Read bassa SHƐZUNGA TUZUNGANGANA AGWANGWAMA 34 Bible Online

SHƐZUNGA TUZUNGANGANA AGWANGWAMA 34 - bassa bible

SHƐZUNGA TUZUNGANGANA AGWANGWAMA 34

¹Azunga na ge Devid Zunganganɛ AGWANGWAMA, na Aka na tu Baa Mama njɛ gana Bụsụmɛ-bu-umpɛ no Ofwo Abimɛlɛk. Ibɛ po ga Abimɛlɛk Unzhi bu, Bee beni Apata bee Hwuri N zhɛ mu na 'walụ AGWANGWAMA aka elele; Ma uranga ashɛtwa ubwa tutuu.

²N zhɛ ma shɛtana bụ iwɛ iyi nɛ baa njɛ; ga atwa na aa nda umungwuta a hwụjɛ maa amɛ aba lemi!

³M mbiyeni ma AGWANGWAMA ụjɛrụma tụpana; maa ti gembicinji ma izeci ibwɛ zhiaaŋ!

⁴N lụpɛ AGWANGWAMA, bɛɛ n jishijɛ; bee n leshiji kaa ni inyɛsɛ mi hwɛɛ.

⁵Atwa na aa njɛ umungwuta, a mbiyanɛ bu, ibɛ po amɛ aba lemi; ezuye kaa zha shɛ a sha aŋ kwukwuŋ.

⁶Bụtụ na zasa bụtụ, suyanɛ bụ, bɛɛ jishijɛ bụ; bee leshiji bu na amɛ-tụhaŋtụ ubwa hwɛɛ.

⁷Atumwa-azuba AGWANGWAMA a ngbaraka atwa na a sụma bụ inyɛsɛ, ibɛ po bee leshiji aŋ.

⁸Manga AGWANGWAMA maa kwụbɛ gana na tu baa zhɛmɛ! Atwa na baa shɛ bikepi ba aba gwoje!

⁹Oo sụma ma AGWANGWAMA inyɛsɛ, ahiɛba atwa ubwa tijilo, i zasa iyi elele nɛ zhɛ ya vwunga atwa na a sụma bụ inyɛsɛ o!

¹⁰Okwo izeci, imunɛ ya gwuma aŋ na aka na ti iyimɛyɛ 'nyananɛ aŋ; ama i zasa iyi ibiye nɛ zhɛ ya 'nyanana atwa na a patana AGWANGWAMA rishe o.

¹¹A-miaụŋ mi mi, zhajɛ ma, shilo ma acɛbɛ nu n-ndumwa mi mi, N zhɛ me hi mbisogono gana na aa sụma AGWANGWAMA inyɛsɛ.

¹²Ba jala suu uraiŋ ubiye tiyaa? Ba jala suu urugbo tiya keeni amɛ-olom?

¹³Asha ganga n-ndumwa mụ wɛ tụdụma keeni ụzagwụ-tudwa.

¹⁴Ishɛga maa genji iyi iwɛ, maa na nda iyi ibiye; shana ikɛnyi maa 'wa amɛ-olom tutuu.

¹⁵AGWANGWAMA a ngbaraka atwa tiririri, baa shɛlaga kaa n'ungwa ma aba.

¹⁶Ama ba kala atwa na a nda iyi iwɛ ashɛrɛnganɛ, iwɛ maa kede e teyinje iwɛ aba na cɛnjɛ tu unyizo.

¹⁷Aka na ta atwa tiririri suyanɛ AGWANGWAMA iwɛ maa mbiyono aŋ, bi zhɛ ba hwuga, bɛɛ zhɛ kaa ba lashɛga aŋ nụ ụbaụta wa aba hwɛɛ.

¹⁸AGWANGWAMA gwumwongonu na atwa na shɛmɛ sha aba shɛ hashaganụ, boo bicingo kaa atwa na iyi nɛ aa njɛ cala gwumanɛ tebiye.

¹⁹Yaa shɛ bụtụ bi tiririri 'yajɛ amɛ-tụhaŋtụ iwɛ ụbaụta ufwugwo na vwutengeni bu, AGWANGWAMA tuba o bicingo bu nu bwa kpaaŋ;

²⁰ba untangana bu hwɛ hwɛɛ; u'umpwo ubwa okwo uko zha shɛ wa bwadụ o.

²¹Iyi iwɛ zhɛ ya kwụna ogworozwo; ɛ zhɛ kaa a pana atwa na a ta atwa tiririri ni i'ime n-ndumwa-tụwụma.

²²AGWANGWAMA e gwube miaụŋ mu bwa mu ugondu; n-ndumwa kaa mi zha shɛ ma wụma atwa na ba shɛ bikepi ba aba okwo bụtụ bu ko gba o.