Read bassa SHƐZUNGA TUZUNGANGANA AGWANGWAMA 59 Bible Online

SHƐZUNGA TUZUNGANGANA AGWANGWAMA 59 - bassa bible

SHƐZUNGA TUZUNGANGANA AGWANGWAMA 59

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA, na Rụhwụŋ rụ na ri hiɛŋ, Te iricingo iyi Elele Kpaaŋ o. Ibɛ shɛ na Aka na tu go Soul Tumwanɛ Atwa maa o Gwubogo Ihwɛ ibwɛ maa Kwụna bụ Oo Agwatana mi, n leshiji no olugwo atwa i'ime mi; n jilanɛ iwɛ atwa na ma kapangana.

²N leshiji no olugwo atwa ata awɛ; n lesheji no olugwo akwụnɛ ata wa atwa.

³Oo AGWANGWAMA, hioko! E gwubeji maa a n kwụnɛ; atwa ata shimiaụŋ a n ụlwataganụ. I shɛ shɛ maa n njɛ iwɛwɛ kwo kaa m bweji undwa kwukwuŋ o,

⁴Oo AGWANGWAMA, i shɛ shɛ maa N 'yajɛ tụwụma te elele upo a nda kakayɛ maa a mama imanjɛ maa e n kepengeni o.

⁵AGWANGWAMA na shɛ Agwatana na Hwuri Kpaaŋ, zhajɛ maa m mbiyeni; Agwatana Isrɛl, kwụba ni ikɛnyi bu! Ishijɛ maa peni atwa na shɛ oto-ụrụpɛ ulwapɛ! Te hioko inyɛmɛnyɛmɛ ya atwa na o mbiyono atwa i'ime mi o!

⁶E gwure nụ ụrụmɛ we elele, ee sure nyarɛrɛ gana shiwawa, ta a hwala ụshɛpwụ ata.

⁷Shɛlaga tutwa ta aba keeni tuhaŋsagana tụ wɛ tu na aa ma n haŋsagana. Irɛtu ya aba i shɛ gana otokwobi, aba kaa a haŋsa waa maa i zasa bụtụ ba hwuga iwɛ nɛ aa duma o.

⁸Oo AGWANGWAMA, gabụ ba hinga aŋ ilɛtu; aba nda kaa oto ata ụrụpɛ kpaaŋ asada.

⁹M patanɛ ukpahiŋ bu rishe;[39] Oo Agwatana, gabụ bɛ shɛ bikepi mi.

¹⁰Agwatana mi zhɛ a zhajɛ pi mi no tulubo tu bwa ti tikpeke; bi zhɛ bo lono maa ma ngbaraka to o rukoto atwa i'ime mi.

¹¹Oo AGWANGWAMA, ta kwụna aŋ o, shibwonu isɛbwɛ zhɛ yo 'wo atwa mi; gabụ na bɛ shɛ abula ujasa tu, garataga aŋ maa zucinji aŋ nu ukpahiŋ bụ.

¹²Iwɛwɛ namɛ na shɛmɛ sha aba; ibɛ po n-ndumwa mu unu wa aba kpaaŋ mɛ shɛ du iwɛwɛ; ga tumama sata ta aba tɛ 'imɛ aŋ! Iwɛnɛ ta a twaga tutwa, aa dwa-ụzagwụ,

¹³Iricingo aŋ ni isɛbwɛ bu; iricingo aŋ hwɛ hwɛɛ aba maa kede a nama ya o. Nazhɛ bụtụ be elele zhɛ ba mapa maa Agwatana ubwa ga 'yajɛ ụhwada ni Isrɛl, maa kaa ụhwada ubwa u zhe tutu rungwutwonu unyizo kpaaŋ.

¹⁴E gwure nụ ụrụmɛ, ee sure nyarɛrɛ gana shiwawa, gana na aa hwala ụshɛpwụ ata.

¹⁵O rungo gbom gana na aa jalakaka iyimɛyɛ, o no ngwulo ni isɛbwɛ ti yaa shɛ ee gwushiji shi iyi nɛ shiji aŋ.

¹⁶Ama N zhɛ ma zungangana ukpahiŋ bụ azunga; N zhɛ ma zungangana tulubo tụ bụ ti tikpeke azunga gbada gbada nu uvwungwa we elele. Iwɛnɛ ti yaa shɛ gabụ bɛ shɛ bikepi mi keeni uhwuŋnu mu na aka ụbaụta mu.

¹⁷N zhɛ ma bu zungangana azunga ashɛtwa, gabụ bileleji mi. Agwatana mi na shɛ bikepi mi, ubwa shɛ Agwatana na mo n lubo duwa.