Read bassa SHƐZUNGA TUZUNGANGANA AGWANGWAMA 148 Bible Online

SHƐZUNGA TUZUNGANGANA AGWANGWAMA 148 - bassa bible

SHƐZUNGA TUZUNGANGANA AGWANGWAMA 148

¹Shɛtana ma AGWANGWAMA! Ahiɛba na hiɛ namɛ na azuba, shɛtana ma AGWANGWAMA, nama ma no ofwo na zeci maa hiɛ shɛtana bụ!

²Ahiɛba atumwa ubwa azuba kpaaŋ, shɛtana bụ ma; shɛtana bu ma ahiɛba ejeshi ubwa azuba kpaaŋ!

³Gabụ uwaŋna, nu upiana shɛtana bụ ma, ahiɛba mkpasu mu na ma ta raawụụ, shɛtana bu ma kpaaŋ!

⁴Shɛtana bu, gabụ azuba na hwuri ofwo vwɛ nu uzoto kpaaŋ; keeni meni mu na mu zweni na azuba tụla!

⁵Ga a shɛtana izeci ya AGWANGWAMA kpaaŋ aba! Iwɛnɛ po ubwa peni-unu nazhɛ aa karɛ ijɛ ɛtɛ kpaaŋ.

⁶Tedure nu unu ubwa tụpana ibɛ po ee cimbengeni iŋ kpaaŋ no ofwo ata yaa namanjɛ unyizo-nom; ubwa shileni iŋ ogwungwu na zasa tɛkashɛka.

⁷Ahiɛba edegbe na zweni ni itekwu, keeni ofwo na ileji biuŋ biuŋ na cɛnjɛ tu unyizo kpaaŋ; shɛtana ma AGWANGWAMA;

⁸ulwa, na atayɛ-eshilo, ni isno ata lemi cwii[111] keeni odomu, nu uvwugo ụ'wụtụ ụrɛcɛnga ma unu na bee peni tuhwuga.

⁹Nshama keeni tikpekwu kpaaŋ, ta tụ'walụ ti i'wɛ'wɛ keeni osobu kpaaŋ shɛtana bu ma!

¹⁰Ti isundɛ ehilo keeni inɛ kpaaŋ, ti iyi nɛ yo hombilongo na cɛnjɛ keeni shanụnụ shɛ na sha hila!

¹¹Ta shɛgwuma shɛ cɛnjɛ tu unyizo keeni atwamwa kpaaŋ; ta miaụŋ ma shɛgwuma keeni ehiu cɛnjɛ tu unyizo kpaa!

¹²Ta ahiɛba esemberi keeni eyikwo hwɛɛ, ta atwa na inganjɛ keeni miaụŋ; shɛtana bụ ma!

¹³Ga a shɛtana izeci ya AGWANGWAMA kpaaŋ aba! Iwɛnɛ po izeci ibwɛ gembi yee hwuri mu na mu vwɛ kpaaŋ, ụjɛrụma ubwa kaa zeci wee keshici cɛnjɛ tu unyizo keeni azuba.

¹⁴Ubwa peni atwa ubwa ukpahiŋ; iwɛ maa atwa ubwa kpaaŋ na shɛtana bụ, iwɛnɛ ti iwɛ atwa Isrɛl tɛtajɛ bu tebiye. Shɛtana ma AGWANGWAMA!