Read bassa SHƐZUNGA TUZUNGANGANA AGWANGWAMA 19 Bible Online

SHƐZUNGA TUZUNGANGANA AGWANGWAMA 19 - bassa bible

SHƐZUNGA TUZUNGANGANA AGWANGWAMA 19

¹No Ofwo Iyɛri ya Azụnjɛ:: Azunga na ge Devid Zunganganɛ AGWANGWAMA. Tụla to mbisono ụjɛrụma wa Agwatana kpataa! Araranga kaa du o mbisono ugondu i'ɛlɛ ibwɛ.

²Uwaŋna uwaŋna wa anangana uwaŋna na 'wa uŋ; ụrụmɛ ụrụmɛ kaa wa uranga ụrụmɛ na 'wa uŋ timbiso.

³A dumanɛ shɛ iwɛ, okwo kaa n-ndumwa, a hwụjɛ shɛ kaa okwo rụhwụŋ ra aba o.

⁴Ama rụhwụŋ ra aba kaa ri beni ree zhe nu unyizo kpaaŋ, uce cɛnjɛ tu unyizo kaa hwụjɛ rụ. Agwatana njɛ uwaŋna bee peteni uŋ na tụla.

⁵Wa banɛ gana bwolo biyikwo bu ufwo na ba banɛ nu unyasa uvwungwa uvwungwa, ụ shɛ gana bụtụ bu ukpahiŋ na ba hwungwatangwụ maa kwuno usumwa ubwa wa acɛjɛla.

⁶Wa banɛ nu uce tụla zalụ bu ko woo tono nu uce tụla zalụ yebi uhioko-uhwaŋna ubwa wa ta iyi elele.

⁷Undwa wa AGWANGWAMA ulwa nụ ụzhɛ kpaaŋ; waa pananana kaa bụtụ ikɛnyi ifwo. Unu-tupana wa AGWANGWAMA kaa lanɛ maa a tɛtana uŋ rishe, wa pana atwa na ahaŋsa ci shi ti'inta.

⁸Andwa AGWANGWAMA kaa teni cɛŋ, atwa elele na a hwuga-unu wa aba, amɛ aba o lomo tebiye. Onu-tupana AGWANGWAMA namɛ ririri, a pana ahaŋsa bụtụ ti'eshicigo.

⁹AGWANGWAMA inyɛsɛ tụsụma, i shɛ iyi tishɛshɛshɛ, ɛ zhɛ kaa a sụma bu iŋ unyizo-nom. Ashɛrɛya na AGWANGWAMA a duma kaa namɛ ririri; ee teni kaa cɛŋ.

¹⁰A zhɛmɛ kaa ee hwuri okwo azhɛnarɛya tụrụmbɛɛ; a lacɛmɛ kaa ee hwuri iswɛ nɛ namɛ shɛshɛshɛ, nɛ ye ngbenji na azanga.

¹¹Aba ma n tɛtagana-unu gana na i shɛ maa ma nama Gamba yɛu bu ugondu; unu wa aba tuhwuga i shɛ titeni tụ 'wụtụ.

¹²I zasa bụtụ eri ba mapa ti'ina ti ikɛnyi ibwɛ o. AGWANGWAMA, n leshiji na tụwụma tu na Ngee mepi shi.

¹³Na ma kapana uhwaŋna iwɛwɛ i tukwurimi tɛnda Gamba yɛu bu ugondu; to lono kaa maa i shɛ ibɛ zhɛ na ma 'yagaga o. Nazhɛ Ngaa zha shɛ ma 'yaga unu-tusapa, nazhɛ Ngɛɛ zhɛ ma banangana undwa na wumanjɛ tubwada.

¹⁴Ga n-ndumwa mu unu mu ne titeyinje ta amɛ mi, tụ bụ kwụlanɛ tɛlashɛga. Oo AGWANGWAMA, gabụ bɛ shɛ bikepi mi keeni tugwube ti mi.