Read bassa SHƐZUNGA TUZUNGANGANA AGWANGWAMA 45 Bible Online

SHƐZUNGA TUZUNGANGANA AGWANGWAMA 45 - bassa bible

SHƐZUNGA TUZUNGANGANA AGWANGWAMA 45

¹No Ofwo Iyɛri ya Azụnjɛ: Azunga-Ụzhɛla na Miaụŋ-me-eyi mu Kora mu Zunganganɛ AGWANGWAMA; Azunga Tulubo N-ndumwa ma shɛzunga shɛ na shɛ pilanụ mi shini ahaŋsa mi, gana na Ngaa imanganjɛ shụ iwɛ agwuma. Gana bi'intwa be ti'nyeci bi biye, bụratụ mi mama 'imɛ maa shilo-ụzhɛla ne tugwoni.

²Gabụ bu pilanụ igbɛtɛtɛ bu hwuri miaụŋ ma atwa hwɛɛ; n-ndumwa mụ bụ mɛ shɛ tulubo ti biye tu baba, iwɛbɛ po Agwatana ma bu pana uwebiye tutu unyizo-nom.

³Oo gabụ agwuma ikɛnyi; Hwuŋtono utokwobi bu no okpongwu bu, gabụ bi 'yajɛ ụjɛrụma keeni igɛhi!

⁴Patana igɛhi bu maa na suka maa zhe no ofwo tụlasụ iwɛ iwɛ-tɛkana bu keeni tiririri tụ bụ! Ukpahiŋ bụ zhɛ ma bu lasagwụ tụlasatagwụ tụ 'wụtụ 'wụtụ!

⁵A'inla bu lacɛmɛ ibɛ po ee tegeni shɛgba sha atwa i'ime bu ee tenenji; ibɛ po du edenji 'waŋ nɛ ɛvwɛvwɛjɛ bu.

⁶Cɛnjɛ-ta-tugwama[21] tu na Agwatana ubu peni ti zhɛ ta nama tutu unyizo-nom. Gabụ kaa bi zhɛ ba sha agwuma atwa bu ne tiririri.

⁷Gabụ bo lubo tiririri obo imo tugworozwo. Iwɛbɛ po Agwatana na shɛ Agwatana bu, ubu teri bee bu keeni unyasa ụ'wụtụ tududugono uhwuri shɛgwuma shɛ vwɛ.

⁸Ụhiụŋ iturɛre muru keeni alos keeni kezia namɛ no otogwo bu; rụhwụŋ ri i'nyemi 'nyemi nɛ aa 'nyama nu ukpogwu ihwɛ nɛ oo mo ne ene adagba ru bu lemicinji amɛ tebiye.

⁹Miaụŋ ma shɛgwuma mu zweni na ashashɛ eyikwo bu ụjɛrụma, ibɛ po biyikwo ba agwuma tuba shikeni nu u'ala ubiye idwɛtwɛ bu, bee urigeni i'wɛŋnɛ nɛ ee ndepengeni azhɛnarɛya na ngezeni nu ụzhɛ kpaaŋ.

¹⁰Oo e-biyikwo ba agwuma, shɛlaga iwɛ mi, ga isɛbwɛ ya atwa na abu 'yajɛ ụmatụ na aba keeni ihwɛ bishi bu ibu 'wi.

¹¹Tupilanụ tụ bụ ti zhɛ ta nda maa ga iwɛ bụ kwụlanɛ agwuma; ubwa shɛ agwuma-ihwɛ bu, ibɛ po yaa shɛ i tilɛɛ maa na hwuga-unu ubwa.

¹²Atwa Taya zhɛ ma bu 'waŋnanɛ apwaŋ; azhɛgba zhɛ a makana maa a lasụ iwɛ bu tumapa.

¹³Yɛu-yo-o ya agwuma namɛ nu ukpogwu wa agwuma, bu pilanụ tebiye! A nɛ utogwo ubwa ni ihwehwe ya azhɛnarɛya.

¹⁴Bu urigeni utogwo ti'nyeci tu tuswoswoswo ibɛ po ee zeriji bu no ofwo agwuma, onyotumo ubwa a na te mepi shi etwenyi 'wa bụ, ibɛ po ee suje aŋ du no ofwo ubwa na shɛ agwuma.

¹⁵E zeriji aŋ ee teni nu ukpogwu wa agwuma nu unyasa keeni amɛ-olom.

¹⁶Gabụ agwuma mi, miaụŋ-me-eyi mu ufwugwo mu na ɛbi zhɛ ba 'yaga, muba mi zhɛ mo tono ụtarụtụ we eshi bu gana shɛgwuma, gabụ kaa bi zhɛ ba nda aŋ maa a shɛ ehiu na cɛnjɛ tu unyizo hwɛɛ.

¹⁷N zhɛ ma nda maa ga awaŋnɛ elele ne bi teyinje tutu unyazo-nom. Ibɛ po atwa elele zhɛ ma bụ shɛtana tutu uuwa unyizo zhe gwure.