Read bassa SHƐZUNGA TUZUNGANGANA AGWANGWAMA 10 Bible Online

SHƐZUNGA TUZUNGANGANA AGWANGWAMA 10 - bassa bible

SHƐZUNGA TUZUNGANGANA AGWANGWAMA 10

¹Oo AGWANGWAMA, iwembe po ebi shikeni taa dụlụụ? Iwembe po abu mama intanɛ na aka na atu namɛ nụ ụbaụtaa?

²Ogworozwo a nda unyangana, aa shɛka okofwo; ima aŋ nu ugwuru na aa njɛ ni ikɛnyi aba.

³Ogworozwo a busa iwɛ ukwulana wa aba ụwɛ, bụtụ bu ko tuba bo dundo unu-tukalana, ibɛ po baa lacɛ AGWANGWAMA.

⁴Iwɛ ya AGWANGWAMA te shi ogworozwo. A haŋsa na tumama sata ta aba, ɛɛ hiɛŋ, Agwatana zasaba o.

⁵Iyi elele 'yaganɛ ogworozwo eshe; e eshiciji shi kaa ashɛrɛya bụ o, gabụ kaa ba hinga atwa i'ime bu kpaaŋ ilɛtu ya asada.

⁶A haŋsa na shɛmɛ sha aba, ɛɛ hiɛŋ, I zasa iyi elele nɛ zhɛ mo ti zhingoto, amɛ-tụhaŋtụ kaa zha shɛ mo ti jitono kwukwuŋ.

⁷Aka elele n-ndumwa ma aba mɛ shɛ tutwa, na tuhalakaka keeni ụzagwụ-tudwa. Bụratụ ba aba 'yajɛ izɛlɛgwu na n-ndumwa mi i'ime keeni mu na mụ wɛ tụdụma.

⁸A mama intanɛ na ashɛpwụ, ee gwubeji atwa na zasa tụwụma maa a kwụnɛ aŋ. Eshe aba a 'wa atwa na 'yajɛ usu swɛɛ swɛɛ.

⁹A swacɛ ee gwubeji gana bizeci. E ubegeni ee gwubegeji maa a 'imɛ bukofwo, a ima aŋ nu ugwuru wa aba maa a na mbata aŋ.

¹⁰O ubogono, oo kwuzongo, atwa aba ikɛnyi kaa o idongono atwa na 'yajɛ usu.

¹¹Ugworozwo jɛmɛ na amɛ ubwa, bɛɛ hiɛŋ, Isɛbwɛ 'wi Agwatana! Bu uteji eshe ubwa, bi zha shɛ kaa ma n kwụba kwukwuŋ!

¹²Oo AGWANGWAMA, ishijɛ maa heŋpi u'ala bụ! Oo Agwatana, teyinje iwɛ atwa na a nda ụbaụta.

¹³Iwembe po ugworozwo ngbaracɛ Agwatana cwɛɛŋ? Bɛɛ hiɛŋ na amɛ ubwa maa, Bu zha shɛ kaa mo n hoŋtono.

¹⁴Gabụ kaa bụ kwụbɛ; ebi mepi kaa amɛ-tụhaŋtụ atwa ụbaụta, bu mama 'imɛ kaa aka elele maa mbiyeni aŋ. Ụsụnyasụ meme shiyeni ni i'ɛlɛ bu; gabụ kaa bɛ shɛ bimbiyeni ba miaụŋ-me-e'weteji.

¹⁵Bwarataga aragbamụ ogworozwo keeni atwa na a nda iyi iwɛ. Pana aŋ ulwapɛ iwɛ tugworozwo ta aba, uuwa i ci aka na aa zha shɛ a nda iŋ ya.

¹⁶AGWANGWAMA ubwa shɛ agwuma tutu unyizo-nom; edenji zhɛ a nda hwuŋ ufwu na cɛnjɛ tu bwa.

¹⁷Oo AGWANGWAMA, gabụ bi zhɛ ba hwuga iyi nɛ kwụlanɛ atwa ụbaụta, gabụ kaa bi zhɛ ba kaana aŋ ikɛnyi. Gabụ kaa bi zhɛ ba shɛlaga n'ungwa ma aba.

¹⁸Gabụ bi zhɛ ba mapana atwa na aa nda umungwuta keeni miaụŋ-me-e'weteji iwɛ, nụ ụshɛrɛya aba tụdụma, iwɛ maa kede butugwumwa na bo 'wo njɛ ya iyi ici'nyɛ o.