Read bassa SHƐZUNGA TUZUNGANGANA AGWANGWAMA 40 Bible Online

SHƐZUNGA TUZUNGANGANA AGWANGWAMA 40 - bassa bible

SHƐZUNGA TUZUNGANGANA AGWANGWAMA 40

¹No Ofwo Iyɛri ya Azụnjɛ. Azunga na ge Devid Zunganganɛ AGWANGWAMA N 'imɛ-isɛbwɛ tebiye Ngaa 'yacɛ AGWANGWAMA; nazhɛ bee n zhileni acɛbɛ, baa hwụjɛ kaa n'ungwa mi mi.

²Ubwa n vwɛ nu ushapa tu'wo, no olugwo udwodwo, bee shikicinji ɛvwɛvwɛjɛ mi nu uparatayɛ dimi.

³Ubwa m mbisegeni maa ma zunga azunga ofwo, azunga tɛshɛtana Agwatana tu. Atwa ofwugwo na kwụbɛ iŋ, inyɛsɛ zhɛ ya sha aŋ, nazhɛ ɛɛ zhɛ a patana AGWANGWAMA rishe.

⁴Atwa na patanɛ AGWANGWAMA rishe gwoje, a na vwụrɛ shɛ maa e zhegeni ntatanuwaŋ, a na kaa momo togwu su na atwa na a zhɛba tuwa tu tukata.

⁵Oo AGWANGWAMA na shɛ Agwatana tu, iyi nɛ abu tu ndwanua gembi ufwugwo; i zasa bụtụ na namba eri ba manga na bụ o! Gabụ kaa bɛ tɛ imanganɛ iyi i'wɛtwɛ nɛ gembi ufwugwo. N eri shi kwukwuŋ me sweji iŋ kpaaŋ ibɛ, ufwugwo ibɛ hwuleji ugombo!

⁶Ta arụpɛ, ta apwaŋ, a bu kwụlanɛ shɛ ya o; bụ lụpɛ shɛ ya kaa ụrụpɛ tuhwoŋzhingo kwo kaa arụpɛ na zhɛ o sugo iwɛwɛ o. Ama gabụ bu m peni acɛbɛ na maa ma hwuga iwɛ bu.

⁷Nazhɛ Ngɛɛ hiɛŋ, Gamba na; iwɛ mi kaa 'nyeci nu utakada ata bụ u tukwungwulo.

⁸Oo Agwatana mi, mo lubo ukwulana bụ tɛnda! N untanganɛ kaa undwa bụ na amɛ mi.

⁹Oo AGWANGWAMA, ma duma anabarɛ ebiye bu na tu'ulwatagwụ ta atwa bu kpaaŋ maa gabụ bi ti bicinji. Bi mepi du kaa maa N zha shɛ ma ganga iŋ tụdụma kwukwuŋ.

¹⁰M mama untangananɛ shɛ anabarɛ ebiye ubino bu iwɛ mi ngooko; aka elele a duma iwɛ tɛcara tụ bụ keeni iwɛ timbiyono tụ bụ. Aka na ta atwa bụ ụlwatagwụ kpaaŋ N genji shi iwɛ tɛcara keeni iwɛ tulubo tụ bụ tụ 'wụtụ tụdụma o.

¹¹Oo AGWANGWAMA, ta ganga inyɛmɛnyɛmɛ mi tihioko kwukwuŋ. Go tulubo tụ bụ ti tikpeke keeni tɛcara tụ bụ tu na ma ngbaraka tutuu.

¹²Ụbaụta ufwugwo n rungwutwonu, u hwuleji ti'imanjɛ! Iwɛwɛ mi i n vwuteni ya, N eri shi ma kwụba ya okwo uhwaŋna o; i gembi ufwugwo yee hwuri tihiŋzhe tu uhiuhiu mu, M mama zasa ya o.

¹³Oo AGWANGWAMA, n leshiji hwuwayɛ go! Oo AGWANGWAMA, nda kakayɛ maa m mbiyeni!

¹⁴Ge ezuye shɛ atwa na ma n jala tụkwụna hwɛɛ aba maa ge iyi elele sukwutwogonu aŋ. Ga atwa na yaa kwụlanɛ maa ge iyi iwɛ i n vwutengeni, e gwuri mabaaba maa ụpụrụsa 'imɛ aŋ.

¹⁵Ga atwa na ma n nda acacambura e leyegeji maa ezuye shɛ aŋ!

¹⁶Ama ga atwa elele na ma bụ 'wa e bweji unyasa na amɛ-olom; ga atwa na o lubo ubino bu a na duma aka elele maa, AGWANGWAMA ubwa gembi.

¹⁷Oo AGWANGWAMA, N shɛ bukofwo keeni bụtụ bi tiriri, ama isɛbwɛ mi kaa ibu 'wi shi o. Gabụ bɛ shɛ Bileleji mi na Agwatana mi; njɛ kakayɛ maa m mbiyeni!