Read bassa SHƐZUNGA TUZUNGANGANA AGWANGWAMA 145 Bible Online

SHƐZUNGA TUZUNGANGANA AGWANGWAMA 145 - bassa bible

SHƐZUNGA TUZUNGANGANA AGWANGWAMA 145

¹Azunga Ashɛtwa na ge Devid Zunganganɛ AGWANGWAMA Agwatana mi, na Agwuma mi, N zhɛ ma ananga ugombo bu. N zhɛ kaa mo bu zhemonjino uuwa unyizo zhe gwure.

²N zhɛ mo bu zhemonjino iyi-heri; Ma shɛtana kaa izeci bu uuwa unyizo zhe gwure.

³AGWANGWAMA gembi, bɛ shɛ aa shɛtana du te gembi; ugombo ubwa keshici ti'eshicigo.

⁴Uwaŋnɛ uko zhɛ wo zhemonjino ugondu bu tutu uwaŋnɛ na 'wa uŋ; ɛ zhɛ kaa a ananga iyi i'wɛtwɛ nɛ abɛ njɛ.

⁵Ɛ zhɛ a duma iwɛ ụjɛrụma bụ keeni igɛhi bu; N zhɛ mu na ta aza iwɛ iyi i'wɛtwɛ nɛ abu ndanjɛ.

⁶Atwamwa zhɛ na duma iwɛ ugondu bu ụ'wụtụ na hwuleji; N zhɛ kaa ma ananga ugombo bu.

⁷Ɛ zhɛ a duma urishi ugombo uwebiye bu; ɛ zhɛ kaa a zunga azunga tiririri tụ bụ taawụụ.

⁸AGWANGWAMA mepi iwɛ, boo hioko kaa du inyɛmɛnyɛmɛ; bɛ njɛ shɛ izɛlɛgwu ni isɛbwɛ tɛnda, ama tulubo ti tikpeke ti gembi pu bwa.

⁹AGWANGWAMA zhɛmanɛ bụtụ be elele, iwɛ tumapa ubwa kaa namɛ ni iyi elele nɛ baa njɛ.

¹⁰Oo AGWANGWAMA, iyi elele nɛ abu karɛ zhɛ ma bu shɛtana; atwa bu tijilo kpaaŋ kaa zhɛ mo bu zhemonjino!

¹¹Ɛ zhɛ a duma iwɛ ụjɛrụma cɛnjɛ-ta-tugwama tụ bụ; ɛ zhɛ kaa na nda ushaura ukpahiŋ bụ,

¹²iwɛ maa bụtụ be elele mepi iyi i'wɛtwɛ nɛ abu ndanjɛ; maa e peni igɛhi cɛnjɛ-ta-tugwama tụ bụ ụjɛrụma.

¹³Cɛnjɛ-ta-tugwama tụ bụ tɛ shɛ ma tu tu unyizo-nom; Ụhwada bụ kaa namɛ tutu awaŋnɛ elele na te e ci. AGWANGWAMA shɛ bụtụ bɛ tɛcara nu unu we elele na bee shileji; keeni tulubo ti biye ni iyi elele nɛ baa ndanjɛ.

¹⁴AGWANGWAMA ubwa bo mbiyono atwa elele na namɛ na amɛ-tuhaŋtu; ubwa kaa bɛ ishicinjɛ atwa elele na 'waŋtatangwụ. Ubwa ba nda maa atwa na to bizhiri hirinje.

¹⁵Gabụ kaa ba pana eshe elele na ubu zweni igbɛtɛtɛ iyimɛyɛ na aka na tu ukekeshi ibɛ to aŋ.

¹⁶Gabụ ba kapɛshɛnga u'ala bụ, iwɛ maa iyi-uumwa ye elele 'yaga iyi nɛ aa jala te gembi aŋ.

¹⁷AGWANGWAMA shɛ bụtụ bi tiririri ni iyi elele nɛ baa nda kpaaŋ, bee mepi kaa iwɛ ni iyi elele nɛ baa nda.

¹⁸AGWANGWAMA gwumwongonu pa atwa elele na a suyana bụ; aba shɛ atwa elele na a suyana bu na amɛ aba oko.

¹⁹Ubwa ba pana atwa elele na a sụma bụ inyɛsɛ iyi elele nɛ to aŋ ukekeshi; baa hwuga kaa du n'ungwa ma aba, boo bicingo aŋ du.

²⁰AGWANGWAMA ubwa ba untangana atwa elele na o lubo bu; ama bo iricingo tuba ogworozwo elele.

²¹Unu mu zhɛ wa shɛtana AGWANGWAMA aka elele; ge iyi elele nɛ baa karɛ zhemonjino izeci ibwɛ tijilo unyizo-nom uuwa unyizo zhe gwure.