Read bassa SHƐZUNGA TUZUNGANGANA AGWANGWAMA 116 Bible Online

SHƐZUNGA TUZUNGANGANA AGWANGWAMA 116 - bassa bible

SHƐZUNGA TUZUNGANGANA AGWANGWAMA 116

¹Mo lubo AGWANGWAMA iwɛnɛ tu baa hwụjɛ rụhwụŋ ru tutabwa ti mi kpaaŋ.

²Iwɛnɛ ti bee zhire acɛbɛ ubwa pi mi, iwɛbɛ po Ngɛɛ zhɛ mu na suyana bụ tutu tu'wo ti mi.

³Ihwehwe tu'wo i m peleji hwɛɛ; ụngwụ-tuhwuga we e'uye kaa u n untanganɛ dimi dimi; Ma kwụba ụbaụta keeni tiriri.

⁴Nazhɛ Ngaa suyanɛ AGWANGWAMA, Ngɛɛ hiɛŋ, Oo AGWANGWAMA, Ma bu tabwa, m bicinji!

⁵AGWANGWAMA 'yajɛ tulubo ti biye keeni tiririri, Agwatana tu kaa o hioko inyɛmɛnyɛmɛ bụtụ.

⁶AGWANGWAMA ubwa ba jilanɛ atwa na mama zasa; aka Ngaa namɛ na mazhanga, ubwa mo m bicingo.

⁷Oo ohwulu mi, gwure no ofwo ụhinjanụ bụ; iwɛnɛ ta AGWANGWAMA ubu zhɛmwanua.

⁸AGWANGWAMA ubwa m bicinji no tu'wo; maa kede eshe mi banɛ malaba o, maa kede ɛvwɛvwɛjɛ mi kaa twa udukwutwa o.

⁹Gabata Ama zha tahaŋnụ nu umbe AGWANGWAMA, na cɛnjɛ ta atwa na a ya uraiŋ.

¹⁰Okwo aka na Ngɛɛ hiɛŋ, A n kwụkwụtanganɛ hwɛ hwɛɛ mu, N untanganɛ kaa rishe ri mi tɛtɛtana dimi,

¹¹okwo aka na tu Ngaa jɛmɛ ni inyɛsɛ mi, Ngɛɛ hiɛŋ, I zasa bụtụ be elele na shɛ aa patana-rishe o.

¹²Imbe kwuŋ Ngɛɛ zhɛ ma pana AGWANGWAMA iwɛ iyi ibiye ye elele nɛ baa n ndanɛɛ?

¹³N zhɛ ma 'wananɛ AGWANGWAMA upwaŋ meni ma afwafwa, maa ma 'walụ bụ iwɛnɛ bee m bicinji.

¹⁴N zhɛ ma tụpa AGWANGWAMA unu na Ngee shileni bu ne eshe atwa ubwa kpaaŋ.

¹⁵Tu'wo ta atwa na patanɛ AGWANGWAMA rishe, ta gwumana bụ tebiye.

¹⁶AGWANGWAMA, yɛu-ugondu bu Ngaa shɛ, Ma bu ndana iyi gana na bino mi njɛ la gom. Gabụ kaa bu m bicinji no tu'wo.

¹⁷N zhɛ ma bu pana ụrụpɛ ugwoje tɛnda, maa Ma nda adua ni izeci bu.

¹⁸N zhɛ ma tụpa AGWANGWAMA unu na Ngee shileji, ne eshe atwa ubwa kpaaŋ,

¹⁹no ohwolu bu tijilo nu Jɛrusalɛm. Shɛtana ma AGWANGWAMA!