Read bassa JOB 41 Bible Online

JOB 41 - bassa bible

JOB 41

¹Bi eri suu ba ima buduwo na akama na aa ima bijana kwo kaa bo umpo bụratụ bu bwa nu uhwohwo?

²Bi eri suu boo shiyono bu uhwohwo ni inyɛnu, kwo kaa ba sapa bụ akama na apa?

³Bi zhɛ suu na bụ lụpa maa keri bu? Kwo kaa bi zhɛ suu ma bụ tabwa maa hieci inyɛmɛnyɛmɛ ibwɛ?

⁴Bi zhɛ suu ba twa-unu na bụ maa mo bu shilono-unu maa bi zhɛ ma bu ndana iyi unyizo-nom?

⁵Bi eri suu ba ta bụ uhwohwo gana ụnụnụ maa ajama bụ o o na nanga tụlagwụ nu bwa?

⁶Ahinya suu zhɛ o lumo bu? Okwo ɛ zhɛ suu a jajaga bụ maa e senji?

⁷Bi eri suu ba ta bụ ụtagwụ, kwo kaa bo rukwutogo uhiuhiu ubwa nu ụcakwụrụmwa?

⁸Yaa shɛ ebi timengeni bu kpalụ ko gba, bi zha shɛ du kaa ba kwabilana ya o; isɛbwɛ ifelu nɛ ɛhi zhɛ hia twa du kaa zha shɛ mo bu 'wo kwukwuŋ.

⁹Bụtụ be elele na kwụbɛ buduwo, inyɛsɛ ya sha bụ, ba layagaga na cɛnjɛ.

¹⁰Yaa shɛ ee timengeni bu, bi 'yajɛ mazhanga; i zasa bụtụ na zhɛ ba manga maa ishicinjɛ bu o.

¹¹Gaaba Ngaa yɛ utashɛ Ngaa shɛ ma tụpaa?[66] Gamba kaa n 'yajɛ iyi elele nɛ namɛ na cɛnjɛ tu unyizo ga hwɛɛ.

¹²Me ci ba mo hi mbiso gana na buduwo shɛ, maa Mo hi mbiso du gana na bee gembi keeni gana na baa 'yajɛ ukpahiŋ.

¹³I zasa bụtụ eri bo ushogo ashasha ubwa[67] o; kwo kaa na eri ba bwarataga ashɛnjɛ na ubeni nu uhiuhiu ubwa o.

¹⁴Gaaba eri ba haŋpɛshɛnga apa ubwa, te ene ubwa shamanɛɛ?

¹⁵Iyi nɛ shɛ gana shabula shɛ ujasa momo potongonu na aba ubwa; yaa mama imanụ kpam, yaa 'yajɛ ikɛnyi gana utayɛ.

¹⁶Ana ana togwu na anya kpam, okwo mpiala mi eri shi mo tono na ashashɛ aba o.

¹⁷I mama imanụ, i zasa iyi nɛ namba i eri ya pashanga iŋ kwukwuŋ.

¹⁸Yaa shɛ baa njɛ ejishi, ulwa wa banɛ busu busu, eshe ubwa a ta gana ezezeji uwaŋna.

¹⁹Bụratụ bu ulwa bo gorogo nu unu ubwa, tubabazhɛ tu na nda badabada.

²⁰Nshikwo ma banɛ ni inyɛnu ibwɛ, gana nshikwo ma ambɛ na ee zweni na a'alụ na ikwɛshɛ patanɛ.

²¹Ihwungwɛ ibwɛ ya sapa iyi ulwa; bụratụ bu ulwa ba banɛ nu unu ubwa.

²²I'ilu ibwɛ 'yajɛ ikɛnyi; iwɛbɛ po uriri ubwa wa ima atwa elele na twa nu bwa, inyɛsɛ ya sha aŋ.

²³Tu'waba tu bwa tụ sụlụpanɛ, taa 'yajɛ ikɛnyi hwɛ hwɛɛ, tu hweteni, taa 'yajɛ ikɛnyi gana ụshɛmbɛrɛ na njɛ shɛ bulama.

²⁴Agba ubwa hweteni, aa shɛ gana inɛnɛ, a 'yajɛ ikɛnyi a njɛ shɛ bulama kwukwuŋ.

²⁵Aka baa njɛ bulama, uriri ubwa wa ima okwo atwa na 'yajɛ ikɛnyi uhwuri atwa vwɛ, a zasa iyi nɛ eri ya la aŋ ni inyɛsɛ ya aba o.

²⁶I zasa utokwobi na eri wa gwụcɛnga bụ o; i zasa kaa du isɛnu kwo kaa i'ilɛ kwo kaa ụtagwụ na eri wa nda bụ iyi elele o.

²⁷Ụshɛmbɛrɛ shanɛ bụ gana usanga, utumburɛ kaa shanɛ bụ gana ụ'wụ'wụ na fwoshi.

²⁸I zasa i'ilɛ nɛ eri yo unzo bu maa gozhigo; atayɛ ikwele a na aa ta bụ shanɛ bụ gana afwụrɛkɛcɛ.

²⁹Obwugwu kaa shanɛ bụ gana ụụrɛya, aka na atwa a ta bụ shɛtagwụ; ilɛtu kwakwa baa na hinga aŋ.

³⁰Ashasha amɛ ubwa a shɛ gana ejejebi; a hwaga udwodwo ụ'wụtụ gana n-ngowo mu na oo to nụ ụshɛmbɛrɛ zhɛzhɛzhɛ.

³¹Ba nda maa itekwu na nda wuya wuya gana meni mu na ma gwụzhajɛ, baa nda maa u no fwuno gana muzhimi mu na mi shiteji ni ikwɛshɛ.

³²Ụlamụ na baa kala ne ekwunyi ubwa, wa ta gana uwaŋna, ba nda maa itekwu 'yaga tufwuno tɛ cɛnjɛ.

³³I zasa iyi elele nɛ namɛ na cɛnjɛ tu unyizo i shɛ aa manga nu bwa o; bɛ shɛ iyi-uumwa nɛ zasa inyɛsɛ.

³⁴Bu ngbaracɛ okwo usunda ehilo we elele na wa busa uhwuri una vwɛ hwɛɛ cwɛŋ bana. Ubwa shɛ agwuma ni iyi-uumwa ye elele nɛ ya busa.