Read bassa JOB 8 Bible Online

JOB 8 - bassa bible

JOB 8

¹Ge Bildad jwɛ unu, bɛɛ biɛŋ,

²Bu kwunanjɛ suu ya n-ndumwa mu ga aba duma gana uvwugo?

³Agwatana kwukwuŋ ubi shi tishiriri; bi genji shi kwukwuŋ iyi nɛ teni cɛŋ tɛnda.

⁴Miaụŋ mụ bụ mɛ njɛ feye Agwatana iwɛwɛ; iwɛbɛ po bee peni aŋ ulwapɛ na teni cɛŋ ni iyi nɛ aa njɛ.

⁵Ama jɛshɛrɛga hwuwayɛ go maa lụpɛ Agwatana na Hwuri Kpaaŋ;

⁶yaa shɛ abɛ shɛ bụtụ bu tugom, abu namɛ kaa rụmbɛɛ, nazhɛ Agwatana zhɛ a zhajɛ maa mo bu mbiyono maa me bu gwuricingeni ihwɛ bu maa i shɛ utashɛ na baa bɛ cɛpɛ.

⁷Iyi nɛ Agwatana zhɛ ma bu pana na aka ata zhɛ yo hwulo inɛɛ nɛ ibu ndanɛ la ufwu.

⁸Mbiyana de maa kwụbɛ ti'inta ta atwa cala, haŋsa iwɛ iwɛ-tɛkana na ogwunukwoshi tu seshi.

⁹Uraiŋ tu namɛ kpendere, i zasa kaa iyi elele eti mepi o, ta hanɛka gana na tu uzhizhi wa hanɛka ofwo.

¹⁰Ama lono maa atwa ti'inta a na namɛ cala e bi mbisegeni iyi, shɛlaga iyi nɛ aa jala tụdụma.

¹¹Eninjidegbe eri shi a waŋna no ofwo na zasa meni o; bi eri shi kaa ba kwụba te e shikekeni no ofwo na shɛ shɛ udapa o.

¹²Yaa shɛ meni mu hwɛŋ, aba shɛ ambɛ na zhɛ o hwotono hiiŋ, asha a ta waŋnɛ shɛ kaa tudwa maa a njɛ uhwara na aba o.

¹³Atwa na zasa Agwatana na shɛmɛ sha aba, a shɛ gana eninjidegbe ata, ashɛlatụ aba o hwuwowu, gunu na ti isɛbwɛ ya Agwatana 'wi aŋ.

¹⁴Iyi nɛ aa patanɛ-rishe zasa iwɛ tubwadụ. Iyi nɛ kaa oo to aba i shɛ gana tudodokwuno ti igɛzu.[9]

¹⁵O to aba no budodokwuno na ba dwa, aa datanɛ budodokwuno na eri shi ba la aŋ.

¹⁶Atwa ci'nyɛ a shɛ gana tu'untwo tu na tu unshɛ nu uwaŋna, gana tu'untwo tu na ti irije ni itimɛ,

¹⁷Tini ta tuba tu na hamba aparatayɛ, tu na twatwagwụ atayɛ ata.

¹⁸Yaa shɛ ebi zebi tu i zasa bụtụ zhɛ ba mapa maa tu ga namba la apata o.

¹⁹Ti nya ti zhɛ tɛ unshɛ nu urubwo ata, gana unyasa wa atwa ci'nyɛ ụ shɛ ta.

²⁰Agwatana kwukwuŋ zha shɛ o jinoko atwa tɛcara; bi zha shɛ kaa du bo mbiyono kwukwuŋ atwa awɛ.

²¹Bi zhɛ ba nda maa hiɛnjɛ ilɛtu keeni maa uganɛ n'ungwa mu unyasa sasana.

²²Ama ubwa zhɛ ba pana atwa na mo bu imo ezuye; nhwaŋ ma atwa tugworozwo kaa mi zhɛ mo ilono.