Read bassa SHƐZUNGA TUZUNGANGANA AGWANGWAMA 119 Bible Online

SHƐZUNGA TUZUNGANGANA AGWANGWAMA 119 - bassa bible

SHƐZUNGA TUZUNGANGANA AGWANGWAMA 119

¹Atwa na araiŋ aba namɛ shɛshɛshɛ, anaa na kaa a 'wa undwa wa AGWANGWAMA te teni cɛŋ gwoje.

²Atwa na a untangana onu ubwa tụpana, anaa na kaa a hwuga-unu ubwa na shɛmɛ sha aba tutu uce gwoje.

³Anaa na a 'wanjɛ shɛ kwukwuŋ, ama a zha tahaŋnụ ni ihwɛŋnɛ ya AGWANGWAMA!

⁴Oo AGWANGWAMA, gabụ bi ti peni andwa bụ, ebi ti peni-unu maa tu na hwuga-unu wa aba na tɛcara.

⁵Oo maa ihwɛŋnɛ mi shikono kpeke, iwɛnɛ Ama untangana shikpogo shɛ bụ!

⁶Yaa shɛ Ama untangana onu bu tụpana kpaaŋ, asha ezuye zha shɛ ma n sha ya o.

⁷Aka na Ngee seshi ashɛrɛya bụ tiririri, N zhɛ ma bu shɛtana na amɛ tụrụmbɛɛ.

⁸N zhɛ mo shiyono andwa bụ eshe. Aya, to mo jinoko kwukwuŋ!

⁹Gana naa yɛu tisemberi eri ya untangana uhwaŋna ubwa maa u nama rụmbɛɛ? Semi tedure na tu'untangana to onu bu tụpana.

¹⁰Ma makana maa ma bu ndana iyi na amɛ mi hwɛɛ; n untangana maa kede ma ganga unu wa andwa bu tuhwuga o.

¹¹N untanganɛ n-ndumwa mụ bụ na amɛ mi; iwɛ maa kede ma bu nda iwɛwɛ o.

¹²Oo AGWANGWAMA, Ma bu shɛtana; m mbisegeni ihwɛŋnɛ bu!

¹³N zhɛ ma uranga andwa na banɛ nu unu bu kpaaŋ tu'ananga.

¹⁴Ma nda unyasa na tu'wa to onu bu tụpana, e hwuri uduciya ụ'wụtụ ti'yaga.

¹⁵Ma ta aza iwɛ tusokokono tụ bụ; eshe mi kaa a ngbaraka imbisegeni bu.

¹⁶Ma nda unyasa no shikpogo shɛ bụ; isɛbwɛ yo onu bu tụpana kaa zha shɛ mo n 'wo.

¹⁷Na ma nda tebiye, Gamba yɛu gɛ bu ugondu, iwɛ maa Ma ya uraiŋ maa Ma hwuga-unu n-ndumwa mụ bụ.

¹⁸Kapɛshɛnga eshe mi, maa Ma kwụba iyi i'wɛtwɛ nɛ zweni nu undwa bụ.

¹⁹Bulashɛ Ngaa shɛ na cɛnjɛ tu unyizo; ta ma swakana onu bu tụpana o!

²⁰Amɛ mi o hwoŋno aka elele na tijalakaka maa Ma mapa ashɛrɛya bu kpaaŋ.

²¹Gabụ ba tazhɛgana anjɛ unyangana, unu-tukalana kaa patanɛ atwa na o worungo onu bu tụpana.

²²N leshiji na tutwa keeni tusumono ta aba; iwɛnɛ ta Ama untangana andwa bụ.

²³Okwo ehiu gɛgajɛ aa ma n haŋsagana iyi iwɛ, ama yɛu gɛ bu ugondu kaa yo shiyono ahaŋsa ubwa no shikpogo shɛ bụ.

²⁴Tusokokono tụ bụ kaa tu ma m pana unyasa, tuba kaa tu ma m pana ahaŋsa.

²⁵N wetiteni upwupwutu mɛkɛɛ; n ishicinjɛ gana na te ebi shiri la unu!

²⁶N jɛmɛ iyi elele nɛ Ngaa njɛ, ɛbi n jishijɛ kaa; m mbisegeni ihwɛŋnɛ bu!

²⁷M mbiyeni maa Me eshicigo andwa bụ; maa Mu na ta aza iwɛ ugondu bu ụ'wụtụ 'wụtụ.

²⁸Amɛ-tụhaŋtụ nicinji ohwulu mi hwɛɛ; m peni ikɛnyi gana na te ebi shiri la unu!

²⁹Na ma untangana maa kede Mo dulo uhwaŋna na 'wanjɛ o; hioko inyɛmɛnyɛmɛ mi maa m mbisegeni undwa bụ!

³⁰N teri uhwaŋna unu-tuhwuga, Ngee shikicinji kaa andwa ashɛrɛya bụ nu umbe mu.

³¹Oo AGWANGWAMA, N 'wawa tusokokono tụ bụ, to lono maa ezuye n shɛ ya o!

³²Ma hwungwatangwụ na tu'wa to onu bu tụpana; iwɛnɛ ɛbi zhɛ bu ma n kaana ti'eshicigono!

³³Oo AGWANGWAMA, m mbisegeni ecilo andwa bụ; maa Ma untangana aŋ tutu uce.

³⁴N eshicigeni, iwɛ maa Ma untangana undwa bụ; maa Mo shiyono uŋ eshe na amɛ mi kpaaŋ.

³⁵N njɛ maa Ma untangana onu bu tụpana; iwɛnɛ po aba ma m pana amɛ-olom.

³⁶M peni tukwulana tu unu wa andwa bụ tuhwuga; uhwuri bɛzhɛgba tisha!

³⁷Pashɛnga eshe mi na tungbaraka ti iyi tisashɛ; maa kaa m peni uraiŋ ni ihwɛŋnɛ bu.

³⁸N shikicingeni unu-tishilo bu dimi, Gamba yɛu gɛ bu ugondu; unaa na ụ shɛ iwɛ atwa na ma bu sụma inyɛsɛ.

³⁹Pashɛnga tutwa tu na Ama nda inyɛsɛ u tuba nu uhiuhiu mu; iwɛnɛ ta andwa ashɛrɛya bụ zhɛmɛ tebiye!

⁴⁰Hioko, Ma jala maa mu na hwuga-unu na ebu m peni; m peni uraiŋ ufwo ne tiririri tụ bụ!

⁴¹Oo AGWANGWAMA, m mbiseni gana na tulubo tụ bụ ti tikpeke tu namɛ ne mi; m bicinji nu gana na te ebi shiri-unu;

⁴²nazhɛ Ngɛɛ zhɛ mɛ jishijɛ atwa na ma n twagaga, iwɛnɛ tu Ngaa tɛtanɛ n-ndumwa mụ bụ rishe.

⁴³Ga n-ndumwa ma ata mu tɛkana mu na nama nu unu mu aka elele; iwɛnɛ Ama nda ashɛlatụ ashɛrɛya bụ.

⁴⁴N zhɛ ma uranga undwa bụ tu'untangana, uuwa unyizo zhe gwure;

⁴⁵N zhɛ ma ya uraiŋ na tumama 'yaga tu na tu ulwa kpaaŋ; iwɛnɛ Ama hwuga-unu imbisegeni bu.

⁴⁶N zhɛ kaa ma anangana shɛgwuma onu bu tụpana; N zha shɛ kaa ma nda ezuye o.

⁴⁷Iwɛnɛ po N to amɛ-olom ugbe no onu bu tụpana; anaa na Omo lubo.

⁴⁸Ma muna onu bu tụpana ụjɛrụma, Omo lubo aŋ kaa, N zhɛ kaa mu na ta aza shikpogo shɛ bụ.

⁴⁹Teyinje unu na ebi n shileni la, Gamba yɛu gɛ bu ugondu; unaa na abɛ njɛ maa Ma shɛlana.

⁵⁰Inɛ ɛtɛ ibɛ ma n ingatanga nụ ụbaụta mu; iwɛnɛ tu unu bu tụpana ma m pana uraiŋ.

⁵¹Anjɛ unyangana ma n nda asada aka elele; ama kaa N vwụrɛ shɛ maa Ma ganga undwa bụ o.

⁵²Oo AGWANGWAMA, aka na Ngee teyinje andwa ashɛrɛya bụ angwụshɛ; aba ma n ingatanga.

⁵³Aka na Ngaa kwụbɛ to ogworozwo a bwada-undwa bụ; isɛbwɛ yo shino amɛ mi.

⁵⁴Shikpogo shɛ bụ shɛ ba shɛ shɛ shɛzunga shi mi; no turungo ti mi tu unyizo ga.

⁵⁵Oo AGWANGWAMA, me bi teyinje nụ ụjita, Ama haŋsa kaa iwɛ undwa bụ.

⁵⁶N to amɛ-olom mi ugbe, iwɛnɛ Ama untangana onu bu tụpana.

⁵⁷Oo AGWANGWAMA, gabụ kiri Ama jala; N shiri-unu maa Ma untangana n-ndumwa mụ bụ kpaaŋ.

⁵⁸Ma bụ lụpa na amɛ mi hwɛɛ, maa hieci inyɛmɛnyɛmɛ mi, nu gana na te ebi shiri la unu!

⁵⁹Aka na Ama haŋsa iwɛ ihwɛŋnɛ bu, Ibɛ po Ngɛɛ mɛmɛ nyingicinjɛ maa Ma 'wa tusokokono tụ bụ.

⁶⁰Ma nda izɛlɛgwu uzawa ti'insu maa Ma untangana onu bu tụpana.

⁶¹Okwo to ogworozwo e m biteni modugwulo; isɛbwɛ undwa bụ kaa i n 'wi shi o.

⁶²Mɛ zhinjɛ nụ ụjita tudwonu maa Ma bụ shɛtana; iwɛnɛ ta andwa ashɛrɛya bụ namɛ ririri.

⁶³N shɛ biyejilo ba atwa elele na ma bụ sụma inyɛsɛ; aba shɛ atwa na a untangana imbisegeni bu.

⁶⁴Oo AGWANGWAMA, tulubo tụ bụ ti tikpeke ti shini cɛnjɛ tu unyizo ga; m mbisegeni shikpogo shɛ bụ!

⁶⁵Oo AGWANGWAMA, gabụ ba untangana unu bu tishilo; abu ma n nda kaa tebiye, Gamba yɛu gɛ bu ugondu.

⁶⁶M mbisegeni ashɛrɛya bụ ebiye tụdụma keeni iyi-tumapa; iwɛnɛ Ngaa tɛtanɛ onu bu tụpana rishe.

⁶⁷Iwɛnɛ Ama shana Ama inanga; ibɛ po ebi m peni ulwapɛ, ama Ma hwuga ya unu n-ndumwa mụ bụ hwuwayɛ.

⁶⁸Gabụ bɛ zhɛmɛ tebiye, ebi mepi kaa iwɛ tebiye; m mbisegeni shikpogo shɛ bụ.

⁶⁹Anjɛ unyangana a kaba ụzagwụ nu uhiuhiu mu, ama Ma untangana kaa imbisegeni bu na amɛ mi kpaaŋ.

⁷⁰E eshiciji shi iwɛ tugwumana na shɛmɛ sha aba o, ama Ma nda unyasa nu undwa bụ.

⁷¹Ulwapɛ mu u n zhɛmanɛ, iwɛ maa Mo soso shikpogo shɛ bụ.

⁷²Undwa na banɛ nu unu bu u n zhɛmanɛ; woo hwuri ukwuribi we elele na namɛ nu unyizo ga kpaaŋ.

⁷³Gabụ bu n karɛ, gabụ kaa bu ma ngbaraka; m peni iyi ti'eshicigo, iwɛ maa Mo soso andwa bụ.

⁷⁴Atwa ata ma bu sụma inyɛsɛ, ɛ zhɛ a nda unyasa na aka na ta n kwụbɛ, iwɛnɛ Ngaa patanɛ unu-tishilo bu rishe.

⁷⁵Oo AGWANGWAMA, M mepi maa ashɛrɛya bụ teni cɛŋ; abu ma m pana ulwapɛ iwɛnɛ abɛ shɛ bụtụ bɛ tɛcara.

⁷⁶Go tulubo tụ bụ ti tikpeke tu n ingatanjɛ; nu gana na ebi n shileni-unu, Gamba yɛu gɛ bu ugondu.

⁷⁷Hioko inyɛmɛnyɛmɛ mi, maa Ma ya uraiŋ; iwɛnɛ ta Ama nda unyasa nu undwa bụ.

⁷⁸Ge ezuye shɛ anjɛ unyangana, iwɛnɛ a ma m patana iwɛ alaacɛ; yaa shɛ inee mi, N zhɛ mu na ta aza imbisegeni bu.

⁷⁹Ga atwa na ma bu sụma inyɛsɛ gwure no ofwo mi; iwɛ maa e mepi onu bu tụpana kpaaŋ aba.

⁸⁰To lono maa amɛ mi 'yaga tụwụma no shikpogo shɛ bụ, iwɛ maa kede ezuye n shɛ o!

⁸¹AGWANGWAMA, N lukwumi na ashɛlatụ iwɛ maa m bicinji; n-ndumwa mụ bụ kaa Ngaa patanɛ-rishe.

⁸²Eshe mi lukwumi na ti'yaka ti iyi nɛ ebi shiri-unu ibɛ; aka na Ngee heŋteni, Ngɛɛ hiɛŋ, Aka na kwuŋ ɛbi zhɛ bu ma n ingatangaa?

⁸³N shɛ ya gana ututu meni ma afwafwa na zasa ya uhwara ee keri; ama kaa isɛbwɛ onu bu tụpana i n 'wi shi o.

⁸⁴Uuwa i ci ụkwụmbwụ naa, yaa shɛ tilɛɛ maa Ma bụ shɛlanaa? Aka naa ɛbi zhɛ ba pana atwa na ma n shɛka ulwapɛɛ?

⁸⁵Aba shɛ atwa ata unyangana, a na a 'wa sụ undwa bụ; e hini ashapa maa Ma laya.

⁸⁶Onu bu tụpana a shɛ iwɛ-tɛkana kpaaŋ, m mbiyeni we atwa na ma n shɛka alaacɛ!

⁸⁷I vwɛ cwɛŋ maa a n kwụnɛ na cɛnjɛ tu unyizo ga; ama N jineci shi kaa imbisegeni bu o.

⁸⁸Untangana uraiŋ mu tedure no tulubo tụ bụ ti tikpeke; iwɛ maa Ma untangana andwa bụ.

⁸⁹Oo AGWANGWAMA, n-ndumwa mụ bụ mi shikeni dimi na azuba unyizo-nom.

⁹⁰Tɛcara tụ bụ kaa tu namɛ na awaŋnɛ elele. Gabụ bi shikicinji cɛnjɛ tu unyizo upo tee shikeni ga dimi.

⁹¹Tedure nu unu bu tụpana ibɛ po iyi elele te shikeni taa hwayɛ; iwɛnɛ ti iyi elele kpaaŋ i shɛ miaụŋ mụ bụ mu ugondu.

⁹²Yaa shɛ shɛ iwɛnɛ tu undwa bụ shɛ ucilo unyasa mu; aga sha N uwo nụ ụbaụta mu.

⁹³N zha shɛ ma kala imbisegeni bu kwukwuŋ; iwɛnɛ po tedure ni ibɛ ebi m peni uraiŋ.

⁹⁴Inɛɛ bu Ngaa shɛ; m bicinji; iwɛnɛ tu Ngoo jolokwokwo imbisegeni bu.

⁹⁵Ogworozwo gwubeji maa a n kwụnɛ; ama Ma ta aza andwa bụ.

⁹⁶N kwụbwa maa iyi elele 'yajɛ uce; ama unu bu tụpana zasa ogwungwu o.

⁹⁷Oo hioko gana na Omo lubo undwa bụ! Ubwa shɛ aza mi tuta tutu ụrụmɛ.

⁹⁸Unu bu tụpana namɛ ne mi aka elele; ubwa ma n nda maa Ma inta mo hwulo atwa i'ime mi.

⁹⁹N eshiciji iyi Ngee hwuri embisegeni mi kpaaŋ; iwɛnɛ Ama ta aza tusokokono tụ bụ.

¹⁰⁰N incɛ Ngee hwuri n-nyarɛ, iwɛnɛ Ama untangana imbisegeni bu.

¹⁰¹Ma bacɛnga ɛvwɛvwɛjɛ mi nu uhwaŋna iyi iwɛ ye elele, iwɛ maa tuba Ma untangana iwɛ bụ.

¹⁰²N vwụrɛ shɛ maa Ma ganga shikpogo shɛ bụ o; iwɛnɛ po gabụ bu m mbisegeni iyi.

¹⁰³Kwụba gana na tu n-ndumwa mụ bụ mu lacɛmɛ tu Ngaa hwunganɛ mụ; mu lacɛmɛ nu unu mu mee hwuri iswɛ!

¹⁰⁴Tedure ni imbisegeni bu kaa Ngaa 'yajɛ ti'eshicigo; iwɛbɛ po Omo imo uhwaŋna tukata we elele.

¹⁰⁵N-ndumwa mụ bụ muba mɛ shɛ ụsụtụla na mo m mbisono uhwaŋna; muba kaa mɛ shɛ uhioko-uhwaŋna nụ ụlamụ na Omo dulo.

¹⁰⁶N shilwo-unu, Ngoo shikicingwo uŋ kaa dimi na amɛ mi; maa N zhɛ Mo shiyono andwa bụ tiririri eshe.

¹⁰⁷Oo AGWANGWAMA, ụbaụta mu hwuleji ugombo, m peni uraiŋ nu gana na abɛ jɛmɛ nu n-ndumwa mụ bụ!

¹⁰⁸Oo AGWANGWAMA, lashɛga apwaŋ ashɛtwa mi, maa m mbisegeni andwa bụ.

¹⁰⁹Uraiŋ mu njarɛ ni i'ɛlɛ mi aka elele; ama kaa N keri shi eye nu undwa bụ o.

¹¹⁰Ogworozwo e m biteni ugwuru, ama M pieji shi kaa andwa bụ tu'untangana o.

¹¹¹Onu bu tụpana aba shɛ ogwu mi unyizo-nom; iwɛ-tɛkana, aba shɛ unyasa wa amɛ mi.

¹¹²M mama 'imɛ gom maa ma hwuga-unu wa andwa bụ tutu uce uraiŋ mu.

¹¹³Mo imo atwa na ubu shanɛ shɛ atwa tɛcara; ama tuba Mo lubo undwa bụ.

¹¹⁴Gabụ bɛ shɛ ikepi mi keeni ijilɛni mi, N shɛlanɛ ya unu bu tishilo.

¹¹⁵Ishɛga ma no olugwo mi ahiɛba anjɛ iyi iwɛ; iwɛ maa Ma untangana onu-tupana Agwatana mi.

¹¹⁶No mo shikicingo dimi nu gana na te ebi shiri-unu, maa Ma ya uraiŋ; to lono maa ezuye n shɛ na ashɛlatụ mi na Ama nda o!

¹¹⁷Na ma untangana dimi, maa Ma nama lapiya; iwɛ maa Ma ngbaraka shikpogo shɛ bụ aka elele!

¹¹⁸Gabụ bo jinoko atwa elele na hwụjɛ shɛ unu wa andwa bụ; Iiŋ, tuhalakaka ta aba kaa tɛ shɛ bohondo.

¹¹⁹Gabụ ba 'waŋ ogworozwo na cɛnjɛ tu unyizo ga kpaaŋ gana aswala; iwɛbɛ po Omo lubo tuba andwa bụ.

¹²⁰Iwɛ bu Ama zhɛgɛda ni inyɛsɛ, inyɛsɛ kaa i n shɛ iwɛ ashɛrɛya bụ na aba duma.

¹²¹N nduwa iyi ibiye nɛ kaa teni cɛŋ, to mo jinokono atwa i'ime mi o.

¹²²Shilo-unu maa bi zhɛ bu na nda yɛu gɛ bu ugondu tebiye; to lonono atwa tisashɛ maa a n njɛ umungwuta o.

¹²³Eshe mi lukwumi nu uhwaŋna tungbaraka iwɛ tibicingo tụ bụ; keeni iwɛ tisɛ tu unu bu tiririri tishilo.

¹²⁴Nda yɛu gɛ bu ugondu te teni cɛŋ gana na to tulubo tụ bụ ti tikpeke tu namɛ; maa m mbisegeni onu bu tụpana.

¹²⁵Yɛu bu ugondu Ngaa shɛ, m peni ti'eshicigo, iwɛ maa Ma mapa imbisegeni bu!

¹²⁶Oo AGWANGWAMA, aka ci ya maa njɛ iyi ike; iwɛnɛ ta atwa bweji undwa bụ.

¹²⁷Mo lubo onu bu tụpana uhwuri gana na Omo lubo azhɛnarɛya; iwɛ-tɛkana uhwuri azhɛnarɛya na namɛ shɛshɛshɛ tebiye.

¹²⁸Iwɛbɛ po Ngaa 'wa imbisegeni bu[99] kpaaŋ, Omo imo ihwɛŋnɛ tukata ye elele.

¹²⁹Imbisegeni bu hwuri ụzhɛ, iwɛbɛ po Ama untangana iŋ na amɛ mi kpaaŋ.

¹³⁰Tɛkapɛshɛnga ti iwɛ bu ta pana bụtụ uhioko-uhwaŋna; tuba kaa ta pana atwa na hwuwi shi ti'inta.

¹³¹N kepishinji unu mu Ama hwungwatagwụ, iwɛ onu bu tụpana a na Ama jala.

¹³²M mbiyanɛ, maa hieci inyɛmɛnyɛmɛ mi, gana na aba shana aba nda na atwa na o lubo izeci bu.

¹³³Na ma untangana maa kede ma laya nu gana na ebi shiri-unu; to lono kaa maa iyi iwɛ 'yaga ụhwada mu o.

¹³⁴Ne me gwube no olugwo atwa na ma n nda umungwuta; iwɛ maa Ma 'wa onu bu tụpana.

¹³⁵Nda maa eshe bu na ta nu uhiuhiu yɛu gɛ bu ugondu, maa m mbisegeni andwa bụ.

¹³⁶Malaba mi mi ma fwunga gana Urefu, iwɛnɛ ta atwa untanganɛ shɛ undwa bụ.

¹³⁷Oo AGWANGWAMA, gabụ bu namɛ ririri, andwa bụ kaa teni cɛŋ.

¹³⁸Andwa na obo shilogo namɛ ririri kpaaŋ aba; aa shɛ kaa a na tɛcara.

¹³⁹Isɛbwɛ mi mo hwoŋzhongo gana ulwa, iwɛnɛ ta atwa i'ime mi keri n-ndumwa mụ bụ kpaaŋ.

¹⁴⁰Unu bu tishilo namɛ rụmbɛɛ! Ibɛ po Omo lubo uŋ tebiye Gamba yɛu gɛ bu ugondu!

¹⁴¹N namɛ cwɛŋ, iwe mi kaa tatụlanụ sụ bụtụ o; ama kaa N jineci shi imbisegeni bu o.

¹⁴²Tiririri tụ bụ tɛ shɛ unyizo-nom, undwa bụ kaa ụ shɛ iwɛ-tɛkana aka elele.

¹⁴³Amɛ-tụhaŋtụ keeni tiriri tu n vwuteni, ama onu bu tụpana aba ma m pana unyasa.

¹⁴⁴Tusokokono tụ bụ tu namɛ ririri unyizo-nom; m peni ti'eshicigo maa Ma ya uraiŋ.

¹⁴⁵Oo AGWANGWAMA, Ma bụ kala ụhiɛŋshɛ na amɛ mi kpaaŋ; n jishijɛ kaa! N zhɛ kaa Ma untangana onu bu tụpana.

¹⁴⁶M bi keri ụhiɛŋshɛ; m bicinji, iwɛ maa Mo shiyono andwa bụ eshe.

¹⁴⁷M bụ suyanɛ tobwolo uwaŋna te beni shi o; Ngaa shɛlanɛ unu na ebi shiri.

¹⁴⁸N weci shi malabụ uuwa gi iyi yo holo; iwɛ maa Mu na ta aza unu na ebi shiri.

¹⁴⁹Oo AGWANGWAMA, hwuga rụhwụŋ ri mi, iwɛ tulubo tụ bụ ti tikpeke; untangana uraiŋ mu ni inyɛmɛnyɛmɛ bu tihioko.

¹⁵⁰Atwa shɛmiaụŋ a na ma n shɛka, o gwumwongonu ya ne mi ciiŋ ciiŋ; ama kaa a dụlụmɛ nu undwa bụ.

¹⁵¹Oo AGWANGWAMA, gabụ bu gwumwonu ne mi ciiŋ ciiŋ; onu bu tụpana kaa kpaaŋ a shɛ a na tɛkana.

¹⁵²N seshi iwɛ tusokokono tụ bụ cala, gabụ bɛ njɛ tụ maa ti ilogogo unyizo-nom.

¹⁵³Mbiyanɛ ụbaụta mu maa n leshiji, iwɛnɛ ti Ngee keri shi undwa bụ.

¹⁵⁴Na ma jilanɛ nụ ụshɛrɛya mu maa n gwube; m bicinji gana na te ebi shiri-unu!

¹⁵⁵Ogworozwo dụlụmɛ nu ubino bu, iwɛnɛ te e dwelekeci shi shikpogo shɛ bụ.

¹⁵⁶Ama iwɛ-tumapa bụ gembi duwa; hioko inyɛmɛnyɛmɛ mi maa m bicinji te teni cɛŋ na andwa bụ!

¹⁵⁷Atwa i'ime mi, na atwa na ma n shɛka gembi ufwugwo; ama kaa N 'wanjɛ shɛ andwa bụ tu'untangana o.

¹⁵⁸Mo sumono atwa na shɛ shɛ atwa tɛcara; iwɛnɛ aa untanganɛ shɛ onu bu tụpana.

¹⁵⁹AGWANGWAMA, kwụba de gana na Omo lubo imbisegeni bu. Tulubo tụ bụ kaa ti sheyinji shi o, iwɛ ecilo ata untangana uraiŋ mu.

¹⁶⁰Tutogotogwu tu n-ndumwa mụ bụ kpaaŋ kpaaŋ tɛ shɛ iwɛ-tɛkana; ashɛrɛya bụ kaa kpaaŋ a shɛ unyizo-nom.

¹⁶¹Miaụŋ mu tugwama ma n shɛka uzawa ecilo, ama Ma muna kaa n-ndumwa mụ bụ ụjɛrụma.

¹⁶²Ma bwada unyasa nu n-ndumwa mụ bụ, gana ta bụtụ na gwushiji ufwa ujasa uko ụ'wụtụ 'wụtụ.

¹⁶³Mo imo tukata Ama nda kaa inyizhi tuba, ama Mo lubo tuba undwa bụ.

¹⁶⁴Ma bụ dumanga kpalụ cenje iyi-heri, iwɛ ashɛrɛya bụ tiririri.

¹⁶⁵Atwa na o lubo undwa bụ, a 'yajɛ amɛ-olom na ulwa kpaaŋ; i zasa kaa iyi elele nɛ eri ya kalagaga aŋ o.

¹⁶⁶Oo AGWANGWAMA, M bu shɛlanɛ maa m bicinji, Ma nda kaa unu na ebi m peni te teni cɛŋ.

¹⁶⁷Ma hwuga-unu imbisegeni bu, Omo lubo iŋ kaa na amɛ mi kpaaŋ.

¹⁶⁸N untanganɛ unu na ebi m peni keeni tusokokono tụ bụ; gabụ kaa ba kwụba iyi elele nɛ Ama nda.

¹⁶⁹Oo AGWANGWAMA, lono maa ga n'ungwa mi mi mi bi ce, iwɛ maa m mbiyebi; m peni ti'eshicigo te teni cɛŋ nu n-ndumwa mụ bụ!

¹⁷⁰Lono maa ga tutabwa ti mi ti bi ce; n leshiji te teni cɛŋ nu unu na ebi shiri.

¹⁷¹N zhɛ mu na bu shɛtana aka elele, iwɛnɛ ebi m mbisegeni shikpogo shɛ bụ.

¹⁷²N zhɛ mu na zungangana n-ndumwa mụ bụ azunga, iwɛnɛ to onu bu tụpana kpaaŋ teni cɛŋ.

¹⁷³Mama 'imɛ maa m mbiyeni aka elele, iwɛnɛ tu Ngaa 'wa onu bu tụpana.

¹⁷⁴Oo AGWANGWAMA, kwụba gana na tu ubino bu ma n dwa eshe; N gwushiji kaa amɛ-olom nu undwa bụ.

¹⁷⁵M peni uraiŋ tiya, maa Ma bụ shɛtana, ga andwa ashɛrɛya bụ e m mbiyeni.

¹⁷⁶N 'inɛ gana ụgwụdụ na 'inɛ; zhajɛ maa n dwelekeci Gamba yɛu gɛ bu ugondu, iwɛnɛ ti Ngee jineci shi andwa bụ.