Read bassa SHƐZUNGA TUZUNGANGANA AGWANGWAMA 102 Bible Online

SHƐZUNGA TUZUNGANGANA AGWANGWAMA 102 - bassa bible

SHƐZUNGA TUZUNGANGANA AGWANGWAMA 102

¹Adua Bụtụ bu ko na aa Pana Ụbaụta, na Aka na te eshe a nda bu Vwuuŋ, na kaa bo Tulonono AGWANGWAMA Uswejinu Ubwa Oo AGWANGWAMA, shɛlaga adua mi, maa kaa hwụjɛ u'wo mu maa m mbiyeni!

²Ta pashɛnga eshe bu no olugwo mi na aka na Ngaa namɛ ne tiriri o, shilo acɛbɛ ni iwe mi; n jishijɛ kakayɛ na aka na Ngaa bu suyanɛ!

³Uraiŋ mu wa kashɛka gana nshikwo mu ulwa; o'umpwo mi kaa o hwoŋno gana ulwa wa apitwa.

⁴Ohwulu ma n nda kpokpokpo, Omo hwotono gana ambɛ hwoo; isɛbwɛ iyimɛyɛ mi tiya i n 'wi ya.

⁵Iwɛnɛ Omo 'nyongo duwa, ibɛ po o'umpwo mi swanɛ na tu'waba ti mi.

⁶N shɛ gana ugwulu ụshɛka,[81] gana uzhikwukwu na ee genji no ofwo na shɛ osombo.

⁷N weci, Ngɛɛ zhinjɛ, Ngaa shɛ gana ụcaarụ na patanɛ no osokwu bwooko gba.

⁸Atwa i'ime mi ma n twagaga uuwa gụ ụrụmɛ, atwa na ma n nda asada kaa a twaga tutwa ni izeci mi.

⁹Ma'alụ muba Ama ya gana iyimɛyɛ, malaba muba mo hiŋtotongwu ne meni mu na Ama swa,

¹⁰iwɛnɛ ta amɛ bụ vwengenji ni isɛbwɛ nɛ aba nda ne mi; gabụ kaa bi n shepi na azuba, ebi n keri na cɛnjɛ.

¹¹Uraiŋ mu shɛ gana uzhizhi ụrụmɛ; N hweteni gana ambɛ.

¹²Oo AGWANGWAMA, gabụ bɛ shɛ agwuma unyizo-nom; awaŋnɛ elele zhɛ ne bi teyinje.

¹³Gabụ bi zhɛ bɛ ishijɛ maa hieci inyɛmɛnyɛmɛ Zayon; aka ci ya maa hieci inyɛmɛnyɛmɛ ibwɛ; aka na ee ge shiri ci ya.

¹⁴Atayɛ ubwa kwụnɛ miaụŋ mụ bụ mu ugondu; upwupwutu ubwa kaa njɛ maa e hieci inyɛmɛnyɛmɛ ibwɛ.

¹⁵Edenji zhɛ a nda inyɛsɛ izeci ya AGWANGWAMA, shɛgwuma shɛ cɛnjɛ tu unyizo kpaaŋ shi zhɛ sha sụma ụjɛrụma ubwa inyɛsɛ.

¹⁶Iwɛnɛ po AGWANGWAMA zhɛ a maanana Zayon, bɛɛ zhɛ kaa ba kapɛshɛnga ụjɛrụma ubwa.

¹⁷Ubwa zhɛ ba hwuga adua atwa ubwa a na ee jineci, bɛɛ zhɛ kaa ba shɛlaga tutabwa ta aba.

¹⁸Ge e 'nyeteni awaŋnɛ na te e ci iyi nɛ AGWANGWAMA nduwa, iwɛ maa atwa na ee te meci shi shɛtana AGWANGWAMA.

¹⁹AGWANGWAMA namɛ no ofwo ubwa tijilo a na zeci, baa mbiyanɛ, tu baa namɛ na azuba ata, baa kwụbɛ cɛnjɛ tu unyizo,

²⁰maa hwuga i'nye nɛ oo 'nyongo, maa kaa tufwurungo atwa ata ee ge tileneni tu'wo;

²¹iwɛ maa ga atwa ata enenji izeci ya AGWANGWAMA nu Zayon, maa a shɛtana bu nu Jɛrusalɛm,

²²na aka na ta atwamwa ụlwatagwụ, keeni cɛnjɛ cɛnjɛ-ta-tugwama maa a zhɛbɛ AGWANGWAMA.

²³AGWANGWAMA legwecenji ikɛnyi mi na aka na tu Ngaa ta waŋnɛ; baa munananɛ urugbo mu.

²⁴Oo Agwatana mi, ta ma n shapa hwuwayɛ tobwolo N ta injɛ shɛ o. Gabụ shiywa shɛ bụ shɛ namɛ unyizo-nom!

²⁵Gabụ kaa bi shiri ukoshilo cɛnjɛ tu unyizo cala cala, gabụ kaa bɛ njɛ azuba ni i'ɛlɛ bu.

²⁶Ɛ zhɛ a inanga eshe, ama gabụ bu namba tutuu; ɛ zhɛ a inga kpaaŋ aba gana utogwo. Gabụ bi zhɛ bo sheyingongo aŋ gana na bụtụ bo sheyingo tugwuno, ɛ zhɛ kaa a kashɛka;

²⁷ama bu namɛ gana ala abu namɛ, shiywa shɛ bụ kaa shɛ zasa uce o.

²⁸Miaụŋ ma ajama bụ mi zhɛ ma nama lapiya; ajalalo aba kaa zhɛ o shikonono nu umbe bu dimi.