Read bassa JOB 4 Bible Online

JOB 4 - bassa bible

JOB 4

¹Ge Elifaz Biteman ata, hiɛŋ,

²O-Job, N eri shi ma nama ya saiiŋ o, Yaa shɛ Ngaa dumanɛ hwayɛ iwɛ, amɛ bụ suu zhɛ a hashɛganụ?

³Bu mbiswogwonuo atwa ofwugwo iyi, obu pwonuo atwa na mama zasa ikɛnyi.

⁴Aka na bụtụ lweji, bee lukwumi, baa twa udukwutwa, n-ndumwa mụ bụ kaa ma hiɛcɛnga bụ u'waba maa shikono.

⁵Ama aka na ti yee bi ci ya maa njɛ ụbaụta, u'waba ụbụ kwuswa, yaa bu dama ya.

⁶Aba sụma kaa Agwatana inyɛsɛ, uraiŋ bụ kaa zasa unu-tusapa o; iwɛ inɛ ɛtɛ, bɛ shɛ ba nda ahansa bu oko, maa njɛ ashɛlatụ.

⁷Kwuno tuhaŋsa iwɛ aka na koshikwo. Cee bụtụ na zasa n-ndumwa-tụwụma keeni bụtụ bi tiririri nduwa ufwuu?

⁸N kwụbwa ta atwa bweji itimɛ iwɛwɛ, aa bɛrɛ izɛgwu tugworozwo; ibɛ po oo gwubo ya tugworozwo keeni iyi iwɛ.

⁹Agwatana njɛ aŋ ufwu tedure na tuhwungwatangwụ ti isɛbwɛ ibwɛ i'wɛtwɛ.

¹⁰O rungo gana izeci, ogworozwo tuba o ngwulo, ama Agwatana njɛ aŋ maa a nama saiiŋ, baa kwusatajɛ ene aba.

¹¹E 'wi gana izeci nɛ kwụbɛ shɛ iyi elele maa aa kwụnɛ a yɛ, ibɛ po oywoywo aba garatagwụ hwɛɛ.

¹²E m mbishi utumwa uko swɛɛ, ɛdicɛ du kaa Ngaa hwụjɛ uŋ.

¹³I ma nda gana ozobu na aka na ta atwa 'waŋ malabụ nụ ụjita hwɛɛ,

¹⁴inyɛsɛ i n shɛ, Ama zhɛgɛda hwɛɛ to o'umpwo mi.

¹⁵Mpiala mu ko mu m po nụ ụpɛshɛka, ibɛ po tihiŋzhe ti mi ti ishajɛ, u'waba n njɛ hawụụŋ.

¹⁶Ngaa kwụbɛ ti iyi ike shikeni, Ngee zweni iŋ igbɛtɛtɛ, m mepi shi kaa iyi nɛ yaa shɛ o. Nazhɛ Ngaa hwụjɛ rụhwụŋ ru ko no ofwo ata tusaiiŋ, rɛɛ hiɛŋ,

¹⁷I 'yajɛ suu bụtụ eri ba sha bụtụ bi tiririri ne eshe Agwatana? Kwo kaa na eri ba nama rụmbɛɛ no ofwo bụtụ ata karɛ bụ?

¹⁸Agwatana patanɛ shɛ miaụŋ mu bwa mu ugondu rishe o; baa kwụbɛtana kaa du atumwa ubwa azuba ti'ina.

¹⁹Asha gana naa ya tuba bee eri ba patana iyi-uumwa nɛ shɛ gana ụ'nyasụ na zasa iwɛ tupwuswo na kaa wo woto nu umwono na ukoshilo ubwa patanɛ nu upwupwutu na oo mo na cɛnjɛ-ti'wɛŋnɛ, rishee?

²⁰Butugwumwa eri ba sha buumwa nu uvwungwa, ama mawaa ụrụmɛ shɛ bo 'wo eshigiri.

²¹O sugo ya iyi elele nɛ baa ga 'yajɛ; okwo ti bee 'wi, ti'inta kaa tu ta twa sụ bụ taa hwayɛ waa o.