Read bassa JOB 10 Bible Online

JOB 10 - bassa bible

JOB 10

¹N lukwumi ya uraiŋ ụwɛ tiya. Iwɛbɛ po Ngɛɛ bwɛ nụ ụgagwụ, iwɛ maa Ma duma iyi nɛ i n gwumanɛ na amɛ mi.

²Agwatana, ta ma m pana n-ndumwa-tụwụma o. Imbe kwuŋ shɛ iyi iwɛ nɛ Ngaa njɛɛ? M mbishi.

³I teni suu cɛŋ maa na nda bụtụ umungwuta i ci gana ga? Maa na ngbaraka iyi nɛ abɛ njɛ ni ikɛnyi bu cwɛŋ gana ga? Maa na hingangana tuhaŋsa to ogworozwo ilɛtu.

⁴Gana na ata kwụba iyi, ibɛ suu aba kwụba du?

⁵Shiywa shɛ uraiŋ bụ tiya suu shɛ namɛ kpendere gana mo shi tu?

⁶Asha iwembe kwuŋ po abu ndanjɛ iwɛwɛ ye elele nɛ Ngaa njɛ useyida kpaaaŋ? Abu n shɛka ni iyi elele nɛ Ngaa njɛ i 'wanjɛɛ?

⁷Bi mepi maa n-ndumwa mu n wụmɛ shɛ o, ebi mepi du kaa maa N zasa bụtụ na eri ma n lashaga ni i'ɛlɛ bu o.

⁸Gabụ bu m mo ni i'ɛlɛ bu, ni i'ɛlɛ ɛtɛ bu sasana kaa abu ma n nda ufwu.

⁹Teyinje maa na cɛnjɛ-ti'wɛŋnɛ[12] obu m mo, bi zhɛ suu bu ma bwarataga maa ma shaanana ya upwupwutu?

¹⁰Bi peni bishi mi ukpahiŋ maa ma mata; abɛ njɛ kaa maa ma waŋna ni igwune tumata bino mi.

¹¹Gabụ bu mo tu'waba ti mi no o'umpwo mi keeni tini ti mi, nazhɛ ebu urigeni o'umpwo ata usunda keeni u'waba.

¹²Gabụ bu m peni uraiŋ, obu mo n lubo aka elele, iwɛ eshe na obu mo n shiyono, ibɛ po Ngaa ta ya uraiŋ.

¹³Ama hwuwayɛ Ngee mepi ya maa taa na aka ata aba imanganga ne tusweci maa n gwụcɛnjɛ.

¹⁴Gabụ bu ma ngbaraka maa kwụbɛ okwo N zhɛ ma nda iwɛwɛ nɛ abu zha shɛ bu ma n gangana.

¹⁵Gunu na tu Ngaa njɛ iwɛwɛ, ibɛ shɛ ya uwuru mu na bụ, ama aka na Ama nda la iyi nɛ teni cɛŋ, N zasa udumanga we elele o. N namɛ ne tiriri, ezuye kaa n shɛ.

¹⁶Okwo iyi elele ga ma 'yaganɛ eshe, gabụ kaa bu n 'imɛ gana bizeci; iwɛ maa n gwụcɛnjɛ, abu ndanjɛ du arụhwajɛ.

¹⁷Aka elele bi 'yajɛ eseyida na ma n sukakana; isɛbwɛ bu ne mi ya kaana gu ugombo; aka elele ba imanganga iyi ifwo maa n sukakanɛ.

¹⁸Agwatana, iwembe kwuŋ po ebi leni maa e m mecii? N nga lanɛ maa i shɛ n uwo yebe maa kede bụtụ be elele n kwụbɛ o.

¹⁹Maa Ngaa nga banɛ yebe ni igwune tumata, mo hwulo wuru nu u'uye, i gɛ zhɛ ya sha yebe iyi ike ike tu Ngaa nga zasaba.

²⁰I vwɛ shɛ suu cwɛŋ maa i shɛ uraiŋ mu hwuwowu?[13] N genji saiiŋ! N genji maa ma ya uraiŋ nu unyasa, na aka na n vwanɛ.

²¹I vwɛ cwɛŋ maa mo hwulo ya, N zha shɛ kwukwuŋ mo gwure ya, N zhɛ na cɛnjɛ tu na tɛ shɛ tishi zhuuŋ.

²²Cɛnjɛ te tishi, no ohwunu, no ofwo na iyi elele sukwutogwu, ofwo na uhioko-uhwaŋna zasa ba kwukwuŋ.