Read bassa SHƐZUNGA TUZUNGANGANA AGWANGWAMA 50 Bible Online

SHƐZUNGA TUZUNGANGANA AGWANGWAMA 50 - bassa bible

SHƐZUNGA TUZUNGANGANA AGWANGWAMA 50

¹Azunga na ga Asaf Zunganganɛ AGWANGWAMA Agwatana na Hwuri Kpaaŋ, ubwa shɛ AGWANGWAMA, ba duma iwɛ; baa suyanɛ cɛnjɛ tu unyizo hwɛ hwɛɛ te kwune nu uwaŋna-banụ tutu uwaŋna-twonuo.

²Agwatana a ta nu Zayon, ubwa shɛ ụshɛpwụ ata tupilanụ tu bwa tu ulwa nụ ụzhɛ.

³Agwatana tu e ci ba, ama bu zha shɛ ba nama shiruu o; ulwa na wo hwoŋzhingo iyi kwunduu namɛ nu umbe ubwa, uvwugo ụ'wụtụ na wa sha bụtụ inyɛsɛ kaa rungwutwonu bu.

⁴Ba suyana azuba keeni cɛnjɛ tu unyizo ti bɛɛ zhɛ baa duma ụshɛrɛya wa atwa ubwa.

⁵Bɛɛ hiɛŋ, Sotulonu ma atwa mi tɛcara pi mi, aba shɛ atwa na a twa-unu ne mi tedure nụ ụrụpɛ tuta.

⁶Ibɛ po azuba enenji maa Agwatana ubwa shɛ tiririri, maa ubwa du kaa ba kwunanga ụshɛrɛya.

⁷Oo ahiɛba atwa mi, shɛlaga ma, N zhɛ ma dumana iwɛ; N zhɛ ma hi la tiseyida tu na ti zhɛ tu ma hi wumana, ahiɛba atwa Isrɛl, Gamba Agwatana, na shɛ Agwatana hiŋ na.

⁸N hi tezhigeni shi iwɛ arụpɛ hiŋ o; hi me n sugeni kaa apwaŋ tuhwoŋzhingo aka elele.

⁹Okwo ti yaa shɛ gana ata, N jeri shi inɛ ye eyi nu nsono mi hiŋ o, kwo kaa epi nsumo mi hiŋ o;

¹⁰Gamba n 'yajɛ isundɛ elele nɛ zweni nu uwapa, keeni inɛɛ nɛ namɛ ne tikpekwu ti igbɛɛ igbɛɛ.

¹¹M mepi shanụnụ she elele shɛ na sha hila kpaaŋ, Gamba kaa n 'yajɛ iyi-uumwa ye elele nɛ yo rungo ne ehilo.

¹²Yaa shɛ imunɛ i n gwụmɛ, N zha shɛ mo hi mbiso, iwɛnɛ tu unyizo keeni iyi elele nɛ zweni nu bwa i shɛ inee mi.

¹³Ma ya suu usunda inɛ, okwo ma swa mehieŋ mi iyweywe?

¹⁴Ga shɛ ụrụpɛ wa a'walụ ahiɛ ma m pana Gamba Agwatana hiŋ, maa peni Bụtụ ata Hwuri Kpaaŋ iyi nɛ ehi shileji-unu ibɛ kpaaŋ.

¹⁵N suyanɛ ma na aka na ta amɛ-tụhaŋtụ ihi vwuteni, N zhɛ ma hi lashaga, nazhɛ ɛhi zhɛ hi ma m pana ụjɛrụma.

¹⁶Ama Agwatana hiɛŋ ogworozwo, Imbe bwa shɛ inee hiŋ no onu mi tụpana ehie sweji aaŋ? Iwembe bwa po ahia dumanga iwɛ unu mu tutwaa?

¹⁷Iwɛnɛ po hi jeri shi maa mo hi vwulo; hi jineci kaa n-ndumwa mi mi.

¹⁸Ahiɛba hiɛ shɛ eyejilo ozundo elele na ahiɛ kwụbɛ, ohi momo togwu na anjɛ-tuwɛle.

¹⁹Aka elele n-ndumwa mi ci'nyɛ kiri aba duma; gabụ kaa bu ngwuri shi ụzagwụ-tudwa kwukwuŋ.

²⁰Gabụ bo gbozhigo yɛu-bino bu aka elele, gabụ kaa ba shana yɛu nɛ go nobu meci iwɛ.

²¹Gabụ bu nduwa ijɛ kpaaŋ, N dumanɛ shɛ iwɛ ye elele o, iwɛbɛ po ebi heŋshi maa N shɛ gana bụ. Ama hwuwayɛ go M bu tazhɛganɛ, ma bu barɛshɛgana iŋ kaa nu umbe bu kpataa.

²²Shiyono ma ijɛ eshe, ahiɛba na isɛbwɛ mi 'wi, shibwonu N zhɛ ma hi nda ufwu, i zasa kaa bụtụ be elele namba maa ma hiɛ lashaga o.

²³A'walụ tusuje a shɛ ụrụpɛ na ma m pana ụjɛrụma, N zhɛ kaa mo bicingo atwa elele na a hwuga-unu mu tilɛɛ.