Read bassa SHƐZUNGA TUZUNGANGANA AGWANGWAMA 38 Bible Online

SHƐZUNGA TUZUNGANGANA AGWANGWAMA 38 - bassa bible

SHƐZUNGA TUZUNGANGANA AGWANGWAMA 38

¹Azunga na ge Devid Zunganganɛ AGWANGWAMA, iwɛ Titeyinje tu Upwaŋ Oo AGWANGWAMA, ta ma tazhɛganɛ ni isɛbwɛ bu o, ta ma pana kaa ulwapɛ ni isɛbwɛ bu ti'ishijɛ o.

²Iwɛnɛ po gabụ bu n ngwụcɛnjɛ na a'inla bụ; u'ala bụ kaa mo n dubo.

³Iwɛ isɛbwɛ bu ibɛ po Ama hwuga-ụngwụ ụ'wụtụ na tu'waba ti mi; o'umpwo mi hwɛ hwɛɛ kaa zasa ya ulapiya iwɛ iwɛwɛ mi nɛ Ama nda o.

⁴Iwɛwɛ mi i m mɛcɛ gana meni mu na ma zhagajɛ; ibɛ po yaa shɛ ya i'wɛŋnɛ nɛ i n hwuleji tu'waŋna.

⁵Ụlagwụ mu upo andala mi a yaga aa bana twamwa.

⁶Andala ata aba ontonu i'ilu mi, yaa n njɛ ikwuke; Ibɛ po Ama ta-ụkwụla uuwa gụ ụrụmɛ.

⁷Ụngwụ u tuvwongongo mo n hwoŋzhongo, i vwɛ cwɛŋ maa i shɛ N 'wi.

⁸N lukwumi hwɛ hwɛɛ, N eri shi mo shikono to; ohwulu ma n nda kpokpokpo, Omo 'nyongo iwɛnɛ Ama hwuga-ụngwụ.

⁹Oo AGWANGWAMA, bi mepi iyi nɛ ma n dwa eshe kpaaŋ; bu hwụjɛ kaa i'nye nɛ Omo 'nyongo kpaaŋ.

¹⁰Ohwulu ma n nda bwuu bwuu, N zasa ya kaa ikɛnyi o, eshe mi kwụbɛ shɛ ya uhwaŋna cara o.

¹¹Eyejilo mi keeni anya mi o gwumwonu su ya ne mi o, okwo atwa ukpogwu mu gom e shikekeni taa dụlụ ne mi iwɛ andala mi.

¹²Atwa na ma n jala tụkwụna e m biteni ogwuru, atwa ata na a jala maa a n gwụcɛnjɛ a ma n dumangana iyi iwɛ; aa ma n haŋsagana iwɛ amɛ-tuma uuwa gụ ụrụmɛ.

¹³Ama N shɛ gana akwụrụ na eri shi a hwuga iwɛ, Ngaa shɛ gana igwureni nɛ eri shi ya dumana iwɛ.

¹⁴N shɛ gana bụtụ na peni shi ajɛshɛgwa, gana maa N hwụjɛ shɛ o.

¹⁵Oo AGWANGWAMA, gabụ Ngaa shɛlanɛ; Oo AGWANGWAMA na shɛ Agwatana mi, gabụ bi zhɛ bu mɛ n jishijɛ.

¹⁶Iwɛnɛ po ma bụ tabwa, to lono maa ma nda ụbaụta maa atwa i'ime mi bweji apalatụ o, to lono kaa maa ma laya maa a bụshɛ o.

¹⁷Iwɛnɛ po N zhagawa ulayɛ cebe, ma hwuga-ụngwụ tebiye aka elele.

¹⁸Mo lono-unu iwɛwɛ mi, amɛ mi kaa hashɛganụ tebiye iwɛ iyi iwɛ mi nɛ Ngaa njɛ.

¹⁹Atwa i'ime mi 'yajɛ ulapiya, aa 'yajɛ kaa ikɛnyi, ee gembi kaa ufwugwo to o mo n imo zawa ecilo.

²⁰Atwa na ma n sukakana aba ma n tụpana itɛpwɛ iwɛ tụlụkpashɛ ti iyi ibiye nɛ Ngaa njɛ iwɛnɛ ta Ama jala maa ma nda iyi nɛ teni cɛŋ.

²¹Oo AGWANGWAMA, to mo jinoko! Oo Agwatana mi, ta dụlụma ne mi o!

²²Oo AGWANGWAMA na shɛ Bibicinji mi, nda kakayɛ maa m mbiyeni hwuwayɛ go!