Read bassa SHƐZUNGA TUZUNGANGANA AGWANGWAMA 55 Bible Online

SHƐZUNGA TUZUNGANGANA AGWANGWAMA 55 - bassa bible

SHƐZUNGA TUZUNGANGANA AGWANGWAMA 55

¹No Ofwo Iyɛri ya Azụnjɛ: Azunga ụzhɛla na ge Devid Zunganganɛ AGWANGWAMA ni iyi Ti'nyama nɛ 'Yajɛ Ihwehwe Oo Agwatana, hwuga adua mi; Ta ngbaraka tutabwa ti mi cwɛŋ o!

²Shɛlaga iwɛ mi maa n jishijɛ; shɛmɛ-shɛ-tụhaŋtụ shɛ n lasatagwụ.

³N-ndumwa mu na atwa i'ime mi mo m mbisogo mu hwuleji ugombo, umungwuta na ogworozwo ma n nda kaa m bwereteji. Iwɛnɛ po e me sugeni shɛmɛ-shɛ-tụhaŋtụ; a nda isɛbwɛ ne mi oo mo 'imo kaa.

⁴Uriri u n 'imɛ tebiye, inyɛsɛ tu'wo kaa i n shɛ tebiye.

⁵Inyɛsɛ keeni tɛzhɛgɛda i n 'imɛ; tuholono tu n lasụ.

⁶Ibɛ po Ngɛɛ hiɛŋ, Oo Ngaa nga 'yajɛ apiambɛ gana ikwucime, N ngɛ zhɛ ma hila maa ma dwalakaka ofwo ụhinjanụ.

⁷N ngɛ zhɛ ma hila taa dụlụ maa ma ma ihwɛ mi nụ ụshɛka.

⁸N ngɛ zhɛ m mama ndana idile maa ma banangana uvwugo ga ụ'wụtụ keeni eshilo na rimeni.

⁹Oo AGWANGWAMA, sukwutogo rɛjɛmɛ[32] ra atwa i'ime mi! N kwụbɛ abwagara keeni tukobu kobu nụ ụshɛpwụ ata,

¹⁰o rungwutwonu uba ubwa tu uwaŋna tụ ụjita, ee shidinji uŋ na alaacɛ keeni amɛ-tụhaŋtụ.

¹¹Ufwu tɛnda kaa namba geri elele; umungwuta keeni amɛ tuma barɛ ne ekpekiti.

¹²Yaa ga shɛ bụtụ mi bi i'ime bu ko ga ma n twagajɛ, N ngɛ zhɛ ma ima-isɛbwɛ; yaa ga shɛ bụtụ na ma n sukakana mo mbisogo ishɛkɛ, N ngɛ zhɛ ma swakana bụ.

¹³Ama kaa gabụ bụtụ mi bi yebi, binya mi, biyejilo mi be eligidi.

¹⁴Atubana bụ ta shana ta dumanga ushaura ụlatụ na binya, ta shana ta twa ikpɛngwu zhiaaŋ nu umwono wa Agwatana.

¹⁵Ga atwa i'ime 'wi tobwolo aka aba te ci shi o; ge e zwi ne e'uye buumwa buumwa! Iyi iwɛ namɛ nu nhwaŋ ma aba keeni shɛmɛ sha aba.

¹⁶Ama N suyanɛ AGWANGWAMA na shɛ Agwatana maa mo m mbiyono, ubwa kaa zhɛ mo m bicingo.

¹⁷Uswejinu mu keeni ti'nyongo ti mi to mungo pu bwa, tu uvwungwa, tu uwaŋna keeni ụjita; bi zhɛ kaa ba hwuga rụhwụŋ ri mi.

¹⁸Bi zhɛ me n jicinje lapiya na ajasa na Ama nda na atwa i'ime a na gembi ufwugwo tebiye.

¹⁹Agwatana na jɛjɛ ni idwɛtwɛ ibwɛ unyizo-nom, zhɛ ba hwuga iwɛ mi, bɛɛ zhɛ kaa ba fwuga aŋ; iwɛnɛ ta a lacɛ tisheyingo,[33] a njɛ shɛ kaa inyɛsɛ ya Agwatana o.

²⁰Bụtụ mi bi yebi kepengeni eyejilo ubwa; be bweji onu na be ge shileji.

²¹N-ndumwa mu bwa mi gbelemi gana bụgụga, ama i'ime kaa namba na amɛ ubwa; n-ndumwa mu bwa mu namɛ nɛnjɛɛ, gana manɛbɛ, ama ma shɛla kaa bụtụ gana utokwobi.

²²'Wanga AGWANGWAMA shɛmɛ-shɛ-tụhaŋtụ[34] shɛ bụ, bi zhɛ ma bu lashaga; bi zha shɛ bo lono kwukwuŋ maa a fwụjɛ atwa tiririri.

²³Ama oo Agwatana, gabụ bi zhɛ bo zucingo akwụnɛ ata wa atwa keeni ejwe ata ụzagwụ ne e'uye tobwolo e te ci shi okwo ashashɛ uraiŋ wa aba tiya o. Ama yaa shɛ Gamba, N zhɛ ma bụ patana-rishe.