Read bassa JOB 38 Bible Online

JOB 38 - bassa bible

JOB 38

¹Nazhɛ AGWANGWAMA jishijɛ Job n-ndumwa na amɛ ujipo, bɛɛ hiɛŋ,

²Gaaba abɛ shɛ obu mo n hoŋtono iwɛ ti'inta ti mi, no tugbodu tụ bụ, keeni n-ndumwa mụ bụ mo hondoo?

³Ishijɛ maa shikono, gana na ta abɛ shɛ butugwumwa, maa jishijɛ iheŋtene nɛ Ngɛɛ zhɛ mo bu hoŋtono.

⁴Cee kwuŋ abụ namɛ la aka na Ngaa njɛ unyizoo? Yaa shɛ ebi mepi asha m mbishi.

⁵Gaaba heŋshi gana na waa shɛ wo gomboo? Gaaba mengenji uŋ ne bimenji na aa manga iyii? Bi eri bɛ jishijɛ iheŋtene ɛtɛ kaa?

⁶Ni imbe atukpa na untanganɛ cɛnjɛ tu unyizo ga patanɛɛ?

⁷Mkpasu ma twa maa zunga azunga ti iyi rimeni, atumwa Agwatana azuba tuba uganɛ n'ungwa mu unyasa.

⁸Gaaba kwuŋ kepi odubo maa ge itekwu shikono, aka na tu waa ibwa na asụbwụ cɛnjɛɛ?

⁹Gamba n urigeni la itekwu ɛtɛ no odomu; Ngee fwulegeji iŋ ne tishi.

¹⁰Gamba n shileni itekwu ɛtɛ ogwungwu; Ngaa ndanɛ iŋ shidubo shɛ na shɛ 'yajɛ tukapa.

¹¹Ngee mbishi iŋ maa, Uce bu na, ta kaana ya izhɛ o! Epe adanga ga bụ ukpahiŋ a shɛ o togo.

¹²O-Job, i 'yajɛ kwukwuŋ aka na obu pwonuo-unu maa ga ụjita shi hŋ taa ta abu namɛ la hwayɛ?

¹³Bi hiɛwaŋ kwukwuŋ maa ge iyi heri hŋ nazhɛ yee heri na cɛnjɛ tu unyizo maa vwɛ ogworozwo uvwi no ofwo na aa swakacɛ?

¹⁴Iyi ɛtɛ tuholo yɛ vwɛ iyi elele maa i shilo caakwụ gana utogwo na ee kwungwuri, yo tulono caakwụ gana i'nyɛtɛ nɛ oo to na cɛnjɛ-ti'wɛŋnɛ.

¹⁵Uhioko-uhwaŋna uwaŋna kwụlanɛ shɛ ogworozwo; iwɛnɛ waa lakana aŋ iyi ya abwagara aba tɛnda.

¹⁶Bu twonuo suu nu umɛzhinjɛ na namɛ na amɛ itekwu ɛtɛ? Okwo bu zhogwo suu tahaŋnụ ni icicɛ itekwu?

¹⁷I 'yajɛ suu bụtụ ubu mbiswonuo odubo nhwaŋ-me-e'uye na shɛ tishi zhuuŋ?

¹⁸Bi mepi suu gana na unyizo gembi wee teje? Yaa shɛ ebi mepi ijɛ kpaaŋ, asha n jishijɛ.

¹⁹Bi mepi suu olugwo na uhioko-uhwaŋna wa banɛ; kwo kaa olugwo na tishi ta banɛ?

²⁰Bi eri suu bo mbisono aŋ ofwo na aa shɛ o togo, kwo kaa maa gwuricinji aŋ sasana?

²¹M mepi kaa maa bi eri, iwɛnɛ to o bu mwotwo la na aka ata, abu zhɛlwa kaa shiywa shu ufwugwo.

²²Bu twonuo kwukwuŋ umwono na Ngee sweci tulomu keeni atayɛ-eshilo hŋ?

²³N intanɛ iŋ iwɛ ụjita ifelu, keeni iwɛ ụjita ujasa.

²⁴Bi mepi suu olugwo na uwaŋna wɛ ishijɛ nazhɛ waa banɛ? Kwo kaa olugwo na uvwugo uwaŋna-banụ wa banɛ nazhɛ woo mburusonu nu unyizo?

²⁵Gaaba kwuŋ keleni eshilo na o ngbo uhwaŋnaa? Gaaba tuba hengeni ɛbɛrɛ keeni oto uhwaŋnaa?

²⁶Gaaba kwuŋ ba nda maa eshilo no ngbo no ofwo na atwa zasabaa?

²⁷Gaaba kwuŋ bo lomicingo cɛnjɛ tu na tu hweteni ta jala meni, iwɛ maa ambɛ unshɛɛ?

²⁸Te eshilo, te cime, a 'yajɛ suu eshi na meci aŋ?

²⁹Gaaba shɛ bino be meni mu na mo hwotono gana utayɛɛ? Gaaba meci mpiala mu tucwii mu na ma banɛ na azubaa?

³⁰Mu gata ma hwacɛnga meni maa mɛ shɛ gana utayɛ, mu gata du ma hwacɛnga ta azuba itekwu ɛtɛɛ?

³¹Bi eri suu bo umpo ayiwale urubwo uko; kwo kaa ba dwa uhwohwo na umpi ajalagashiwawa?

³²Bi eri suu bi nɛ bɛcinjɛ mkpasu na aka muba, kwo kaa maa no sokokono ucwee ata ụ'wụtụ, to oywoywo ubwa uhwaŋna?

³³Bi mepi suu undwa na namɛ na azuba? Bi eri suu bu na nda undwa ata na cɛnjɛ tu unyizo ga?

³⁴Bi eri suu ba uganana odomu maa eshilo e bi ngbeni?

³⁵Bi eri suu ba tumwana ɛbɛrɛ utumwa maa aa njɛ, e gwure no ofwo bu, maa ɛ bi hiɛŋ, Tu nduwa iyi nɛ ebi ti eni?

³⁶Gaaba kwuŋ zweni ti'inta taa na amɛ na amɛ bụtụụ? Kwo kaa peni-ahaŋsa bụtụ[61] iyi ti'eshicigoo?

³⁷Gaaba ti'inta tu bwa tu waŋnɛ maa rɛta odomuu? Gaaba eri be zhire tụla maa eshilo 'waaŋ?

³⁸Eshilo e indono upwupwutu nazhɛ waa sha ulakpa.

³⁹Bi eri suu bɛ kwunɛnjɛ izeci usunda maa i yɛ, maa e shigeji to oywoywo aba hwɛɛ na

⁴⁰aka na te e weteji na a'ibwa aba ee gwubegeji iyi?

⁴¹Gaaba kwuŋ ba biga agwaagwaa aka na ti imunɛ gwụmɛ oywoywo aba oo rungo aa ma n uganana iwɛ iyimɛyɛɛ?