Read bassa JOB 6 Bible Online

JOB 6 - bassa bible

JOB 6

¹Go Job jishijɛ, bɛɛ hiɛŋ,

²Yaa shɛ ee ge eri a manga uzhinono ụbaụta mu keeni amɛ-tụhaŋtụ mi ni iyi nɛ aa manga uzhinono iyi,

³u gɛ zhɛ wo zhinono wo hwulo ahwayɛ Urefu; nazhɛ n-ndumwa mu mazhanga mu na Ama duma mu ga zha shɛ ma bu dama o.

⁴Agwatana na Hwuri Kpaaŋ n eŋsetenji na a'inla mangayɛ, mangayɛ ma aba kaa mu mburusonu na tu'waba ti mi. Agwatana ubwa mo n holono.

⁵Aka na izhinyɛci gwushiji ambɛ baa ya, asha inɛ ibwɛ gwumwa bụ; buna du ba nama shiruu tu baa ya ambɛ.

⁶Ama gaaba eri ba ya inyimɛyɛ ulwambɛ, nɛ ee zweni shi manɛɛ? Ụlatụ imbe bụtụ ba hwuga no ofwo ata rɛnjɛ rɛ cɛnjɛmɛɛ?

⁷Iyimɛyɛ gɛnɛ ɛtɛ i n kwụlanɛ shɛ tiya o, iyi elele kaa Ngaa yɛ asha N suji ụngwụ.

⁸Iwembe kwuŋ po Agwatana m peni shi iyi nɛ Ngaa lụpɛɛ? Iwembe po baa jɛshɛjɛ shɛ adua mii?

⁹Iwɛ nɛ yaa kwụlanɛ bụ maa vwacaga u'ala ubwa ne mi maa mo 'wo!

¹⁰Yaa shɛ Ngee nge mepi ga maa bi zhɛ ma n ganga maa mo 'wo, okwo gana elele ta Ama hwuga-ụngwụ, N ngɛ zhɛ ma dwa yebe angapa nu unyasa. N ta lacɛ shɛ kaa iyi nɛ bee m peni-unu ibɛ o.

¹¹Ikɛnyi nɛ kwuŋ Ngaa ta 'yajɛ waŋnɛ maa ma namaa? Ashɛlatụ imbe kwuŋ Ngaa ta 'yajɛ upo Ngaa ta shɛ ma nama waa?

¹²Nu utayɛ suu aa njɛ ukpahiŋ mu? Itumburɛ suu tu'waba ti mi tɛ shɛ?

¹³N zasa ya ikɛnyi nɛ waŋnɛ maa m momo bicingo; N zasa kaa ofwo Ngaa 'yajɛ maa ma zha maa e m mbiyeni o.

¹⁴Yaa shɛ Ngaa namɛ nụ ụbaụta gana ga, asha utakashɛ we eyejilo tɛkana n to, okwo Ngee jineci Agwatana, okwo Ngee jineci shi bu.

¹⁵Ahiɛba eyejilo mi, hi n helekeci, gana busoso na meni mu bwa mu hwɛŋ na aka na eshilo ngbi shi ya.

¹⁶Meni mo busoso ata kaa mu ga fwunga la mee gwuriseni suu.

¹⁷Aka na tu ubwaza hiŋ ya, oholobwo ishijɛ; meni ma ata mu hwɛŋ, busoso ata shiri ya kakarakwụ.

¹⁸Erinji lukwumi urungo meni; oo rungo nụ ụshɛka, i'uyɛ kwụnɛ aŋ.

¹⁹Erinji na banɛ ni Sheba keeni Tomas, a dwalakaka meni,

²⁰ama ashɛlatụ aba shɛ gana busoso bu hwoo.

²¹Gana busoso ata ahiɛ n shanɛ du, hiɛ kwụbɛ tiriri ti mi, ibɛ po inyɛsɛ ihiɛ shɛ ehi gwuri.

²²N hiɛ lụpɛ suu iyi elele, okwo i 'yajɛ suu bụtụ Ngɛɛ hiɛŋ, N tụpajɛ ma iyi tugwube?

²³Kwo kaa N hi hiɛŋ suu, N lesheji ma na atwa i'ime mi kwo kaa na tijama?

²⁴Inɛ gɛ gwumwa ya, m mbisegeni ma, maa hi m mbishi iyi nɛ Ngaa njɛ 'wanjɛ. Nazhɛ Ngɛɛ zhɛ Ma nama saiiŋ maa Ma hiɛ shɛlagana.

²⁵N-ndumwa mu na mi teni cɛŋ ma kapɛshɛngwanụ bụtụ, ama n-ndumwa mu tusashɛ ahi ma n dumangana.

²⁶Yaa shɛ ebi heŋshi maa n-ndumwa mu na Ama duma mɛ shɛ n-ndumwa mu tɛgadaga; asha iwembe po tuba ɛbɛ jishijɛ n-ndumwa mu na mu zasa ulee?

²⁷Bi zhɛ du ba 'waŋ icɛcɛ iwɛ bijama na shɛ bu'weteji maa mama njɛ bɛzhɛgba ne eshe eyejilo bu a tandụ!

²⁸Mbiyana ụpɛshɛka mu. N zha shɛ ma bu dwana-ụzagwụ o.

²⁹Iyi nɛ abu dumanjɛ gwumwa ya. Shikono ne tishiriri. Ta ma m pana n-ndumwa-tụwụma o. N teni cɛŋ.

³⁰Ama bi heŋshi suu maa ụzagwụ Ama dwatwaga? Bi heŋshi suu maa N eri shi ma duma iyi nɛ teni cɛŋ?