Read bassa SHƐZUNGA TUZUNGANGANA AGWANGWAMA 104 Bible Online

SHƐZUNGA TUZUNGANGANA AGWANGWAMA 104 - bassa bible

SHƐZUNGA TUZUNGANGANA AGWANGWAMA 104

¹Oo N zhɛ mo Zhemonjino AGWANGWAMA no Ohwulu mi Kpaaŋ Oo N zhɛ mo zhemonjino AGWANGWAMA no ohwulu mi kpaaŋ! Oo AGWANGWAMA Agwatana mi, gabụ bi gembi duwa! Gabụ kaa bu urigeni ụjɛrụma keeni igɛhi,

²gabụ bu meme urigeni uhioko-uhwaŋna gana utogwo, gabụ kaa bu berishiji azuba gana umwono-tugwuno,

³obu mo ihwɛ bu na azuba meni mu ufwugwo. Gabụ bɛ njɛ odomu gana ihɛŋtu ujasa, aba suka kaa apiambɛ uvwugo.

⁴Gabụ bɛ njɛ maa uvwugo ụ shɛ atumwa bu, maa ge ezezeji ɛbɛrɛ a shɛ miaụŋ mụ bụ mu ugondu.

⁵Gabụ bi shikicinji cɛnjɛ tu unyizo dimi no okoshilo tuba, iwɛ maa kede tɛ njɛ bulama o.

⁶Gabụ bu urigeni tu ne me'ilwo gana utogwo; meni mi sheji na azuba nshama.

⁷Evwuri bu upo mee gezhiji, mụ hwụjɛ rundu ru uto bu, maa njɛ kakayɛ mee hwuri.

⁸Mụ fwụnjɛ ni ihiŋhiŋ nshama mee zwi no olomu, no ofwo na abɛ njɛ iwɛ muba.

⁹Gabụ bi shileni mu ogwungwu iwɛ maa kede mi eri tɛkashɛka o, iwɛ maa kede mu urigeni cɛnjɛ tu unyizo sasana o.

¹⁰Gabụ bɛ njɛ maa ga mbila mu na fwunga no olomu, ma fwunga na ashashɛ nshama,

¹¹maa pana isundɛ ehilo ye elele meni maa i swe; ibɛ po ogburudu o hiŋcingo i'uyɛ ya aba.

¹²Shanụnụ sha ta tuhwurugwo ni i'wɛ'wɛ nɛ dongonu mu; shaa zunga azunga na shɛ'walụ shi ibɛ.

¹³Gabụ bu tumwananɛ nshama eshilo na banɛ na tụla, ibɛ po tụ'walụ tu ugondu bu ti shini cɛnjɛ tu unyizo.

¹⁴Gabụ bɛ njɛ maa ga ambɛ unshɛ iwɛ iyimabiga, keeni tububa iwɛ maa bụtụ no vwolo, iwɛ maa bɛcinjɛ iyimɛyɛ na cɛnjɛ,

¹⁵keeni meni ma afwafwa maa u'waba hiɛ bụ ti bee swe mu, na manɛbɛ, maa ụpɛshɛka ubwa na ta, keeni iyimɛyɛ maa i peni bu ikɛnyi.

¹⁶Eshilo ngbeni i'wɛ'wɛ yo osobu nɛ namɛ nu uwapa Lebanon tebiye, ibɛ shɛ i'wɛ'wɛ ya AGWANGWAMA nɛ baa bɛrɛ ni ikɛnyi ibwɛ.

¹⁷Ni ibɛ shanụnụ sha ta tuhwurugwo; ni i'wɛ'wɛ ɛtɛ ya agwugwa, ibɛ agbaanjɛ a ta tuhwurugwo ta aba.

¹⁸Tilegbe tɛ shɛ ofwo na shɛkarubana sha nama; aparatayɛ aba shɛ ofwo na ɛgwumbɛ a swaka.

¹⁹Gabụ bu karɛ upiana iwɛ ti'imanga ta aka; uwaŋna kaa mepi aka tutono tu bwa.

²⁰Gabụ bɛ njɛ ụjita, ne tishi kaa isundɛ ye ehilo nɛ namɛ nu uwapa kpaaŋ ya bananjɛ.

²¹Miaụŋ mi izeci mo ngwulo iwɛ iyi nɛ maa aa kwụnɛ a yɛ, a jalakaka iyimɛyɛ ya aba nɛ ɛbi zhɛ ba pana aŋ.

²²Aka na tu uwaŋna banɛ, o gwulo o wotogo na a'ibwa aba.

²³Nazhɛ atwa tuba a bana a zha nu ugondu wa aba, a uranga ugondu wa aba tɛnda tutu ụrụmɛ.

²⁴Oo AGWANGWAMA, gabụ bɛ njɛ iyi nɛ gembi ufwugwo tebiye! Na ti'inta tụ bụ tụ 'wụtụ kaa abɛ njɛ iŋ hwɛɛ! Iyi nɛ abu karɛ shini cɛnjɛ tu unyizo.

²⁵Itekwu i'wɛtwɛ, nɛ gembi nɛ kaa heri namba, apata iyi-uumwa nɛ hwuleji tɛrɛta zweni, ti nɛ i'wɛtwɛ 'wɛtwɛ, ti nɛ gwụmwatangwụ.

²⁶Apata ihɛŋtu i tinyakpa nyakpa ya kashaka, keeni buduwo ata abɛ njɛ maa bu na nanga tụlagwụ na amɛ ubwa.

²⁷Gabụ ijɛ kpaaŋ ngbarakacɛ maa peni aŋ iyimɛyɛ ya aba na aka na ukekeshi to aŋ.

²⁸Aka na ebi peni aŋ, ɛ zhɛ a ya iŋ; aka na ebi peni aŋ iyimɛyɛ bu, ɛ zhɛ o shigogo.

²⁹Aka na ebi genji aŋ, ɛ zhɛ a nda inyɛsɛ; yaa shɛ kaa abu vwɛ ihwungwɛ ya aba, ɛ zhɛ o 'wo, o gwulo nu upwupwutu na aa ga banɛ la.

³⁰Aka na ebu hwulupeni aŋ mpiala[83] mụ bụ, nazhɛ aa 'yajɛ uraiŋ, ibɛ po abu ndaananɛ cɛnjɛ taa shɛ tu ufwo.

³¹Ga ụjɛrụma wa AGWANGWAMA nama unyizo-nom, ga amɛ AGWANGWAMA lemi nu ugondu we elele na baa njɛ!

³²Ubwa mbiyanɛ cɛnjɛ tu unyizo, ibɛ po taa zhɛgɛda, bee timengeni nshama, maa bana nshikwo.

³³N zhɛ ma zungangana AGWANGWAMA azunga tutu ụjita tu'wo ti mi; N zhɛ ma shɛtana Agwatana mi na azunga gana na tu Ngaa ta hwungwa.

³⁴Ga aza mi tɛta lemicinji bu amɛ, iwɛnɛ ta Ama bwada unyasa na amɛ AGWANGWAMA.

³⁵Ga atwa iwɛwɛ ileni na cɛnjɛ tu unyizo, maa kede ogworozwo nama ya o! Oo N zhɛ mo zhemonjino AGWANGWAMA no Ohwulu mi Kpaaŋ! Shɛtana ma AGWANGWAMA!