Read bassa JOB 11 Bible Online

JOB 11 - bassa bible

JOB 11

¹Go Zofa na shɛ Bineamat ata jishijɛ bụ, bɛɛ hiɛŋ,

²Asha kede ree tɛ jishijɛ ya bwonu n-ndumwa mu ga mu ufwugwo abu dumanjɛ? N-ndumwa mu ufwugwo tụdụmanga gana ga suu mi eri ma bu pana n-ndumwa-zhɛ?

³O-Job, bi heŋshi ree maa ti eri shi tɛ bi jishijɛ? N-ndumwa mu ga ma asada hŋ mi zhɛ ma tu nda maa kede ta dumana ya iwɛ nɛ zhɛ ma bu nda ezuye?

⁴Bi hiɛŋ n-ndumwa mu na abɛ jɛmɛ mɛ shɛ iwɛ-tɛkana; ɛbi hiɛŋ maa bu namɛ rụmbɛɛ ne eshe Agwatana.

⁵I ga ma n kwulana kiri yebe maa Agwatana ibi jishijɛ!

⁶Ubwa gɛ zhɛ mo bu mbiso maa ti'inta ti gembi ihwɛŋnɛ ifwugwo; i 'yajɛ iyi nɛ swakacɛ ba, inɛɛ nɛ butugumwa eri shi bo eshicigo. Ulwapɛ na Agwatana ma bu pana bana u ta kpayawụ sụ ni iyi nɛ abɛ njɛ o.

⁷Bi eri suu ba ta uce keeni ogwungwu ugombo wa Agwatana keeni ukpahiŋ ubwa ugbe?

⁸Tụla tu kpayawụ sụ nu uce wa Agwatana na Hwuri Kpaaŋ o, i keshici tumapa tụ bụ. Agwatana ubwa mepi tu nhwaŋ-me-e'uye[14] hwɛɛ, ama ɛɛ hiɛŋ gabụ bi mepi shi o.

⁹Ugombo wa Agwatana uhwuri uholo cɛnjɛ tu unyizo; u heri wee hwuri okwo itekwu.

¹⁰Yaa shɛ Agwatana ɛbɛ 'imɛ maa a jɛmɛ ụshɛrɛya bụ, gaaba namba eri ba lakana bụụ?

¹¹Agwatana mepi atwa na zasa uhwara; baa kwụbɛ ugondu wa aba u ci'nyɛ na aa nda kpaaŋ.

¹²Shɛlagwụ shi zhɛ sho kwuno ya ti'inta gana izhinyɛci nɛ ee meci ni ihwɛ.

¹³O-Job, nangana amɛ bụ. Zhaga to Agwatana.

¹⁴Bacɛnga iwɛwɛ ɛtɛ namɛ ni i'ɛlɛ bu keeni iyi iwɛ ɛtɛ namɛ ni ihwɛ bu.

¹⁵Nazhɛ ɛbi zhɛ ba ala maa hirinje, maa shikono dimi uzawa inyɛsɛ.

¹⁶Nazhɛ ụbaụta bụ zhɛ wa bana na ahaŋsa bụ, gana meni mu na mu zhagajɛ mi keshici ee teyinji shi ya.

¹⁷Nazhɛ uraiŋ bụ zhɛ no hioko uhwaŋna uhwuri uwaŋna tishikoko, nazhɛ tishi tu na tu ga namɛ nu uraiŋ bụ ti zhɛ ta sha ya uhioko-uhwaŋna gana uvwungwa.

¹⁸Nazhɛ ɛbi zhɛ ba nama ya suu maa 'yaga ashɛlatụ; nazhɛ Agwatana zhɛ ma bu jilanɛ, maa ma bu pana du ụhinjanụ.

¹⁹Bi zha shɛ ba nda ya inyɛsɛ ya atwa i'ime bu o. Atwa ofwugwo zhɛ na bu lụpa maa mbiyeni aŋ.

²⁰Ama ezuye zhɛ a sha ogworozwo; bi zhɛ ba kwụba maa a zha shɛ o gwushigo ofwo u tubanangana o. Ashɛlatụ aba a shɛ oko gba, ibɛ shɛ tu'wo tu na te teni aŋ.