee sweni iŋ azhɛnarɛya.

¹⁶Bee shepi azhɛnarɛya tụrụmbɛɛ baa njɛ iyi-uhwugwa, inɛɛ nɛ ɛɛ zhɛ na patangana ni ihiŋhiŋ uteburu ata, ibɛ shɛ apalụ, na agbamgbam iwɛ iturɛre, no nkwodo mu bwa keeni nkwasha mu bwa mu na ɛɛ zhɛ na sala meni maa o no zwono ni iyi ụrụpɛ tuswa.

¹⁷Baa ndaananɛ uteburu ụsụtụla na azhɛnarɛya tụrụmbɛɛ. Tudubo bee jibi akatakpa ubwa; tụ ụ'wụ'wụ uteburu ata; to tusumbo tu bwa tu na tɛ shɛ gana okwukwusu ubwa, tɛ shɛ iyi ike nu bwa.

¹⁸Shɛ'walụ shɛ na shɛ banɛ ni i'ɛŋbi uteburu ata shɛ namɛ shi cihiŋ. Shɛ'walụ shi uteburu ata ụsụtụla, shɛ tatụ shɛ banɛ na bụ'aŋbụ bu bwa bụ ụzalụ uko, shɛ'walụ shi uteburu ata ụsụtụla shɛ tatụ shɛ banɛ na bụ'aŋbụ bụ ụzalụ uyebi ubwa.

¹⁹Ekwepi ubwa atatụ, a na aa njɛ gana shilmond, una una nu ukwukwusu ubwa, tusumbo tu bwa ti cimbeni na a'walụ ubwa oko. Ekwepi ubwa atatụ a na aa njɛ gana shilmond, una una namɛ nu ukwukwusu ubwa, tusumbo tu bwa ti cimbeni na shɛ'walụ shɛ ubwa shi yebi. Gabata baa njɛ iwɛ shɛ'walụ sha ata shi cihiŋ shɛ na shɛ banɛ ni i'ɛŋbi uteburu ata ụsụtụla.

²⁰Uteburu ata ụsụtụla 'yajɛ ekwepi ubwa eneshi, a na aa njɛ gana shilmond, medenji okwukwusu aba, keeni tusumbo ta aba.

²¹Ukwukwusu uko namɛ tuta ta a'walụ a'walụ, na shɛ'walụ sha ata shi cihiŋ shɛ na shi cimbengeni nu uteburu ata ụsụtụla.

²²To okwukwusu aba, ta shɛ'walụ sha aba, a njɛ iŋ maa i shɛ iyi ike nu uteburu ata, kpaaŋ ibɛ i shɛ tudubo ee jibi azhɛnarɛya tụrụmbɛɛ nazhɛ aa njɛ uŋ.

²³Na azhɛnarɛya tụrụmbɛɛ baa ndaananɛ asụtụla ecenje, keeni shɛsuka keeni apalụ na maa o no zwono shɛsuka sha ata.

²⁴Ne bimenji ba azhɛnarɛya tụrụmbɛɛ, na shini ụzhɛka ụ'wụtụ baa njɛ uteburu ata, ti i'wɛŋni'wɛŋni ibwɛ kpaaŋ.

²⁵Baa njɛ utukwu iturɛre nụ ụ'wụ'wụ we ekeshia. Ụnjɛswa ubwa ụ shɛ ombolo u'ala oko, uholo ubwa ụ shɛ ombolo u'ala oko, ogongo ubwa hwɛɛ aba eneshi nangwụ, uzoto ubwa ụ shɛ imbele i'ɛlɛ iyebi; mahiuaŋ mu bwa mɛ shɛ iyi ike nu bwa.

²⁶Bee sweni uŋ azhɛnarɛya tụrụmbɛɛ, ta azuba ubwa, ti i'ɛŋbi ibwɛ tutu rungwutwonu, ta mahiuaŋ mu bwa, bee jibi azhɛnarɛya derere bee peteni ni izhɛmi ibwɛ tutu rungwutwonu,

²⁷Baa njɛ tɛkanɛ ta azhɛnarɛya ti yebi derere, bee peteni ni izhɛmi ibwɛ, zalụ hweehwe bi i'ɛŋbi ibwɛ iyebi, maa tɛ shɛ ofwo na oo hwuŋtongono imbele ibwɛ maa a na 'waŋna uŋ.

²⁸Bee shebi imbele ɛtɛ nụ ụ'wụ'wụ we ekeshia, bee sweni iŋ azhɛnarɛya.

²⁹Nazhɛ baa ndaananɛ manɛbɛ mi tijilo mu tududugono, keeni iturɛre tụrụmbɛɛ, inɛɛ nɛ oo hiŋtotongo ni iyi tuswoswoswo nɛ 'yajɛ ụhiụŋ ụlatụ, bɛ njɛ iŋ gana na ta bụtụ na shɛ bugwoni bi iturɛre ba nda.