Read bassa JOB 18 Bible Online

JOB 18 - bassa bible

JOB 18

¹Nazhɛ ge Bildad hiɛŋ,

²O-Job, asha bụtụ gana bu eri shi ba nama saiiŋ ree? Yaa shɛ abu ga 'imɛ ilɛmɛ, ti gɛ zhɛ to bu mbiso iwɛ ike.

³Iwembe kwuŋ po ebi heŋshi maa tụ lagwụmɛ gana inɛɛ?

⁴Gabụ bu mama gwụcanga ni isɛbwɛ bu. Atwa suu zhɛ a bana na cɛnjɛ tu unyizo iwɛnɛ ta aba nda isɛbwɛ? Nshama suu ɛbi hiɛŋ ga Agwatana mushenji nazhɛ maa amɛ bu lemi?

⁵Ɛ tɛ zhɛ o 'woricingo ụsụtụla wo ogworozwo; u zha shɛ kaa wo gorogo ya kwukwuŋ.

⁶Ụsụtụla na ge shi nu udulo ubwa 'weji, ibɛ po waa shɛ ya tishi.

⁷Avwuna ubwa ga 'imɛ la cɛnjɛ, ama ba twatwagwụ ya adukwutwa hwuwayɛ; tuhaŋsa tu bwa ti ikɛnyi ibwɛ tu po bu na cɛnjɛ.

⁸Bo tonongo igwune na tahaŋnụ tu bwa, ibɛ po yaa 'imɛ ivwunɛ ibwɛ.

⁹Ugwuru 'imɛ bụ nu ushikwuru, wee shikicinji bu.

¹⁰Modugwulo mi bici na cɛnjɛ; ee bici ugwuru nụ ụlamụ ubwa.

¹¹Iyi inyɛsɛ yo holono bu no ofwo elele; i 'wa bụ nu uvwuna we elele na bee shepi.

¹²Bɛ shɛ la bɛzhɛgba, ama ba ya ya-imunɛ hwuwayɛ, abara-ne-ebe kaa ta 'yacɛ bụ nu uhwaŋna.

¹³Ụngwụ na wa kwụna bụtụ mburusonu na tu'waba tu bwa woo fwoshicinji i'ɛlɛ ibwɛ ti ivwunɛ ibwɛ hwɛɛ.[28]

¹⁴Ɛ vwɛ bu nu udulo ubwa tugwuno na baa ga swacɛ la, bee peji ya agwuma u tuholono agba.

¹⁵Hwuwayɛ go bụtụ be elele eri ba nama ya nu udulo ubwa tugwuno,[29] iwɛnɛ te e zhizhenji uŋ unibi maa ga ụngwụ we elele na ge eri wa ima bụtụ u 'wi!

¹⁶Tini tu bwa tụ lụmbɛ, ta a'walụ ubwa hweteni hwɛɛ.

¹⁷Urishi na bee ge beni la nụ ụshɛpwụ ubwa ta anya ashɛpwụ hwuwowo hwɛɛ. I zasa bụtụ te teyinje ya iwɛ ubwa o.

¹⁸Ɛ zhɛ a bacɛnga bụ na cɛnjɛ ta atwa na ta hwungwa, ɛ zhɛ a bacɛnga bụ nu uhioko-uhwaŋna maa tono ne tishi.

¹⁹Bu zasa ya ajalalo ne ekwunyi o, i zasa atwa na benengeni o.

²⁰Atwa na namɛ geri bu uwaŋna-banụ uuwa i ci uwaŋna-twono hwụjɛ iyi nɛ jiteni bu, ibɛ po inyɛsɛ shɛ aŋ, ɛɛ bwɛ na tɛzhɛgɛda.

²¹Gana iyi yo jitono atwa awɛ keeni atwa na mepi shi Agwatana ta gom.