Read bassa SHƐZUNGA TUZUNGANGANA AGWANGWAMA 39 Bible Online

SHƐZUNGA TUZUNGANGANA AGWANGWAMA 39 - bassa bible

SHƐZUNGA TUZUNGANGANA AGWANGWAMA 39

¹No Ofwo Iyɛri ya Azụnjɛ go Judutun Azunga na ge Devid Zunganganɛ AGWANGWAMA N hiɛŋ, N zhɛ ma nda pece ni iyi nɛ Ama nda iwɛ maa kede bụratụ mi na ma ana iwɛwɛ tɛnda o; N zhɛ mo utogo unu mu[20] na aka na ta atwa awɛ gwumwongonu ne mi.

²N namɛ shiruu, N dumanɛ shɛ n-ndumwa okwo mu ko, kwo kaa iyi ibiye ye elele o! Ama ụbaụta mu kiri wa kaana tụwụmangwụ,

³amɛ-tụhaŋtụ shini amɛ mi. Gana na ta Ama haŋsa, gobwonu du kaa amɛ-tụhaŋtụ mi a kaana ugombo; N eri shi ma ganga kaa tụlụpa o.

⁴Oo AGWANGWAMA, M mbiseni ukwunanga uraiŋ mu, keeni ufwugwo ijitɛ mi; M mbishi gana na tu uraiŋ mu zhɛ wa kwunanga kakayɛ.

⁵Hioko gana na abɛ njɛ urugbo mu maa u nama kpendere! I shɛ maa uraiŋ mu tiya kaa ubu shanɛ shɛ iyi elele o. Iwɛ-tɛkana okwo bụtụ be elele na ba hwungwa, bɛ shɛ gana mpiala mi inyɛnu kwakwa,

⁶iwɛ-tɛkana bụtụ hwuri shi uzhizhi o! Iyi elele nɛ kaa baa nda i shɛ bohondo; bo sutongono uduciya, ama bi mepi shi kaa bụtụ na zhɛ ba 'yaga uŋ.

⁷AGWANGWAMA, imbe kwuuŋ Ngaa ta shɛlanɛ yaa? Gabụ kaa bɛ shɛ ya ashɛlatụ mi.

⁸M bicinji nu undwa mu tubwada kpaaŋ, to lono maa shɛlagwụ shɛ na ma hinga ilɛtu o.

⁹N zhɛ ma nama shiruu, N zha shɛ ma dumana n-ndumwa okwo mu ko, iwɛnɛ ti yaa shɛ gabụ bɛ n njɛ gana ata.

¹⁰Ta ma kaana ya ulwapɛ tụpana o! N zhɛ mo 'wo iwɛ ifelu nɛ u'ala bụ n sukakanɛ ni ibɛ.

¹¹Aka na aba pana bụtụ ulwapwɛ na tɛtazhagagana iwɛ iwɛwɛ ibwɛ, nazhɛ ɛbi zhɛ ba nda uduciya ubwa ufwu gana ụ'nyasụ. Iwɛ-tɛkana bụtụ hwuri shi mpiala na ma banɛ ni inyɛnu o.

¹²Oo AGWANGWAMA, hwuga adua mi, shɛlaga kaa n'ungwa mi mi; to sumongo u'wo mu o! N shɛ gana eshi mi kpaaŋ; gana ta bulashɛ na zhɛ ba kashɛka kakayɛ.

¹³N genji Ngooko iwɛ maa ma 'yaga amɛ-olom oko cwɛŋ, nazhɛ mo hwulo maa kede ma nama ya o!