Read bassa SHƐZUNGA TUZUNGANGANA AGWANGWAMA 56 Bible Online

SHƐZUNGA TUZUNGANGANA AGWANGWAMA 56 - bassa bible

SHƐZUNGA TUZUNGANGANA AGWANGWAMA 56

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA na Aka na ta Afilistia 'Imɛ bụ na Amɛ Gat Oo Agwatana, hioko inyɛmɛnyɛmɛ mi, iwɛnɛ ta atwa ma n kapangana ni ifelu; atwa i'ime mi kaa ma n shɛka aka elele.

²Atwa i'ime mi ma n kapangana uuwa gụ ụrụmɛ, atwa na kaa ma n sukakana ni ifelu na tumama sata gembi ufwugwo tebiye.

³Oo AGWANGWAMA, aka na Ama nda inyɛsɛ, gabụ Ama patana-rishe.

⁴Agwatana Ngaa patanɛ-rishe N njɛ shɛ inyɛsɛ o; Ma shɛtana bụ. Imbe butugwumwa bu tukwakwa eri ma n ndaa?

⁵Atwa i'ime mi o pingotongo n-ndumwa mi mi uuwa gụ ụrụmɛ; aka elele a na imanganga maa a n gwụcɛnjɛ.

⁶O sotulongonu no ofwo tusweci; aa ngbaraka iyi elele nɛ ma nda; a shɛlanɛ maa a n kwụnɛ.

⁷Oo Agwatana, tụpana aŋ[35] iyi iwɛ nɛ aa nda; 'waŋtatanga atwa ata ni isɛbwɛ bu!

⁸Bi mepi ohwulu mi tuhoroko; gabụ kaa ba rɛta malaba mi mi. I 'nyeci shi suu nu utakada bụ?

⁹Asha nụ ụjita na Ngaa bu suyanɛ, nazhɛ atwa i'ime mi zhɛ o gwulo mabaaba. M mepi inɛ gɛ: iwɛnɛ ta Agwatana shɛ bi nee mi.

¹⁰Ma shɛtana Agwatana iwɛ n-ndumwa mu bwa mu na baa jɛmɛ. Ma shɛtana AGWANGWAMA iwɛ unu bwa na bee shiri.

¹¹Agwatana ata Ngaa patanɛ-rishe, N zha shɛ kaa ma nda inyɛsɛ o. Imbe butugwumwa eri ma n ndaa?

¹²Oo Agwatana, N zhɛ ma bu pana iyi nɛ Ngee shiri-unu ibɛ; N zhɛ kaa ma bu pana upwaŋ mu wa a'walụ.

¹³Gabụ kaa bu n leshiji no tu'wo, maa kede e n kelegeji o. Ibɛ po ma zha tahaŋnụ na agba Agwatana, na amɛ uhioko-uhwaŋna uraiŋ.