Read bassa JOB 20 Bible Online

JOB 20 - bassa bible

JOB 20

¹Go Zofa na shɛ Buneamat ata jishijɛ, bɛɛ hiɛŋ,

²O-Job, bi n heshigeni amɛ. N eri shi ma bu ganga ya tijishijɛ o.

³Ijɛ abɛ jɛmɛ bana, tutwa abu n twajɛ, ama M mepi gana na maa mɛ bi jishijɛ.

⁴Bi mepi maa te kwuni na aka cala cala na ta bụtụ[35] teni na cɛnjɛ tu unyizo hiiŋ,

⁵i zasa ugworozwo we elele unyasa ubwa wo ilogogo.

⁶Okwo ugworozwo kaa eri wa waŋna te zeci, maa timengeni tụla, okwo baa waŋnɛ duwa harɛ uhiuhiu ubwa timengeni udomu,

⁷ama ɛ zhɛ o hwulupono bu gana ubwodolo. Atwa na ge mepi bu la zhɛ nɛ hiɛŋ, Geri naa bee hwurii?

⁸Bi zhɛ ba kashɛka gana ozobu ụjita, a zha shɛ a kwụba bu ya kwukwuŋ.

⁹Bi zha shɛ ba nama ya no ofwo ata baa shana ba nama o; atwa na ga kwụbwa bu la, zha shɛ a kwụba bụ ya o;

¹⁰miaụŋ mu bwa me eyi mi zhɛ ma nda okofwo uwebiye ni iyi nɛ bee zunje la ni i'ɛlɛ yo okofwo ata.

¹¹Tu'waba tu bwa tu na tu namɛ la lombwo lombwo, tu na tu mama 'yajɛ la, ti zhɛ ta sha upwupwutu na aka fwalaa.

¹²Okwo iyi iwɛ ga lacɛmɛ nu unu ubwa, baa ima iŋ na bụratụ bu bwa,

¹³bee eri shi bɛ 'nyɛ iŋ, maa i beni nu unu ubwa iwɛnɛ tu baa hwuga ụlatụ ibɛ,

¹⁴ama iyimɛyɛ tuba zhɛ ya gagwuma na amɛ ubwa, ụgagwụ ibɛ zhɛ wa sha gana mangayɛ mu uhwa.

¹⁵Ugworozwo wa gbajɛ uduciya na bee ge zunji; Agwatana bata bɛ vwɛ iŋ taa na amɛ ubwa.

¹⁶Iyi nɛ bụtụ ata bi ci'nyɛ tweri, i shɛ gana mangayɛ mu ugbezhi, ibɛ kaa zhɛ ya kwụna bụ.

¹⁷Bi zha shɛ ba ya uraiŋ maa kwụba manɛbɛ ma buta mu na ma fwunga gana erefu, kwo kaa mosubo keeni iswɛ nɛ ya fwunga gana erefu.

¹⁸Iyi nɛ baa njɛ ugondu ibɛ, zhɛ ya banangana bụ, bi zha shɛ ba 'yaga ohwolu maa ya uduciya ubwa o.

¹⁹Iwɛnɛ po ba nda okofwo umungwuta, bu 'wa sụ iwɛ aba o, bee leshiji shimwono shɛ na anya atwa mo.

²⁰Iyi ibwɛ tudundo zha shɛ yo gombo bu[36] kwukwuŋ, bi eri shi kaa momo bicingo tedure nu uduciya ubwa o.

²¹Bɛ yɛwa hwɛɛ, i zasa inɛɛ nɛ ta vwanɛ bụ ya o, ama tɛzhɛmana tu bwa tu kwunanjɛ ya.

²²Na aka na ti iyi elele balanɛ bụ, na aka ata kaa gbaa ibɛ tiriri ti zhɛ to vwutono bu.

²³Ga ya iyi elele nɛ baa jala karu ko! Agwatana zhɛ a pana bụ ulwapɛ na amɛ-tụhaŋtụ keeni isɛbwɛ i'wɛtwɛ,

²⁴Yaa shɛ bee benengeni utokwobi, i'ilɛ itumburɛ tuba zhɛ ya ta bụ tubana.

²⁵I'ilɛ ɛtɛ zhɛ ya aŋsatanga tu'waba tu bwa, ukashɛmbɛrɛ ibɛ zhɛ ya iba asụbụ ubwa, uriri kaa zhɛ wa ima bụ.

²⁶Iyi elele nɛ bee ge sweci la nu umwono ubwa; zhɛ ya nda ufwu, ulwa na zasa bụtụ be elele na sepi uŋ, zhɛ wo hwoŋzhingo bu hwɛɛ tu umwamwa ubwa.

²⁷Azuba bɛcinjɛ iwɛwɛ bụtụ ga, ibɛ cɛnjɛ tuba ti leshiji tiseyida ti iyi nɛ baa njɛ.

²⁸Ti zhagajɛ tu na isɛbwɛ ya Agwatana[37] zhɛ ya zhagajɛ gana meni, zhɛ yo sugo uduciya ubwa

²⁹Iyi nɛ zhɛ yo jitono ogworozwo ta, Iyi nɛ Agwatana a imangana aŋ ta.