Read bassa SHƐZUNGA TUZUNGANGANA AGWANGWAMA 51 Bible Online

SHƐZUNGA TUZUNGANGANA AGWANGWAMA 51 - bassa bible

SHƐZUNGA TUZUNGANGANA AGWANGWAMA 51

¹No Ofwo Iyɛri ya Azụnjɛ: Azunga Devid, na Aka na ga Natan Zhaganɛ bụ na aba na ti ge Devid Weci na Batsheba Oo Agwatana, hioko inyɛmɛnyɛmɛ mi, gana na to tulubo tụ bụ ti tikpeke tu namɛ. 'Woricingo undwa mu tubwada hwɛɛ tedure ni inyɛmɛnyɛmɛ ɛtɛ bu i'wɛtwɛ!

²Nyashɛnga iyi iwɛ mi hwɛɛ maa n njɛ shɛshɛshɛ ni iwɛwɛ mi!

³Iwɛnɛ po M mepi andwa mi tubwada; Eme teyinje kaa iwɛwɛ mi aka elele.

⁴Gabụ gobuko kiri Ngaa njɛ iwɛwɛ ɛtɛ, N nduwa kaa ijɛ ɛtɛ nɛ shɛ iyi iwɛ ne eshe bu. Iwɛbɛ po ebi teni cɛŋ maa jɛmɛ ụshɛrɛya mu; gabụ kaa n-ndumwa mɛ zhɛmɛ te bu m peni n-ndumwa-tụwụma.

⁵Hioko, ni iyi iwɛ bino mi le ofubo mi; N shɛ kaa bụtụ bi iwɛwɛ taa nụ ụjita na e m meci.

⁶Iyi nɛ i shɛ iwɛ-tɛkana ibɛ aba jalakaka na amɛ na amɛ mi; iwɛ ecilo ata shidingo ti'inta tụ bụ taa tuta ta amɛ mi.

⁷M besheji ni hisop[25] maa ma nama shɛshɛshɛ; N nyashɛnjɛ maa ma cɛnjɛma pawụụ uhwuri bizhe,

⁸Lono[26] maa ma hwuga rụhwụŋ ru unyasa keeni ma rụ rụ amɛ-olom; iwɛ maa okwo o'umpwo mi na ebu bwereteji, a na bwadanana unyasa.

⁹Pashɛnga eshe bu ni iwɛwɛ mi, wafwaga iyi iwɛ mi kpaaŋ.

¹⁰Oo Agwatana, n ndanɛ amɛ tishɛshɛshɛ, maa kaa zweni mpiala mu ufwo mu naa na mi teni cɛŋ na amɛ mi.

¹¹Ta ma bacɛnga na agba bụ o; ta bacɛnga kaa Mpiala mụ bụ mi Tijilo na amɛ mi o.

¹²N gwuricingeni unyasa ata ubino bu, maa m peni mpiala mụ bụ mu tukwulangana maa mi n shikicinji dimi.

¹³Nazhɛ Ngɛɛ zhɛ mo mbisogono atwa na a bwada andwa bụ iyi, maa atwa iwɛwɛ gwure pụ bụ.

¹⁴Oo Agwatana, no mo bicingo maa kede mu na kwụna atwa na zasa tụwụma o, gabụ kaa bɛ shɛ Agwatana na mo m bicingo, maa mu na zungangana tiririri tụ bụ a zunga.

¹⁵Oo AGWANGWAMA, m mbiyeni maa ma ala iwɛ tụdụmana, iwɛ maa Mu na bu shɛtana.

¹⁶Iwɛnɛ po bi jeri shi ya arụpɛ o, shibwonu N ngɛ zhɛ ma bu pana aŋ; amɛ bụ kaa lemi shi na arụpɛ tuhwoŋzhingo.

¹⁷Oo Agwatana, ahaŋsa timeme zucinje ibɛ shɛ ụrụpɛ mu; bu zha shɛ kaa bo jinoko bụtụ na meme zucinje, na kaa jɛshɛrɛjɛ ahaŋsa o.

¹⁸Oo Agwatana, mapana atwa bu Zayon iwɛ maa ndanɛ uŋ iyi ibiye; maanana uba Jɛrusalɛm.

¹⁹Nazhɛ amɛ bụ zhɛ o lomo na arụpɛ ebiye, keeni arụpɛ bu tuhwoŋzhingo; keeni esemberi inɛ nɛ ɛɛ zhɛ ma bu kwunanga nu utukwu-ụrụpɛ bụ.