Read bassa SHƐZUNGA TUZUNGANGANA AGWANGWAMA 16 Bible Online

SHƐZUNGA TUZUNGANGANA AGWANGWAMA 16 - bassa bible

SHƐZUNGA TUZUNGANGANA AGWANGWAMA 16

¹Azunga Ticinji na ge Devid Zunganganɛ AGWANGWAMA ni iyi ya Azunga. Oo Agwatana, N jilanɛ; iwɛnɛ ti yaa shɛ gabụ Ngaa patanɛ-rishe iwɛ maa ma nama lapiya.

²N hiɛŋ AGWANGWAMA, Gabụ bɛ shɛ Agwangwama mi; iyi ibiye ye elele nɛ Ngaa 'yajɛ banɛ no olugwo bu.

³Atwa tijilo na namɛ na cɛnjɛ ta ata, aba 'yajɛ izeci urishi ubiye! Aba kaa shɛ unyasa mu na uhwuri iyi elele kpaaŋ.

⁴Atwa na teri tuwa ni izɛlɛgwu, a mama kaana ụngwụ-tuhwuga[1] ufwugwo. N zha shɛ kaa ma ta arụpɛ na aba o; N zha shɛ kaa du ma zhɛba tuwa ta ata ta aba o.

⁵AGWANGWAMA, gabụ kiri Ngaa 'yajɛ, gabụ kaa bu ma m pana iyi ukekeshi mu kpaaŋ; geri-be-eshe mi kpaaŋ kaa namɛ ni i'ɛlɛ bụ.

⁶Apwaŋ na ebi m penenji hwuleji tụdụma, aa zhɛmanjɛ kaa tebiye!

⁷Mo zhemonjino AGWANGWAMA na ma m pana ahaŋsa; okwo nụ ụjita amɛ mi mo n sokono uhwaŋna.

⁸AGWANGWAMA ubwa Omo hwuricingo umbe aka elele; bu gwumwongonu ne mi, i zasa iyi nɛ te eri ma n nda ya bulama o.

⁹Ma nda ugwoje keeni unyasa, ibɛ po Ngaa hwungwa ya suu hwɛ hwɛɛ mu.

¹⁰Gabụ bu ma n jilanɛ upo Ngee te 'wi shi, bi zha shɛ kaa bo lono maa Bụtụ bụ bi Tijilo fwoshi o.

¹¹Gabụ kaa bu mo m mbisono uhwaŋna na wa zarɛga bụtụ nu uraiŋ; eshe bu kaa mo n shidingo nu unyasa, nu u'ala bụ ubiye kaa tuwebiye tu unyizo-nom tu namɛ.