Read bassa JOB 7 Bible Online

JOB 7 - bassa bible

JOB 7

¹Uraiŋ butugwumwa ụ shɛ gana bụtụ na ee eni ugondu iji, ijitɛ ibwɛ kaa i shɛ gana bụtụ na leshiji ụgwụ ugondu na 'yajɛ ikɛnyi tɛnda,

²gana bijama na ba jala uhwunu u tusuu; gana bɛnjɛ-bu-ugondu na 'yacɛ maa a cɛpɛ bụ utashɛ ubwa.

³I ci ipiɛnɛ ifwugwo ya tu Ngaa zasa iyi elele; ụngwụ Ama hwuga ụrụmɛ ụrụmɛ.

⁴Aka na Ngee weci maa ma laya malabụ, gana ata aka na kaana gi izhɛ, gana ata Ngoo no momo bitorogo, iyi ma lakana tusugo.

⁵Eshishi zwegeni na tu'waba ti mi, u'waba mu 'yagajɛ akwụrụkpa, andala mi a bananga twamwa.

⁶Ijitɛ mi ya kashɛka, N zasa kaa ashɛlatụ elele o, ya hanɛka wuru wuru uhwuri gana na ukwokworo uhwohwo ụ bɛnɛ-bu-tugwuno,[8] wa nda hwuŋri hwuŋri.

⁷Oo Agwatana, teyinje maa ihwungwɛ mi, ibɛ shɛ uraiŋ mu; unyasa mu hwuwowo cebe.

⁸Tụkwụba tu ganana ahiɛ n kwụbɛ bana, hi zha shɛ hi ma n kwụba ya o, hi zhɛ hi na ma dwalakaka, asha n hwulwo cebe.

⁹Gana na udomu wa wafwagwụ woo hwuwowu, gobwonu du bụtụ bo 'wo umɛwɛɛ, bi zha shɛ kaa be gwure ya o.

¹⁰A zha shɛ a kwụba bụ ya okwo ni ihwɛ ibwɛ o, isɛbwɛ ibwɛ zhɛ yo 'wo atwa na ge mepi bu la.

¹¹Awo! N zha shɛ ma nama saiiŋ o! Amɛ mi hashɛganụ, yaa n gwumanɛ. N shɛ ma dumana iwɛ.

¹²Iwembe kwuŋ po ahi ma 'yaka gana udegbee?

¹³N weci, Ama jala maa ma ta ụhinjanụ; Ama jala du iyi nɛ zhɛ ma n la nụ ụngwụ ga.

¹⁴Ama ahiɛba, hi mo n zwono inyɛsɛ na awalabụ; ohi mo holono no shizobu

¹⁵iwɛ maa ma tala tumama swata uhwuri maa ma nama na tu'waba tu ga ne tiriri.

¹⁶Inɛ gɛ i n gwumwa ya, n lukwumi uraiŋ tiya. N genji ma. Uraiŋ mu tiya zasa ya ule o.

¹⁷Iwembe kwuŋ po bụtụ ubu shanɛ iyi tandụụ? Iwembe po aba pana abashɛ ni iyi nɛ baa ndaa?

¹⁸Gabụ bo hikokono bu uvwungwa uvwungwa; aba manga bụ aka elele.

¹⁹Asha bi zha shɛ ba mbiyana ree taa dụlụ maa ma twala okwo mecemi?

²⁰Gabụ uhiu ga umwono-tishi, iwɛwɛ mi suu i bụ gwụcɛnjɛ? Iwembe po i shɛ maa Gamba abu ngbaracɛ ni iyi elele nɛ Ama ndaa? I'wɛŋnɛ i'wɛtwɛ suu Ngaa bu shanɛ?

²¹Bi eri shi suu bu ma gangana iwɛwɛ mi? Bi eri shi suu bu ma gangana tu'wanga ti mi? I vwɛ cwɛŋ ti Ngɛɛ zhɛ mo tono nu u'uye mu, bi zhɛ bu na ma dwalakaka, asha n hwulwo cebe.