Read bassa JOB 33 Bible Online

JOB 33 - bassa bible

JOB 33

¹O-Job, shɛlaga iyi nɛ Ngaa 'yajɛ maa Ma duma hwɛɛ.

²M mama 'imɛ maa Ma duma iyi nɛ namɛ na amɛ mi.

³N-ndumwa mi mi mɛ shɛ n-ndumwa mu tugom hwɛɛ, iwɛ-tɛkana du kaa Ama duma.

⁴Mpiala ma Agwatana mu n karɛ, muba du kaa mu m peni uraiŋ na Ama hwungwa.

⁵Yaa shɛ ebi eri, asha n jishijɛ. Imanganga n-ndumwa mu na abɛ 'yajɛ.

⁶Iyi ike atɛ shɛ ne eshe Agwatana, na cɛnjɛ-ti'wɛŋnɛ oo tu mo.

⁷Iwɛbɛ po abɛ shɛ shɛ ba nda inyɛsɛ mi; N zha shɛ Mo bu hwulo nu ukpahiŋ o.

⁸Iyi nɛ Ngaa hwụjɛ abɛ jɛmɛ na, bi hiɛŋ,

⁹N zasa tụwụma o; i zasa kaa tipindo te elele Ngaa njɛ o. N namɛ rụmbɛɛ, N zasa iwɛwɛ ye elele o.

¹⁰Ukpaakpa kwakwa Agwatana ma n sukakana, baa ma n nda gana bụtụ bwa bi i'ime.

¹¹Ubwa to ivwunɛ mi ashɛnjɛ; baa ngbaraka iyi elele nɛ Ama nda.

¹²O-Job, N zhɛ mo bu mbiso maa bu 'wanjɛ. Agwatana gembi bee hwuri bụtụ be elele.

¹³Iwembe po aba shana Agwatana iwɛ, maa bɛ jɛshɛjɛ shɛ n-ndumwa me elele mu na atwa swegeni buu?

¹⁴Okwo ta Agwatana a uranga n-ndumwa tụdụma, i zasa bụtụ ba 'wa iwɛ iyi nɛ baa duma o.

¹⁵Okwo aka na atwa o woto malabụ nụ ụjita, Agwatana a duma iwɛ na awalabụ keeni shizobu.

¹⁶Baa nda maa a shɛlaga iyi nɛ baa jɛmɛ, inyɛsɛ ya sha aŋ nu unu na baa tɛtagana aŋ.

¹⁷Agwatana a duma iwɛ na atwa maa e genji iwɛwɛ tɛnda maa lashaga aŋ du na tumama sata.

¹⁸Bi zha shɛ bo lono maa a njɛ ufwu o;[54] ubwa bo bicingo aŋ okwo no tu'wo.[55]

¹⁹Agwatana o vwulo bụtụ okwo tedure nụ ụngwụ na baa patana bụ, baa nda maa bụtụ ata na hwuga-ụngwụ na tu'waba tu bwa.

²⁰Iyimɛyɛ ya kwulana bụtụ ata ba gwụma tiya, ama okwo iyimɛyɛ ɛtɛ ga lacɛmɛ, ya shana bu ya maa iyi iwɛ.

²¹Ba 'nya kokorokwu, ba vwa o'umpwo ababa nyawụụŋ;

²²ohwulu ubwa no gwumwongonu ya tu'wo, keeni atwa na a 'waŋnanɛ bụ utumwa u tu'wo ta ata.

²³Nekeshi butumwa ba Agwatana ba azuba bu ko ba banɛ yibwa na amɛ atwa vwɛ ubwa igbɛɛ ifwugwo maa cɛ bu i'ɛlɛ, ubwa be teyingeni atwa vwɛ iyi nɛ aa shɛ a nda.

²⁴Butumwa ata ba Agwatana ba azuba zhɛ bo hioko inyɛmɛnyɛmɛ ibwɛ, bɛ hiɛŋ, Kala bụ! Bu ta shɛ shɛ bo 'wo. Iyi nɛ Ngɛɛ zhɛ ma tụpa iwɛ ubwa maa hi keri bu na.

²⁵Tu'waba tu bwa ti zhɛ ta waŋnɛ sasana, ta 'yaganana ukpahiŋ gana yɛu tisemberi.

²⁶Aka na baa njɛ adua, Agwatana zhɛ ɛ jishijɛ bụ; bɛɛ zhɛ ba zhɛba Agwatana nu unyasa. Agwatana kaa zhɛ e gwuricingeni bụtụ ata tiririri tu bwa sasana.

²⁷Bi zhɛ ba duma ne eshe ofwugwo maa, N njɛ la iwɛwɛ. N njɛ shɛ la iyi nɛ teni cɛŋ o, ama Agwatana kaa te me genji Ngaa ta ya uraiŋ.

²⁸Ubwa lacɛ maa ma zha ne e'uye, iwɛbɛ po Ngaa ta ya hwayɛ uraiŋ.

²⁹Agwatana a ndana bụtụ ijɛ na aka ofwugwo.

³⁰Boo bicingo uraiŋ bụtụ maa kede tono ne e'uye o, baa pana bụ uhioko-uhwaŋna uraiŋ na tunama tu bwa.

³¹O-Job, shɛlaga iyi nɛ Ama njɛ; ima ilɛmɛ maa Ma duma n-ndumwa.

³²Ama yaa shɛ abɛ 'yajɛ iyi nɛ maa jɛmɛ, duma iŋ ma hwuga; Yaa shɛ ebi teni hwayɛ cɛŋ, N zhɛ mo lono nu unyasa.

³³Yaa shɛ kaa abu zasa, asha shɛlaga iwe mi, maa Mo bu mbisogono ti'inta.