Read bassa JOB 39 Bible Online

JOB 39 - bassa bible

JOB 39

¹Bi mepi suu aka na ogburudu a mata? Bu ngbarakawa kwukwuŋ hŋ ta bụlụba ba mata?

²Ba rɛta suu ipiɛnɛ nɛ ofubo aba o ilogogo nazhɛ aa mata? Ba mapa suu aka na ɛɛ zhɛ tumata?

³Ba mapa hŋ aka na oo ubono nazhɛ yɛu ya aba ya 'waŋ?

⁴Na ambɛ miaụŋ ma aba ma waŋna maa mama 'yaga, nazhɛ mo hwulo geri na kwụlanɛ mụ; mi zha shɛ kaa me gwure ya no ofwo aba o.

⁵Gaaba kwuŋ bo tufwurungo bɛshɛmba na namɛ na ambɛ nazhɛ baa mama 'yagaa? Gaaba bo tufwurungo aŋ maa o no rungo gbomuu?

⁶Gamba m peni aŋ ehilo maa a shɛ ihwɛ ya aba, Ngee leneni aŋ maa a nama nu udadarɛ ata u manɛ.

⁷A dụlụmɛ no rundu rụ ụshɛpwụ ata ụ'wụtụ, i zasa kaa bụtụ be elele na eri ba biga aŋ, maa a na hwuga-unu ubwa o.

⁸Nshama muba mɛ shɛ ofwo aba tiyaga, a na aa ya iyi, apata oo rungo ambɛ olom maa a na ya.

⁹Binemi be eyi suu eri ma bu ndana ugondu? I zhɛ suu ya kwulana bụ maa bu no woto ni isume iyimabiga bu, okwo ụrụmɛ uko gba?

¹⁰Bi eri suu ba ta bụ uhwohwo maa bu na hwaŋ itimɛ, kwo kaa maa bu no kokwulo n-ngowo mu na maa bwarataga alakpa ni itimɛ?

¹¹Bi eri suu ba datana bụ iwɛ ukpahiŋ na baa 'yajɛ maa ma bu ndana ugondu ukpahiŋ na abi 'yajɛ?

¹²Ubwa suu abu ngbaracɛ maa ma bu 'wananganɛ iyimɛyɛ bu maa mo bu zwonono iŋ nu urubwu bu?[62]

¹³Okwo gana elele tu ugbaanjɛ wa piasa apiambɛ ubwa nu unyasa, ama tuba a shɛ suu apiambɛ tulubo?

¹⁴Ugbaanjɛ wa 'waŋ anjɛ ubwa na cɛnjɛ maa oholobwo cɛnjɛ vwongicinji aŋ.

¹⁵Ubwa ni ikɛnyi ibwɛ heŋshi shi maa bụtụ bu ko eri ba fwunda aŋ, kwo kaa maa usunda uko we ehilo eri wo rukoto aŋ o.

¹⁶Ba nda gana maa anjɛ ata shɛ shɛ a na ubwa o, i te shi bu okwo baa njɛ ụbaụta ata gbi o.

¹⁷Gamba n njɛ bụ maa sha alagwụ; M peni shi bu ti'inta o.

¹⁸Ama aka bee kwuni usumwa, bu na hinga budakwa keeni bụtụ ba suka bụ ilɛtu.

¹⁹O-Job, gabụ suu bɛ njɛ idɛkwɛ maa i 'yaga ikɛnyi, okwo gabụ suu bu ndanɛ iŋ izeci ɛtɛ patanɛ na azuba n'ilu ma aba?

²⁰Gabụ suu ba nda aŋ maa a na hiranga gana ovworo maa o no holono atwa no tungwulono ta aba?

²¹A na hwaga cɛnjɛ ne eswenyi aba[63] nu ulomu; o hwulo maa a twa na atwa na umpi i'wɛŋnɛ ujasa.

²²E mepi shi inyɛsɛ tɛnda o, i zasa kaa utokwobi na eri wo gwuricingo aŋ ne ekwunyi o.

²³Ɛ vwɛ na tɛzhɛgɛda maa e hwuri, na aka elele na ee hwulipeni ukakacɛ, a shɛdɛnga nu usumwa, a ta tuhwulo, e eri shi o shikono ya urubwo uko.

²⁴I'wɛŋnɛ ujasa nɛ a sụcɛ ibɛ pagajɛ, ya nda zhakwụ zhakwụ, i na nda mbaraa mbaraa nu uwaŋna.

²⁵Aka elele ee hwulupeni ukakacɛ, ɛ zhɛ o ngwulono, a hwuga ụhiụŋ ujasa tobwolo o to gwumwonu su nu bwa o, a hwuga du te eberezhe a pana-unu.

²⁶No ofwo bu suu ucepi wo soso uhilwa na aka na ti bee berishiji apiambɛ ubwa bɛɛ zhɛ tuta?

²⁷Gabụ suu ugbeji wa 'yaka maa peni bu unu nazhɛ maa ta tuhwurugwo tu bwa nu nshama?

²⁸Ba ma ihwɛ ibwɛ nu utayɛ na zeci uhwuri a na vwɛ hwɛɛ, no ofwo na zhɛmɛ, a na zeci uhwuri a na vwɛ hwɛɛ, aba a sha ijilɛni ibwɛ.

²⁹Apata baa na kwụba ofwo elele na dụlụmɛ; to ofwo na gwumwonu maa kwụna usunda na maa ya.

³⁰Egbeji o rugwutwonu ru'wo, oywoywo aba tuba na swa mehieŋ.