Read bassa JOB 19 Bible Online

JOB 19 - bassa bible

JOB 19

¹Go Job jishijɛ bụ, bɛɛ hiɛŋ,

²Iwembe kwuŋ po ahiɛ n uranjɛ n-ndumwa tuzwogonoo?

³Gana ga ahi ma n twaga ɛgbɛɛ; ezuye hiɛ shɛ shɛ na tutwa tu na ahi ma n twaga o.

⁴Okwo yaa shɛ Ngaa njɛ iyi nɛ 'wanjɛ, imbe kwuŋ shɛ inee hiiŋ?

⁵Hi heŋshi maa hiɛ zhɛmɛ ehi n hwuri, ahiɛ ngbaracɛ maa iwɛ iyi nɛ Ngaa njɛ ibɛ po ijɛ i n jiteni.

⁶Hiɛ kwụbɛ shɛ ree maa Agwatana njɛ ijɛ? Bu n biteni ugwuru, baa n 'imɛ.

⁷N keri n'ungwa iwɛ abwagara ga n jiteni, i zasa bụtụ shiri acɛbɛ o; Ngee keri n'ungwa taawụụ maa e m mbiyeni, ama a n dumanganɛ shɛ kaa ụshɛrɛya u tishiriri o.

⁸Agwatana sukeni uhwaŋna, iwɛbɛ po Ngee eri shi ma kashɛka; bu urigeni uhwaŋna mu ne tishi.

⁹Bu suji uduciya mu hwɛɛ, baa njɛ urishi mu ufwu.

¹⁰Bu n hwelipi geri elele. Bee mushinji ashɛlatụ mi, gana bee n genji Ngaa lụmbɛ uuwa maa mo hwulo ta.

¹¹Amɛ Agwatana hashɛganụ, ibɛ po baa n sukakanɛ; baa n njɛ gana bụtụ na boo to ni i'ime nɛ wumanjɛ.

¹²Bu tumwanɛ ejeshi ubwa maa a n sukakanɛ, ee hinenji ashapa ee n gwubegeji, ee hweri udulo mu tugwuno.

¹³Agwatana njɛ maa miaụŋ-mo-bino mi mi n jineci; Ngaa shanɛ ya atwa na m mepi la bugaiŋ.

¹⁴Atwa mi hwulogwo; isɛbwɛ mi du 'wi ya eyejilo mi.

¹⁵Isɛbwɛ mi 'wi ta atwa na Ama ima la ugaiŋ ni ihwɛ mi; ajama mi o o ma n nda ya du gana bugaiŋ keeni bulashɛ.

¹⁶Okwo aka Ngaa suyanɛ yɛu mi ugondu, bu mo n sumongo; okwo Ngaa lụpɛ bụ maa mo mbiyono, (bi zha shɛ mɛ n jishijɛ o).

¹⁷Biyikwo mi jeri shi maa hwuga ya okwo ụhiụŋ mi ihwungwɛ mi, miaụŋ-mo-bino mi kaa mi jeri shi ya maa mu gwumwonu ne mi o.

¹⁸Aka miaụŋ mu tuweewee mu n kwụbɛ mu na ma ngbaraka cwɛŋ, mu na ma hinga ti ilɛtu.

¹⁹Eyejilo ala mi i'ɛlɛ nu unu, o n to ya ni i'ime; atwa na Omo lubo la uhwuri atwa vwɛ hwɛɛ, aba ma n sukakana ya.

²⁰O'umpwo ababa Ngaa vwɛ ya nyawụụŋ,[30] ɛdicɛ Ngaa ta ya uraiŋ.[31]

²¹Agwatana mo n dubo, ahiɛba hiɛ shɛ eyejilo mi! Kwụba ma inyɛmɛnyɛmɛ mi!

²²Iwembe kwuŋ po ahi ma n shɛka du gana na ta Agwatana ma n shɛkaa? Ụbaụta ga ehi m peni u gwumwa sụ ya hŋ?

²³I ga ma n kwụlanɛ yebe maa bụtụ bu ko 'nyeci n-ndumwa mu ga mi mi nu utakada.

²⁴Kwo kaa maa e 'nyeci mu yibwa ni i'ilɛ; ee ge 'nyeci mu nu utayɛ maa mu nama unyizo-nom.

²⁵M mepi maa bileleji mi[32] na shɛ buumwa namba na azuba. Bi zhɛ ma n lashaga na aka umɛwɛɛ.

²⁶Okwo ụngwụ yɛ tu'waba ti mi, tu Ngaa ta namɛ na tu'waba tu ga,[33] N zhɛ ma kwụba kaa Agwatana.

²⁷N zhɛ ma kwụba bụ ne eshe mi, bu zha shɛ ma n shana bugaiŋ o; ahaŋsa mi lwegeji taa na amɛ mi.

²⁸Hi dwelekeci iyi nɛ maa hi n sukakanɛ ni ibɛ, ɛhi hiɛŋ, Gana na kwuŋ ɛti zhɛ ta nda maa ta pana bụ ụbaụtaa?

²⁹Ama nda ma pece hwuwayɛ go iwɛ utokwobi, iwɛnɛ tu utokwobi ata wa 'waŋnanɛ iwɛwɛ isɛbwɛ ya Agwatana; nazhɛ ɛhi zhɛ hia mapa maa ụshɛrɛya wa Agwatana[34] namba.