Read bassa SHƐZUNGA TUZUNGANGANA AGWANGWAMA 22 Bible Online

SHƐZUNGA TUZUNGANGANA AGWANGWAMA 22 - bassa bible

SHƐZUNGA TUZUNGANGANA AGWANGWAMA 22

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA. Agwatana mi, Agwatana mi, iwembe po ebi n jinecii? Iwembe po abụ dụlụmɛ ne mi ebi m mbiyeni shii? Ebi mbiyeni shi kaa n'ungwa mu tungwulo ti mii?

²Oo Agwatana mi, M bu keri ụhiɛŋshɛ nu uwaŋna, ama bu n jɛshɛjɛ shɛ o; N zasa kaa ụhinjanụ nụ ụjita, tedure nụ ụhiɛŋshɛ na Ama kala o.

³Ama kaa bɛ jɛjɛ ba na ajɛjɛ bu tijilo, gabụ na atwa Isrɛl a shɛtana.

⁴Gabụ kaa eshi tu patanɛ-rishe; e bi peteni rishe, ibɛ po ebi bicinji aŋ.

⁵Gabụ aa ugananɛ, ibɛ po ee bini; gabụ aa patanɛ-rishe, bu pe shi aŋ kaa aba na cɛnjɛ o.

⁶Ama utwatwa Ngaa shɛ, shɛ bụtụ o; atwa m ngbaracɛ cwɛŋ, aa ma hinga ilɛtu.

⁷Atwa elele na n kwụbɛ a na ma n nda asada; a na ma n ta ashɛshɛrụwụŋ, o no zhingoto ohiuhiu aba.

⁸Ɛɛ hiɛŋ gabụ na bu patanɛ AGWANGWAMA rishe, ga AGWANGWAMA ibi bicinji. Yaa shɛ iwɛ ubwa kwụlanɛ AGWANGWAMA, asha ga lashɛga bu.

⁹Okwo ti yaa shɛ gana ata, gabụ kaa bu m bɛcinjɛ ni igwune tumata lapiya; gabụ kaa bu n njɛ maa ma bu patana-rishe taa na aka na Ngoo to subo bino mi.

¹⁰Gabụ ee n keleni taa na aka na te e m meci, taa te bino mi m meci, gabụ bɛ shɛ Agwatana mi.

¹¹Ta dụlụma ne mi o! Iwɛnɛ po ụbaụta gwumwongonu, bụtụ bi timbiyono be elele kaa zasaba o.

¹²Atwa i'ime ofwugwo o n rungwutwonu gana esemberi inɛ, o n rugwutwonu kpaaŋ aba, gana inɛ nɛ 'yajɛ ikɛnyi nu Bashan.

¹³A n kapɛshɛnganɛ onu aba gana bizeci na bo ngwulo na kaa ba aŋsatanga iyi.

¹⁴Ukpahiŋ mu zasaba ya o, u 'waŋwaŋ gana meni mu na aa 'wɛŋ na cɛnjɛ. O'umpwo mi kpaaŋ shɛshagwụ ni itwɛ ya aba; amɛ mi ni gana manɛbɛ-manyɛshɛ.

¹⁵Urworwo mu hweteni gana ujejebi, bụratụ mi swanɛ na tụpala te ene mi ta azuba; gabụ kaa bu n wecicinji nu upwupwutu tu'wo.

¹⁶Iiŋ, shiwawa shu n holongonu; tu'ulwa ta atwa na a nda iyi iwɛ tu n rungwutwonu mwɛ; a ibatajɛ[3] i'ɛlɛ mi keeni ɛvwɛvwɛjɛ mi.

¹⁷N eri ma rɛta o'umpwo mi hwɛɛ. Atwa i'ime mi e n hwucekeni shishe sha aba ni igbɛtɛtɛ.

¹⁸O dwotwogonu otogwo mi abaaba, aa 'wɛŋ icɛcɛ iwɛ idikɛ mi.

¹⁹Oo AGWANGWAMA, ta dụlụma ne mi o! Oo gabụ na bu ma m pana ukpahiŋ, zhajɛ kakayɛ maa n lesheji!

²⁰M bicinji maa kede utokwobi u m po; bicingo uraiŋ mu[4] no olugwo ukpahiŋ shiwawa shɛ ga!

²¹N lesheji nu unu izeci gɛ; N zasa bụtụ maa mo m bicingo[5] ni inemi gɛ ukpahiŋ o.

²²N zhɛ ma anangana miaụŋ-mo-bino mi izeci bu. N zhɛ kaa ma bu shɛtana na ashashɛ tu'ulwatagwụ ta aba:

²³Ahiɛba na hia sụma AGWANGWAMA inyɛsɛ, shɛtana bu ma! Ahiɛba ajalalo Jekob, pana bu ma ụjɛrụma! Ahiɛba atwa Isrɛl, zhɛba bu ma!

²⁴Iwɛnɛ po bu ngbaracɛ shɛ okofwo keeni atwa ụbaụta cwɛŋ o, bɛ njɛ shɛ kaa okwo inyizhi ya aba o; bi peni shi aŋ aba o, ama aka na aa suyanɛ bu, bɛ jishijɛ aŋ.

²⁵N zhɛ ma bu shɛtana na aka na ta tu'ulwa tu ulwa kpaaŋ iwɛ iyi nɛ abu nduwa; N zhɛ kaa ma bu pana arụpɛ na Ngee shiri-unu ne eshe atwa na ma bu sụma inyɛsɛ.

²⁶okofwo kaa zhɛ a ya iyimɛyɛ gana na gembi aŋ; atwa na kaa zhajɛ pa AGWANGWAMA, zhɛ a shɛtana bụ. Ga i zhɛmanɛ aŋ unyizo-nom!

²⁷Edenji elele kpaaŋ zhɛ e teyinje AGWANGWAMA. Ụpadụ we elele na cɛnjɛ tu unyizo zhɛ we gwure no ofwo ubwa; amwamwa edenji elele kpaaŋ zhɛ a zhɛba bụ.[6]

²⁸AGWANGWAMA ubwa shɛ agwuma, ubwa kaa untanganɛ edenji elele.

²⁹Atwa unyangana kpaaŋ zhɛ o kwuzono bu;[7] atwa elele na kaa zhɛ o zwo nu upwupwutu ɛ zhɛ o kwuzo na agba ubwa. Keeni atwa elele na eri shi a ya uraiŋ ni ikɛnyi aba.

³⁰Awaŋnɛ na te e ci geri-be-eshe ɛ tɛ zhɛ a ndana bụ iyi; atwa kaa tɛ zhɛ a duma iwɛ AGWANGWAMA no ofwo uwaŋnɛ na te e ci.

³¹Ɛ tɛ zhɛ a anangana atwa na ee te meci shi tɛlashɛga tu bwa; maa AGWANGWAMA ubwa bo bicingo atwa ubwa.