Read bassa SHƐZUNGA TUZUNGANGANA AGWANGWAMA 112 Bible Online

SHƐZUNGA TUZUNGANGANA AGWANGWAMA 112 - bassa bible

SHƐZUNGA TUZUNGANGANA AGWANGWAMA 112

¹Shɛtana ma AGWANGWAMA. Bụtụ na ba sụma AGWANGWAMA inyɛsɛ gwoje, ubwa shɛ bụtụ na ba nda unyasa no onu ubwa tụpana!

²Ajalalo bụtụ ata zhɛ a 'yaga ukpahiŋ na cɛnjɛ ta ata; ɛ zhɛ a pana bụtụ na shikeni ririri uwebiye.

³Iyi ti'yaga keeni uduciya zhɛ yo zwono nu umwono ubwa; tiririri tu bwa kaa ti zhɛ to shikono unyizo-nom.

⁴Uhioko-uhwaŋna wa ta ne tishi iwɛ bụtụ na shikeni ririri;[95] iwɛ atwa na o hioko inyɛmɛnyɛmɛ ya atwa, a na mepi iwɛ, a na namɛ ririri.

⁵I zhɛ ya zhɛmana bụtụ na ba unanga bụtụ iyi na amɛ oko, na kaa ba nda ugondu ubwa na tɛkana.

⁶A zha shɛ a nda bụtụ bi tiririri bulama kwukwuŋ; ɛ zhɛ kaa e teyinje bu unyizo-nom.

⁷Bɛ njɛ shɛ inyɛsɛ ya anabarɛ awɛ a na ba hwuga o; rishe ru bwa tɛtɛtana kaa ri shikeni dimi, iwɛnɛ baa patanɛ AGWANGWAMA rishe.

⁸Ohwulu herikeni shi bu, bɛ njɛ shɛ kaa inyɛsɛ o, ba ngbaraka maa kwụba tɛ ɛ zhɛ a lasatagwụ atwa i'ime ibwɛ.

⁹Baa pana okofwo iyi arahaŋ kwakwa; iwɛ-tumapa ubwa kaa kwu su kwukwuŋ, bi zhɛ ba 'yaga ukpahiŋ, ɛɛ zhɛ kaa a muna bụ ụjɛrụma.

¹⁰Ogworozwo zhɛ a kwụba iŋ, ɛɛ zhɛ a nda isɛbwɛ; ɛ zhɛ a ya ene, a zha shɛ kaa a nama ya; ashɛlatụ aba kaa zhɛ a ina mbowuu.