Read bassa JOB 13 Bible Online

JOB 13 - bassa bible

JOB 13

¹Eshe mi kwụbwa ijɛ kpaaŋ, acɛbɛ mi kaa hwugwa ijɛ, Ngee eshiciji iŋ du kaa.

²Iyi elele nɛ ehi mepi, M mepi iŋ du; i zasa iyi elele ehi n hwuri ni ibɛ o.

³Ama Bụtụ ata na Hwuri Kpaaŋ, Ama njɛ nu bwa, shɛ ahiɛba o; ubwa Ama jala maa ma duma ụshɛrɛya nu bwa.

⁴Hi momo urogono nụ ụzagwụ-tudwa, hiɛ shɛ gana buwa-bi-inibi na eri shi ba nɛnga kaa ugwumashɛ we elele.

⁵Yaa shɛ abu namɛ shiruu, bụtụ eri ba haŋsa maa ubwa incɛ!

⁶Shɛlaga ma, maa Me sweji n-ndumwa mi mi.

⁷Iwembe po ahia dwatwaga-ụzagwụụ? Hi heŋshi suu ma ụzagwụ hiŋ zhɛ wa pana Agwatana titeni te elele?

⁸Ubwa suu ɛhi zhɛ hia lashaga? Hi zhɛ suu hia lashaga bụ nu umwono-ụshɛrɛya?

⁹Yaa shɛ Agwatana ihiɛ ngbaracɛ, i 'yajɛ suu iyi ibiye ye elele bɛɛ zhɛ ba ta ugbe no olugwo hiŋ? Hi heŋshi suu maa hi eri hia nda Agwatana alagwụ gana na ahia nda atwa?

¹⁰Okwo ta ahia zanga atwa ne tusweci, bi zhɛ kaa ma hiɛ tazhɛgana,

¹¹ukpahiŋ ubwa keeni igɛhi ibwɛ zhɛ mo hi zwono inyɛsɛ.

¹²Eshi hiŋ tisho, a shɛ eshi tɛgadaga gana ma'alụ; ijilɛni hiŋ bwaratagwụ, gana cɛnjɛ-ti'wɛŋnɛ.

¹³Nama ma saiiŋ, M peni ma ohwolu maa ma duma n-ndumwa, ga ajɛshɛgwa muba a shɛ gana na aa shɛ a sha.

¹⁴M mama 'imɛ maa Ma njaraka uraiŋ mu.

¹⁵Okwo baa n kwụnɛ,[16] ubwa waa kaa Ngaa ta ngbaracɛ. N zhɛ kaa me swegeni bu n-ndumwa mi mi ne eshe ubwa.

¹⁶Iwɛ-tɛkana maa inɛ gɛ eri mo m bicingo, iwɛnɛ ti yaa zasa ugworozwo we elele na eri wa kara maa paga Agwatana agba.

¹⁷Hwuwayɛ go, shɛlaga ma tebiye n-ndumwa mu na Ama hiɛ kapɛshɛngana.

¹⁸M mama 'imɛ maa Me sweji n-ndumwa mi mi, iwɛnɛ tu Ngaa 'yajɛ bụtụ na zhɛ ma m pana n-ndumwa-zhɛ.

¹⁹Gaaba namba eri ma n ta ni iwɛɛ? Yaa shɛ Ngaa namɛ shiruu, asha M mama 'imɛ maa mo 'wo.

²⁰Agwatana, Me ci ba ma bụ lụpa iyi iyebi; maa m peni iŋ, maa kede ma bu swakana ya o;

²¹N genji ya ulwapɛ tụpana, to mo zwono inyɛsɛ maa kede no mo holono.

²²Agwatana, n suyanɛ hiiŋ, maa mo bu lono, kwo kaa Me ci ba ma dumana iwɛ hiiŋ, maa tuba n jishijɛ.

²³Imbe shɛ undwa mu tubwada keeni iwɛwɛ nɛ Ngaa njɛɛ? Imbe shɛ iyi iwɛ keeni iwɛwɛ nɛ ee m peni tụwụma ti ibɛɛ?

²⁴Iwembe po abu n swakanɛɛ? Iwembe po abu ma n nda gana bụtụ bụ bi i'imee?

²⁵Inyɛsɛ suu obu mo n zwono? N shɛ shɛ kaa iyi elele o, ama gana uwambɛ kwakwa Ngaa shɛ; gana ụndụrụ uhwoo aba sukakana.

²⁶Bu m peni tụwụma ni iyi nɛ gwumanjɛ, ti iyi nɛ Ngaa ndanjɛ la tu Ngaa ta gwumwa hwɛɛ.

²⁷Gabụ bu to ɛvwɛvwɛjɛ mi ashɛnjɛ; obo shiyono ahaŋpalụ elele na Ama shaparaga eshe, aba yalagaga du ta avwuna mi.

²⁸Iwɛbɛ po Ngoo rukwutogwu gana ụ'wụ'wụ uhwoo na fwoshi kwo kaa gana utogwo na a'nyasụ yɛ.