Read bassa ỤBANỤ 40 Bible Online

ỤBANỤ 40 - bassa bible

ỤBANỤ 40

¹Nazhɛ AGWANGWAMA hiɛŋ Moses,

²Shikicingo udulo ata ụ tu'ulwatagwụ nụ ụjita uhiiŋ nu upiana uhiiŋ.

³Shiyono Ikpɛtɛ ɛtɛ Unu-tutwa na amɛ ubwa, maa kaa jɛlanɛ ikpɛtɛ ɛtɛ no tugwuno to odubo.

⁴Bɛ shɛ bo tocingo uteburu na amɛ ubwa, maa shemeni i'wɛŋni'wɛŋni ibwɛ nu umama 'wanụ ni ihiŋhiŋ ubwa. Tocingo du uteburu ụsụtụla na amɛ ubwa, maa petengeni asụtụla ni ihiŋhiŋ ubwa.

⁵Shikicingo utukwu ata wa azhɛnarɛya iturɛre tuhwoŋzhingo nu umbe Ikpɛtɛ ɛtɛ Unu-tutwa, maa sweci tugwuno tu tukapa no odubo ohwolu ata tijilo.

⁶Shikicingo utukwu-ụrụpɛ tuhwoŋzhingo nu umbe odubo udulo ata ụ tu'ulwatagwụ.

⁷Sho ugbamgbam ata tumama nyashɛnga na ashashɛ udulo ata ụ tu'ulwatagwụ nu utukwu-ụrụpɛ, ma zweni meni na amɛ ubwa.

⁸Ndana uŋ ukpogwu tutu rungwutwonu maa sweci ibɛgɛlɛ tugwuno no odubo ukpogwu ata.

⁹Shapa manɛbɛ mu tududugono maa dudugeni udulo ata, medenji iyi elele nɛ zweni na amɛ ubwa, maa njɛ uŋ tijilo, ti i'wɛŋni'wɛŋni ibwɛ kpaaŋ iwɛ maa ụ shɛ tijilo.

¹⁰Dudugono du utukwu ata ụrụpɛ u tuhwoŋzhingo manɛbɛ, ti i'wɛŋni'wɛŋni ibwɛ kpaaŋ, maa njɛ utukwu ata ụrụpɛ tijilo, nazhɛ utukwu ata ụrụpɛ zhɛ wa sha tijilo me tijilo.

¹¹Dudugono ugbamgbam ata tumama nyashɛnga manɛbɛ, tu ụkwụka ubwa, ma njɛ uŋ tijilo.

¹²Nazhɛ shapa Aron keeni miaụŋ mu bwa me eyi no odubo udulo ata ụ tu'ulwatagwụ, maa dụrɛ aŋ meni,

¹³Hwuŋtono Aron n-nduka ma ata mi tijilo mu tuwururu, maa dudugeni bu manɛbɛ, maa shiri bu swooŋ, iwɛ maa ma n ndana ugondu u tunongbo.

¹⁴Suje miaụŋ mu bwa me eyi maa hwuŋtengeni aŋ n-nduka ma ata mu gwụmwatangwụ,

¹⁵maa dudugeni aŋ manɛbɛ, gana na ebu dudugeni bishi ba aba, iwɛ maa a n ndanɛ tunongbo. Manɛbɛ ma ata ee dudugeni aŋ mɛ shɛ iwɛ maa a shɛ onongbo na alamụ aba tutu.

¹⁶Go Moses njɛ iyi elele te teni cɛŋ gana na AGWANGWAMA peni bu unu.

¹⁷E shikicinji udulo ata nụ ụjita uhiiŋ nu upiana uhiiŋ nu uywa uyebi [ta a banɛ ni Ijipti].

¹⁸Go Moses shikicinji udulo ata, baa shɛrɛ akatakpa ubwa, bee shikecenji shɛkpada shɛ bwa, bee shikecenji atukpa ubwa, bee hwuŋtengeni imbele ibwɛ.

¹⁹Nazhɛ bee berishiji tugwuno bee urigeni ohwolu ata tijilo keeni tu'urugono tu udulo ata na azuba, te teni cɛŋ gana na ta AGWANGWAMA peni bu unu.

²⁰Bee zweni atayɛ ata tiseyida na amɛ Ikpɛtɛ ɛtɛ, bee hwuŋtengeni imbele na tɛkanɛ ti ikpɛtɛ ɛtɛ. Bee peteni ajɛjɛ ata inyɛmɛnyɛmɛ na azuba ibɛ.

²¹Bee tecinji ikpɛtɛ ɛtɛ nu udulo ata, bee berishiji tugwuno, baa jɛlanɛ Ikpɛtɛ ɛtɛ Unu-tutwa gana na ta AGWANGWAMA peni bu unu.

²²Nazhɛ bee tecinji uteburu nu udulo ata ụ tu'ulwatagwụ; tuzuba tu udulo ata no tupohondo to tugwuno ta ata ti kepi odubo amɛ.

²³Bee shemeni ibrɛd ɛtɛ ee peni AGWANGWAMA nu umama 'wanụ ni ihiŋhiŋ ubwa nu umbe AGWANGWAMA, te teni cɛŋ gana na ta AGWANGWAMA peni bu unu.

²⁴Bee tecinji du uteburu ụsụtụla nu udulo ata ụ tu'ulwatagwụ tuta tu udulo ata, waa mama ngbarakanụ nu uteburu ata.

²⁵Bee zweni asụtụla ata ulwa nu umbe AGWANGWAMA, gana na ta AGWANGWAMA peni bu unu.

²⁶Bee tecinji utukwu-ụrụpɛ ata wa azhɛnarɛya nu udulo ata ụ tu'ulwatagwụ nu umbe tugwuno ta ata tɛ jɛlanɛ uŋ.

²⁷Bee hwoŋzhinji iturɛre ụhiụŋ ụlatụ ni ihiŋhiŋ ubwa; gana na ta AGWANGWAMA peni bu unu.

²⁸Bee sweci tugwuno to odubo udulo ata ụ tu'ulwatagwụ no ogwungwu tuba.

²⁹Nazhɛ bee shikicinji utukwu-ụrụpɛ tuhwoŋzhingo no odubo udulo ata tu'ulwatagwụ, bee peni ụrụpɛ tuhwoŋzhingo, nu una tuswa ni ihiŋhiŋ ubwa; gana na ta AGWANGWAMA peni bu unu.

³⁰Bee shi ugbamgbam ata ụ'wụtụ idurɛ na ashashɛ udulo ata ụ tu'ulwatagwụ nu utukwu-ụrụpɛ, bee zweni meni nu bwa.

³¹Na muba go Moses na Aron keeni miaụŋ ma Aron me eyi a nyashɛnga shivwɛvwɛjɛ sha aba;

³²ta aka elele na ee teni nu udulo ata ụ tu'ulwatagwụ keeni aka na to o gwumwonu nu utukwu ata ụrụpɛ a mama nyashanga gana na ta AGWANGWAMA peni bu unu.

³³Baa njɛ ukpogwu boo rungwutwonu udulo ata ụ tu'ulwatagwụ, bee sweci tugwuno to odubo ukpogwu ata. Gana go Moses njɛ baa kwunanjɛ ugondu ata kpaaŋ ta.

³⁴Nazhɛ udomu ubeni udulo ata ụ tu'ulwatagwụ, nazhɛ ụjɛrụma wa AGWANGWAMA shini amɛ ohwolu ata tijilo.

³⁵Go Moses eri shi bo tono ya na amɛ udulo ata ụ tu'ulwatagwụ o, iwɛnɛ tu udomu patanɛ nu bwa, ụjɛrụma wa AGWANGWAMA kaa shini amɛ ohwolu ata tijilo.

³⁶Aka elele na tu udomu ata pashɛngwa nu udulo ata, nazhɛ E'isrɛl a shɛdɛnga tahaŋnụ ta aba.

³⁷Ama yaa shɛ udomu ta pashɛngwa sụ nu udulo ata, asha a ta zha shɛ a shɛdɛnga tahaŋnụ ta aba o, semi nụ ụjita na udomu ata pashɛngwa nu bwa, gana yaa shɛ na tahaŋnụ ta aba tutu ta.

³⁸Udomu wa AGWANGWAMA wo ubono nu udulo ata na aka bu uwaŋna, ulwa wa nama na amɛ udomu ata na aka bụ ụjita. Gabata eshe miaụŋ mi ihwɛ Isrɛl kpaaŋ a kwụba iŋ tutu ukwunanga tahaŋnụ ta aba.