Read bassa JOB 16 Bible Online

JOB 16 - bassa bible

JOB 16

¹Go Job jishijɛ bụ, bɛɛ biɛŋ,

²N hwugwa kaa n-ndumwa mu go; ti'ingatanga ti hiŋ tɛ shɛ iyi tiriri.

³Gabụ suu bi zhɛ bu na duma n-ndumwa nom? Okwo gabụ kiri suu bɛ shɛ bu na duma n-ndumwa umɛwɛɛ?

⁴Abu ga shɛ gana mi, Ngaa nga shɛ tuba gana bụ, N nge eri du mu na duma ijɛ aba duma bana hwɛɛ. N ngɛ zhɛ mu no zhingoto uhiuhiu mu na ti'inta, maa mu na bu dumangana n-ndumwa mu ufwugwo.

⁵N nge eri maa ma bu ta ikɛnyi na ahaŋsa maa mu na duma n-ndumwa mu na mi zhɛ na bu ingatanga.

⁶Ama i zasa iyi elele nɛ Ngaa jɛmɛ mo m mbiyono, tunama shiruu kaa tu kwụshɛ shɛ ụngwụ mu tuhwuga o.

⁷Oo Agwatana, gabụ bu n lukwucinji; gabụ[23] bi leni maa umwamwa mu ileni.

⁸Tukwanya kwanya tu na abɛ njɛ tu'waba ti mi hwɛɛ tɛ shɛ ya iyi i'ime mi. N vwɛ ya o'umpwo ababa nyawụụŋ, iwɛ inɛ ɛtɛ ibɛ po atwa hiɛŋ maa n-ndumwa mu n wụmɛ.

⁹Ni isɛbwɛ, ibɛ Agwatana n dwetweji ekpeleshi ekpeleshi, baa ma yana ene, baa n ngbarakacɛ igbɛtɛtɛ i'ime tɛta.

¹⁰Atwa mo n sumono; oo n rungwutwonu, aa ma pagana awaŋpɛ na apada.

¹¹Agwatana n shepi bee utegeni atwa na lacɛ bụ, bee n keleni ogworozwo.

¹²N namɛ la na amɛ-olom, ama Agwatana 'imɛ urworwo mu bee n hwelupi, bee n hwuŋzerenji wuŋzu wuŋzu. Gamba Agwatana shepi baa njɛ tusakana ta atwa vwɛ,

¹³Ibɛ po baa ma tagana a'inla geri geri; a'inla na ma n aŋsatanga a na kaa ma n gwụcanga; bi hieci shi kaa inyɛmɛnyɛmɛ mi taa hwayɛ o.

¹⁴Bu ma n gwụcanga ga tụgwụcanga nom; baa ma n sukakana gana bijeshi na to bụtụ ni i'ime.

¹⁵Ma ta-ụkwụla, Ngee urigeni tugwuno tụ ụcɛnjɛ tɛnda,[24] Ngaa jɛjɛ nu upwupwutu gana bụtụ na aa lasụ.

¹⁶N cwɛ-u'wo uuwa eshe mi shenjemi, uuwa eshe mi shanjɛ tundu tundu, aa jala tu'utogo,

¹⁷ama N zasa tụwụma iwɛ abwagara elele o, na amɛ oko kaa Ama nda adua mi no ofwo Agwatana.

¹⁸A-cɛnjɛ tu unyizo, ta swaka tu'wanga te elele tu na aa n 'wanganɛ o! To lono kaa maa na nama saiiŋ nụ ụhiɛŋshɛ tishiriri na Ama suyana o!

¹⁹N 'yajɛ bụtụ bu ko na namba na azuba, na zhɛ bo shikono maa teni iwe mi.

²⁰N shanɛ eyejilo mi iyi tutwa; ama Agwatana Omo dudwogono malaba[25] mi mi.

²¹Ma jala bụtụ bu ko maa ma n lụpaga Agwatana gana na bụtụ ba lụpaga biyejilo bwa ilupwɛ.

²²Shiywa shi mi shɛ vwɛ ya cwɛŋ, ti Ngɛɛ zhɛ ma ta uhwaŋna na Ngaa zha shɛ me gwure ya.