Read bassa JOB 42 Bible Online

JOB 42 - bassa bible

JOB 42

¹Go Job jishijɛ AGWANGWAMA, bɛɛ hiɛŋ,

²M mepi maa bi eri ba nda iyi elele; i zasa kaa bụtụ be elele na eri bo ngwuricingo iyi elele nɛ abu imanganjɛ maa njɛ o.

³Bi hiɛŋ kede ma kara Mo bu hoŋtono iwɛ ti'inta tụ bụ o, iwɛnɛ tu Ngaa shɛ bugbodu bụ 'wụtụ. N jɛmɛ iwɛ iyi nɛ Ngee eshiciji shi, ibɛ shɛ iyi tudama nɛ i n hwuleji tumapa.

⁴Aka na aba njɛ n-ndumwa, ɛbi hiɛŋ ma shɛlaga maa mɛ bi jishijɛ iheŋtene bu.

⁵N nga hwuga la kwakwa unabarɛ bụ, ama M bụ kwụbɛ ya ne eshe mi.

⁶Ezuye iyi nɛ Ngaa jɛmɛ kpaaŋ n shɛ, iwɛbɛ po Ngee teni nu upwupwutu keeni ma'alụ.

⁷Aka na ta Agwatana hwuwi n-ndumwa tụdụma no Job, bɛɛ hiɛŋ, Elifaz, Amɛ mi hashɛganụ na bụ, te eyejilo bu eyebi, iwɛnɛ ta ahiɛ jɛmɛ shɛ iwɛ-tɛkana iwe mi gana na ti yɛu mi ugondu go Job jɛmɛ.

⁸Sugo ma inɛ ye eyi icenje, na adagba ecenje, hi zhe no ofwo Job maa hi to ụrụpɛ iwɛ uhiuhiu hiŋ. Nazhɛ go Job zhɛ ma hi ndana adua. N zhɛ ma hwuga adua ubwa, iwɛ maa Ma hi ganga ụpụrụsa na Ngɛɛ ngɛ zhɛ Ma hi pana. Hiɛ jɛmɛ shɛ iwɛ-tɛkana iwe mi gana na baa jɛmɛ o.

⁹Nazhɛ ge Elifaz na shɛ Bitiman, ne Bildad na shɛ Bishuhi keeni Zofa na shɛ Bineamat, njɛ iyi nɛ AGWANGWAMA hiɛŋ aŋ ga a njɛ, ibɛ po AGWANGWAMA jishijɛ adua Job.

¹⁰Na aba na tu go Job ndanɛ eyejilo ubwa atatụ adua bee hwuwi, nazhɛ AGWANGWAMA gwuricingeni bu tɛzhɛmana tu bwa sasana. Bee peni bu iyi gana na baa ga 'yajɛ la kpalụ yebi.

¹¹Miaụŋ-mo-bino Job, ta angwụfwụ ubwa, te eyejilo ala ubwa zhajɛ bụ tụkwụba hwɛɛ aba. Aa yɛ iyimɛyɛ isene unyasa nu bwa ni ihwɛ ibwɛ. Aa jɛmɛ tugwumana ta aba ni iyi nɛ AGWANGWAMA shapɛrɛganɛ la Job, nazhɛ aa ingatanjɛ bụ. Ee peni bu ukwuribi keeni tɛkanɛ ta azhɛnarɛya hwɛɛ aba.

¹²AGWANGWAMA peni Job uwebiye nu ukwunanga uraiŋ ubwa tiya uhwuri gana na bee peni bu la na aka ihiiŋ. Go Job 'yajɛ agwụdụ igbɛɛ-icenje (14,000), baa 'yajɛ nruhondo igbɛɛ-itɛtu, 6,000, ni inɛ akpakwụ-a-ta (1,000), nu nzhinyacɛ akpakwụ-a-ta (1,000).

¹³Bi meci miaụŋ-me-eyi mi cenje, na mu na mo o mu tatụ.

¹⁴Boo po yɛu ibwɛ yo o ihiŋ ge Jemima,[68] boo po inɛ iyebi ge Kezia, boo po inɛ itatụ ge Keren-hapuk.

¹⁵I zasa eyikwo na pilanụ nụ ụzhɛ nu unyizo hwɛ hwɛɛ gana miaụŋ ma ata mu Job mo o. Bishi ba aba peni aŋ du iyi-yo-ogwu nɛ shɛ urobwo wa aba gana na ti bee peni nkwonyi ma aba.

¹⁶Go Job yaananɛ uraiŋ shiywa dipi-yebi-na-buhanda na aba ata. Bɛ yɛ uraiŋ, harɛ baa kwụbɛ miaụŋ mu bwa, na ajalụ ubwa, na ajalalo ubwa keeni anyabɛshɛ ubwa hwɛɛ.

¹⁷Bɛ injɛ cɛjɛɛ nazhɛ bee 'wi.