Read bassa SHƐZUNGA TUZUNGANGANA AGWANGWAMA 109 Bible Online

SHƐZUNGA TUZUNGANGANA AGWANGWAMA 109 - bassa bible

SHƐZUNGA TUZUNGANGANA AGWANGWAMA 109

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA Oo Agwatana na Ama zhɛba, ta nama shiruu o!

²Ogworozwo keeni ehelekeci n kapɛshɛnganɛ onu aba, aa kabagana atwa ụzagwụ iwe mi.

³A dumanga iyi iwɛ iwe mi, ma n kapangana uzawa ecilo.

⁴O mo n imo okwo to Omo lubo aŋ, Ama nda kaa du adua iwɛ aba.[88]

⁵A ma n tụpana iyi iwɛ iwɛ iyi ibiye nɛ Ama nda, n to kaa ni i'ime iwɛ tulubo tu na Omo lubo atwa.

⁶Tala atwa na tenengenji ụdamụ maa a jɛmɛ ụshɛrɛya bụtụ bi i'ime mi, ga atwa i'ime ibwɛ shananganɛ bụ iwɛ.[89]

⁷Aka na ta a jɛmɛ ụshɛrɛya ubwa, ge peni bu n-ndumwa-tụwụma, ga adua ubwa a shɛ iwɛwɛ!

⁸Kede uraiŋ ubwa ilogogo; ga binya bụtụ leshiji ajɛjɛ ugondu ubwa!

⁹Ga miaụŋ mu bwa mɛ shɛ e'weteji, ge biyikwo bwa shɛ bululo!

¹⁰Ga miaụŋ mu bwa mụ vwụnjɛ ihwɛ maa mu na lụpa iyi; ge e unzhi aŋ maa e beni no osombo ihwɛ ya aba![90]

¹¹Ga bụtụ na boo so nu ukwuribi ubwa leshiji iyi elele nɛ baa 'yajɛ; ga agaiŋ cwi tụ'walụ ti iyi nɛ baa hwɛŋ!

¹²Kede ba 'yaga bụtụ be elele na zhɛ ba mapana bu iwɛ kwukwuŋ, kwo kaa bụtụ na zhɛ bo hioko inyɛmɛnyɛmɛ ye e'weteji na baa 'wɛŋ ne ekwunyi ubwa o!

¹³Ga ajalalo ubwa 'wi hwɛɛ; ga uwaŋnɛ na 'wa aŋ 'wericinji nzeci ma aba!

¹⁴Ge e ne teyinje iyi iwɛ ye eshi ubwa nu umbe AGWANGWAMA, kede e 'wericinji kaa iwɛwɛ bino bwa o!

¹⁵Ga AGWANGWAMA ne teyinje iwɛwɛ ya aba aka elele; ama kede e teyinje iwɛ aba[91] ni ikɛnyi aba na cɛnjɛ tu unyizo!

¹⁶Bụtụ ata heŋshi shi iwɛ iwɛ-tumapana bụtụ kwukwuŋ; ama ba shɛka okofwo, na atwa na zasa iyi keeni atwa na shɛmɛ sha aba shi hwuwowu tɛhashaganụ maa kwụna aŋ.

¹⁷Bu lubi atwa unu-tukalana; go unu-tukalana 'imɛ bụ du! Bi jeri shi maa pana atwa uwɛbiye o; kede uwɛbiye temi bu du o!

¹⁸Bi meme urigeni unu-tukalana gana idikɛ, ga u ileji na tu'waba tu bwa gana meni, maa u tenenji no o'umpwo ubwa gana manɛbɛ!

¹⁹Ga ụ shɛ gana utogwo na bee meme kwungwuri nu bwa, maa u no umpo bu aka elele gana umazhɛya!

²⁰AGWANGWAMA, pana atwa na ma n shanangana iwɛ ulwapɛ, aba shɛ atwa ata na ma n dumangana iyi iwɛ!

²¹Ama gabụ AGWANGWAMA na shɛ Agwatana mi, m mbiyeni gana na te ebi shiri-unu, maa n leshiji iwɛ ụzhɛ tulubo tụ bụ ti tikpeke!

²²N shɛ bukofwo keeni bụtụ na zasa iyi, a n gwụcɛnjɛ taa tuta ta amɛ mi.

²³N koshikwo gana uzhizhi uwaŋna-ụrụmɛ; a ma n lubinga gana na uvworo wa lubinga iyi.

²⁴Shilulo shi mi shi lwegeji ne ezumi tɛnda, tu'waba ti mi tɛ 'nyɛ tu zasa ya usunda o.

²⁵N shanɛ atwa na ma n shanangana iwɛ iyi tutwa; aka na aa n kwụbɛ, o no zhingoto ohiuhiu aba.

²⁶Oo AGWANGWAMA na shɛ Agwatana mi, m mbiyeni! M bicinji iwɛ tulubo ta ata tụ bụ ti tikpeke!

²⁷Oo AGWANGWAMA, nda maa ga atwa i'ime mi mepi maa gabụ bu mo m bicingo!

²⁸A ma n kalana-unu, ama gabụ tuba bu ma m pana-uwebiye! Ge ezuye shɛ atwa na ma n shɛka; maa Gamba yɛu gɛ bu ugondu mu na nda tuba unyasa!

²⁹Ga ụpụrụsa urigeni atwa na ma n shanangana iwɛ gana tugwuno; ge ezuye kwungwuri aŋ gana utogwo!

³⁰Nu unu mu Ngɛɛ zhɛ ma nda ugwoje wa AGWANGWAMA duwa duwa; N zhɛ kaa ma shɛtana bu na ashashɛ unyama wa atwa ufwugwo.

³¹Ubwa ba lashaga bukofwo maa bicingo bu ni i'ɛlɛ ya atwa na a pana bụ n-ndumwa-tụwụma no tu'wo.