Read bassa SHƐZUNGA TUZUNGANGANA AGWANGWAMA 5 Bible Online

SHƐZUNGA TUZUNGANGANA AGWANGWAMA 5 - bassa bible

SHƐZUNGA TUZUNGANGANA AGWANGWAMA 5

¹No Ofwo Iyɛri ya Azụnjɛ: nɛ yo Hwulo Akpasana: Azunga na ge Devid Zunganganɛ AGWANGWAMA. Oo AGWANGWAMA shɛlaga n-ndumwa mi mi, maa hwụjɛ tungwulo ti mi.

²Agwatana mi na Agwuma mi, shɛlaga n'ungwa mi mi maa m mbiyeni, iwɛnɛ po pụ bụ Ama nda adua mi!

³Oo AGWANGWAMA, gabụ ba hwuga rụhwụŋ ri mi nu uvwungwa uvwungwa; gabụ Ama pana arụpɛ mi tu uwaŋna kwuni tubanɛ, ibɛ po Ngaa shɛlanɛ ya ajɛshɛgwa bụ.

⁴Iwɛnɛ po bɛ shɛ shɛ Agwatana na a nda unyasa no tugworozwo; bi leneni shi kaa iyi iwɛ maa i nama na agba bụ o.

⁵Atwa ishɛkɛ kaa eri shi o shikono ne eshe bu o; gabụ kaa bo imo atwa elele na a nda iyi iwɛ.

⁶Gabụ be iricingo ejwe-ụzagwụ kpaaŋ; AGWANGWAMA kaa a nda inyizhi ya atwa na a kwụna atwa keeni ehelekeci.

⁷Ama iwɛ tulubo ta ata tụ bụ tụ 'wụtụ ibɛ po Ngee eri mo tono nu umwono bu; N eri ma bụ zhɛba nu umwono bu tijilo maa Mo bu kwuzono ni inyɛsɛ tụsụma.

⁸Oo AGWANGWAMA, na ma n 'yagaga ne tiririri tụ bụ, iwɛ atwa i'ime mi! Nda uhwaŋna bu gbelee maa mo dulo.

⁹Bi eri shi ba tɛtana iyi nɛ aa duma rishe o; iyi ufwu tɛnda kiri i shini na shɛmɛ sha aba. Orworwo aba a shɛ u'uye na haŋpɛ, ni irɛtu ya aba aa duma n-nduma mu tuhalakaka.

¹⁰Oo Agwatana, pana aŋ n-ndumwa-tụwụma, ga tuhaŋsa ta aba tu 'waŋtatanjɛ aŋ. Unzo aŋ maa e beni na agba bụ iwɛ andwa aba ofwugwo tubwada, iwɛ tuhwotono ta aba pụ bụ.

¹¹Ama ga atwa elele na ubu to aba na bwada unyasa; ga a na zunga azunga unyasa aka elele. Na jilanɛ atwa na o lubo izeci bu. Gabụ kaa bi zhɛ bo gombicingo aŋ.

¹²Oo AGWANGWAMA gabụ kaa ba pana atwa tiririri uwebiye; iwɛ bụ tumapa kaa ibɛ ya jilanɛ aŋ gana abula ujasa.