Read bassa JOB 40 Bible Online

JOB 40 - bassa bible

JOB 40

¹AGWANGWAMA hiɛŋ Job,

²Bụtụ na ba twa ifelu na Agwatana na Hwuri Kpaaŋ, ubwa suu zhɛ bo sokokono bu iyi? Ga bụtụ ata ba sapa Agwatana unu jishijɛ iŋ ya.

³Go Job jishijɛ AGWANGWAMA, bɛɛ hiɛŋ,

⁴AGWANGWAMA, N jɛmɛ n-ndumwa mụ ụlagwụ. Gana naa kwuŋ Ngee te eri mɛ jishijɛɛ? N zha shɛ ma dumana ya iyi elele o.

⁵N dumwa n-ndumwa mu na Ngaa ngaa shɛ shɛ ma duma kpalụ ko, N zha shɛ mɛ jishijɛ ya kpalụ yebi o.

⁶Nazhɛ AGWANGWAMA dumananɛ n-ndumwa no Job na amɛ uvwugo ata, bɛɛ hiɛŋ,

⁷Ishijɛ shikono gana na ta abɛ shɛ butubwenyi, maa jishijɛ iheŋtengene mi.

⁸Ba jala suu maa jɛmɛ ụshɛrɛya mu maa N shɛ shɛ bụtụ bi tishiriri, maa Gamba n 'wanjɛ ebi teni tuba cɛŋ?

⁹Bi 'yajɛ suu ikɛnyi gana na Ngaa 'yajɛ? Rụhwụn rụ bụ suu ri eri ra ugana gana me ri mi ru na rɛ shɛ gana uto?

¹⁰Yaa shɛ gana ata asha ishijɛ maa meme peni ụjɛrụma maa na busa, meme peni igɛhi keeni ụjɛrụma.

¹¹Mbiyana de atwa ata a mama sata, zhaga zucinje aŋ ni isɛbwɛ bu.

¹²Iiŋ mizha, mbiyana aŋ maa kezhicinje aŋ; bwarataga ogworozwo no ofwo ata ee shikekeni.

¹³Togotogwu aŋ hwɛɛ maa sweci aŋ nu upwupwutu, umpo apɛshɛka aba nu nhwaŋ-me-e'uye.[64]

¹⁴Gamba n zhɛ ma sha bụtụ bi hiiŋ na zhɛ ma bu dumanga, maa Mo lono maa gabụ bu lasụ aŋ ga ni ikɛnyi bu.

¹⁵Mbiyana de maa kwụbɛ udegbe ata Ngaa njɛ, Gamba n karɛ bụ gana na Ngaa bụ karɛ du. Ba ya ambɛ gana buna,

¹⁶ama kwụba de ikɛnyi nɛ baa 'yajɛ na tu'waba tu bwa keeni gana na tu'waba tu bwa ti 'yajɛ ukpahiŋ!

¹⁷Utwenyi ubwa shikeni gana usobu, tini to n'unto mu bwa kaa ti 'yajɛ ikɛnyi.

¹⁸O'umpwo ubwa 'yajɛ ikɛnyi gana utumburɛ, akatakpa ubwa shɛ gana okwuto ụshɛmbɛrɛ.

¹⁹Ubwa shɛ usunda na wa dama bụtụ uhwuri una vwɛ hwɛɛ na amɛ iyi-uumwa mi, bụtụ na karɛ bụ ubwa kiri eri ba lasụ bụ nu utokwobi.

²⁰Nu nshama mu na isundɛ ye ehilo ya nanga tụlagwụ, apata ambɛ na shɛ iyimɛyɛ ibwɛ a saba.

²¹Bo ubono nu ukokoto tuka, baa swaka na amɛ eninjidegbe nu uhwulwo.

²²Tuka ta ata, ti ikpɛri ɛtɛ ya sha uhwunu ubwa nu uhwulwo ata, nu uhwunu ata boo ubono, wo urugono bu ya kpirimi.

²³Inyɛsɛ urefu na wa zhagajɛ shɛ shɛ bụ o, i te shi bu okwo urefu Jodan wo tono bu nu unu o.

²⁴Gaaba eri bo utogo bu eshe maa ima bụụ? Kwo kaa gaaba eri ba ima inyɛnu ibwɛ nu ugwuruu?[65]