Read bassa JOB 5 Bible Online

JOB 5 - bassa bible

JOB 5

¹O-Job, kala de ụhiɛŋshɛ, maa kwụbɛ okwo bụtụ be elele zhɛ mɛ bi jishijɛ. I 'yajɛ butumwa ba Agwatana ba azuba be elele ebi eri ba zhagana hŋ?

²I shɛ iyi ụlagwụ maa na mama zuga ma 'wi nụ ụngwụ.

³N kwụbwa shɛlagwụ shɛ na shɛ namɛ suu, ama tuba N keleni nhwaŋ ma aba unu eshigiri.

⁴Miaụŋ ma aba me eyi mi zha shɛ ma banangana o; i zasa bụtụ be elele zhɛ ba lashaga aŋ nu umwono-ụshɛrɛya o.

⁵Atwa na imunɛ gwụmɛ, aba zhɛ a ya iyimɛyɛ shɛlagwụ; okwo yaa shɛ iyimɛyɛ nɛ aa hwɛŋ ne esepi, atwa na i'uyɛ gwụmɛ aba zhɛ na nda isɛbwɛngwɛ uduciya ubwa.

⁶Iyi iwɛ waŋnɛ shɛ na cɛnjɛ o; ụbaụta du kaa unshɛ shɛ na cɛnjɛ o.

⁷Awo! Bụtụ ubwa mama 'waŋnanɛ ụbaụta gana ta tubabazhɛ tu ulwa tu na ta hiɛla.

⁸Ngaa nga shɛ gana bụ, N ngɛ zhɛ ma zhagana Agwatana maa Me swegeni bu n-ndumwa mi mi.

⁹Ti eri shi te eshicigo iyi i'wɛtwɛ nɛ baa nda o, arụhwajɛ ubwa kaa zasa ukwunanga o.

¹⁰Ba nda maa eshilo ngbi na cɛnjɛ, boo lomicingo ntuma.

¹¹Agwatana ubwa bo gombicingo atwa na meme zucinje, ubwa du ba pana atwa na a ta-ụkwụla unyasa.

¹²Ubwa bo ngwuricingo ti'imanganga ta atwa na a nda maa kede iyi elele 'yagana aŋ eshe o.

¹³Ubwa ba ima atwa ti'inta na ti'inta ta aba keeni nu ugondu wa aba, iwɛ maa ge iyi ya aba i kwu kakayɛ.

¹⁴Okwo nu uwaŋna ɛ zhɛ na hamba ofwo gana atwa na zweni ne tishi.

¹⁵Ama Agwatana ubwa tuba bo bicingo miaụŋ-me-e'weteji no tu'wo; boo bicingo atwa na mama zasa ni i'ɛlɛ ya atwa na a nda aŋ iji.

¹⁶Ubwa ba pana okofwo ashɛlatụ, baa nda maa ogworozwo 'imɛ ilɛmɛ.

¹⁷Bụtụ na Agwatana mbiseni ofwo na baa 'inɛ gwoje! Kede ibu gwụmanɛ ti bee bi tezhigeni o.

¹⁸Agwatana ubwa bo umpo andala na bee peteni bụtụ, yaa shɛ baa bụ gwụcɛjɛ, ubwa du zhɛ ma bụ nɛnga.

¹⁹Ubwa zhɛ no bu bicingo nụ ụngwụ tu'ala aka elele.

²⁰Aka imunɛ layɛ, ubwa zhɛ ba nda maa yɛ uraiŋ, ubwa zhɛ ma bu jilanɛ maa kede a bụ kwụnɛ nu utokwobi na aka bu ujasa o.

²¹Agwatana ubwa zhɛ ma bu lashaga na tɛhashɛgana tu n-ndumwa mu unu wa atwa; ubwa kaa du zhɛ mo bu bicingo aka na tu ufwu tɛnda zhajɛ.

²²Gabụ bi zhɛ bu na hinga abwagara ilɛtu keeni imunɛ-tiya, inyɛsɛ isundɛ mazhanga zha shɛ ma bu sha o.

²³Itimɛ nɛ aba hwaŋ zha shɛ ya 'yaga atayɛ o; isundɛ mazhanga kaa zha shɛ ma bụ sukakana kwukwuŋ.

²⁴Ɛbi zhɛ ba nama nu umwono bu na amɛ-olom; ɛbi zhɛ ba kwụba maa i zasa iyi nɛ zhɛ yo tumongono agwụdụ bụ o.

²⁵Ɛbi zhɛ ba 'yaga miaụŋ mi gembi ufwugwo gana ambɛ na a saba ne ehilo.

²⁶Ɛbi zhɛ ba ya uraiŋ uuwa ba inga gana ohiu na asanga aba lemi okwo ta a nɛ.

²⁷O-Job, ti seshi ijɛ ni iyi tusoso duwa. Iwɛ-tɛkana kaa yaa shɛ, bɛ shɛ bo lono iŋ.