Read bassa JOB 15 Bible Online

JOB 15 - bassa bible

JOB 15

¹Nazhɛ gɛ Ɛlifaz Biteman ata jishijɛ bụ, bɛɛ hiɛŋ,

²O-Job, n-ndumwa mu tɛgadaga abu ma ti jishajɛ! Bụtụ bi ti'inta suu bɛ jishijɛ hwuŋ n-ndumwa mo ohondo mu na mɛ shɛ gana uvwugo?

³I zasa bụtụ bi ti'inta na zhɛ na duma n-ndumwa gana na aba duma o. Okwo kaa zhɛ no shikono na ashamanjɛ nu n-ndumwa mo ohondo gana ga ebi shikeni bana o.

⁴Ama bɛ njɛ maa kede atwa sụmɛ Agwatana inyɛsɛ o, abɛ njɛ tumama pana tu na atwa mama pana Agwatana ukwurishi.

⁵Iyi nɛ aba duma, ibɛ yo mbisono tugworozwo tụ bụ, aba makana maa mama intanɛ nu n-ndumwa mi ti'inta.

⁶I zasa ule maa ma bu pana ya n-ndumwa-tụwụma o; n-ndumwa me elele na abɛ jɛmɛ mu bu pwonuo tụwụma.

⁷Bi heŋshi suu maa gabụ bɛ shɛ bụtụ bi hiiŋ na ee meci? Okwo bu namwawaŋ la suu aka na ta Agwatana njɛ nshama?

⁸Bu hwugwa la suu iyi elele nɛ Agwatana a haŋsa?[19] Bi heŋshi maa gobuko gba kiri suu bɛ incɛ?

⁹I zasa iyi elele nɛ ebi mepi eti mepi shi o. I zasa kaa iyi elele nɛ ebi eshiciji eti eshiciji shi o.

¹⁰Ti seshi ti'inta tu tu no olugwo atwa na 'yajɛ tuhwaŋla; aba shɛ atwa ata ee meci tobwolo e te meci shi la shibi o.

¹¹Ti'ingatanga ta Agwatana tụ bụ twa sụ suu? Okwo kaa n-ndumwa mi tipece mu na aa dumanga na bụ.

¹²Ama amɛ bụ hashɛganụ, abụ tụ karɛ ashɛrɛnganɛ.

¹³Amɛ bụ hashɛganụ na Agwatana, ibɛ po ebi teri ashamanjɛ ubwa.

¹⁴I 'yajɛ bụtụ eri ba sha bụtụ bụ tụrụmbɛɛ hŋ? Bụtụ na biyikwo meci eri ba sha bụtụ bi tiririri hŋ?

¹⁵Yaa shɛ Agwatana patanɛ shɛ okwo atumwa ubwa azuba rishe; yaa shɛ azuba zasa rụmbɛɛ ne eshe ubwa,

¹⁶asha imbe shɛ inɛ bụtụ na njɛ ufwu, na iwɛwɛ fwoshicinji, na ba swa iyi iwɛ gana menii?

¹⁷O-Job, shɛlaga maa Mo bu eshicigono iyi nɛ Ngee mepi.

¹⁸Atwa na intanjɛ, aba m mbisegeni iwɛ-tɛkana na ee seshi no olugwo eshi aba, i zasa iyi elele nɛ ee sweci o.

¹⁹Cɛnjɛ ta aba tu zasa agaiŋ o, i zasa kaa bụtụ be elele na namba maa bogwu aŋ na Agwatana o.

²⁰Ugworozwo na wa nda atwa vwɛ iji, bi zhɛ ba nama nụ ụngwụ-tuhwuga uuwa bu to 'wo.

²¹Rundu ri inyɛsɛ bɛɛ zhɛ na hwuga na acɛbɛ ubwa, ashɛrɛ zhɛ na sukakana bụ na aka na bee heŋshi maa i zasa iyi elele namba o.

²²Bu zasa ya ashɛlatụ maa bi tɛ zhɛ ba banɛ ne tishi o, utokwobi ta kaa 'yacɛ bụ maa ụ kwụnɛ bụ no ofwo oko,

²³ibɛ po ogwulu a nda ashɛlatụ maa a yɛ ru'wo ru bwa.[20] Bi mepi maa i zasa iyi ibiye ta 'yacɛ bu ya geri-be-eshe o;

²⁴ufwu tɛnda ụ'wụtụ kiri u 'yacɛ bu ba maa u sukakanɛ bụ gana agwuma na 'yajɛ ikɛnyi.

²⁵Gana yɛɛ zhɛ ya shana bụtụ na ba sakana Agwatana u'ala keeni bụtụ na ba tana Agwatana na Hwuri Kpaaŋ tigezhe ta.

²⁶Bụtụ ata bu tubusa keeni bụtụ bi tigezhe ishijɛ bee shepi abula ubwa ujasa na azuba.

²⁷Bee zhe maa sukakana Agwatana, iwɛnɛ tụ ụpɛshɛka ubwa 'yajɛ manɛbɛ, embi ubwa kaa nyemi.

²⁸Ubwa shɛ bụtụ ata lesheji ashɛpwụ ata a'wụtụ keeni shimwono sha ata shɛgwangwama sha shɛba shi gezhigeni, ama tuba ujasa zhɛ wa nda ashɛpwụ ata ufwu hwɛɛ to shimwono sha ata.

²⁹Uzhɛgba ubwa zha shɛ wo ilogogo; i zasa iyi elele nɛ baa 'yajɛ i zhɛ yo ilogogo. Okwo yaa shɛ uzhizhi ubwa, u zhɛ wa kashɛka.

³⁰Bi zha shɛ ba banangana tishi o. Bi zhɛ ba sha gana ụ'wụ'wụ na a'walụ ubwa hwoŋni, na uvwugo[21] suji tusumbo tu bwa.

³¹Yaa shɛ baa lagwụmɛ maa patana iyi iwɛ rishe, asha ijɛ ɛtɛ iwɛ ibɛ zhɛ ya sha itɛpwɛ ibwɛ.

³²Bi zhɛ bo hwotono[22] tobwolo aka ubwa te ci shi o; tuhwotono tu bwa ti zhɛ ta sha gana a'walụ ụ'wụ'wụ na zha shɛ wa saba ya kwukwuŋ.

³³Bi zhɛ ba sha gana ukparɛ ufwafwa na tụ'walụ tu bwa tu 'waŋ tobwolo tu ta nɛ shɛ o; gana ụ'wụ'wụ buta na tusumbo tu bwa tu 'waŋ.

³⁴Atwa na zasa Agwatana na shɛmɛ sha aba, a zha shɛ a 'yaga ajalalo na 'wa aŋ, umwono we elele na kaa oo mo nu ukwuribi ugworo, ulwa ubwa zhɛ wo hwoŋzhingo uŋ.

³⁵Atwa ga aba a imanganga ụbaụta, aba kaa a nda iyi iwɛ, tuhalakaka ti shini na shɛmɛ sha aba aka elele.