Read bassa SHƐZUNGA TUZUNGANGANA AGWANGWAMA 141 Bible Online

SHƐZUNGA TUZUNGANGANA AGWANGWAMA 141 - bassa bible

SHƐZUNGA TUZUNGANGANA AGWANGWAMA 141

¹Azunga na ge Devid zungangane AGWANGWAMA Oo AGWANGWAMA, M bu suyanɛ, m mbiyeni kakayɛ! Shilo ụcɛbɛ aka na Ngaa bu suyanɛ!

²Lashɛga adua mi nu umbe bu gana iturɛre; gɛ i'ɛlɛ mi tusugo na azuba i shɛ gana ụrụpɛ ụrụmɛ!

³Oo AGWANGWAMA, shikicingo bungbaracɛ nu unu mu; na untangana ihwumbwe mi!

⁴N untangana maa kede Mu na jala iyi nɛ 'wanjɛ tɛnda o; maa kede Mu no togwu na atwa awɛ no tugworozwo ta aba tɛnda o. To lono maa Mu na ya iyimɛyɛ nsono ma aba o!

⁵Lono maa ga bụtụ bi biye no mo n vwulo maa bu na ma tazhɛganɛ nu uwanyi, ama to lono maa Ma lashɛga ụjɛrụma na ogworozwo ma m muna o, iwɛnɛ ta adua mi a sukakana tugworozwo ta aba aka elele.

⁶Aka na te e peni aŋ atwa na zhɛ a pana aŋ n-ndumwa-tụwụma; nazhɛ ɛɛ zhɛ a mapa maa n-ndumwa ma AGWANGWAMA mɛ shɛ iwɛ-tɛkana.

⁷O'umpwo aba zhɛ a garatagwụ nu unu u'uye; gana uparatayɛ na bụtụ bu ko begeteji bee vwurenji na cɛnjɛ ta ata.

⁸Oo AGWANGWAMA na shɛ Agwatana mi, gabụ eshe mi ngbarakacɛ zenji zenji, gabụ Ngaa datanɛ, ta ma kalana tu'wo!

⁹N untangana maa kede Ma laya no ogwuru na ee m biteni o; keeni modugwulo mu na anjɛ iyi iwɛ e m biteni o!

¹⁰Lono maa ogworozwo 'waŋ no ogwuru ɛkɛnyi aba; maa tuba ma kashɛka lapiya.