Read bassa SHƐZUNGA TUZUNGANGANA AGWANGWAMA 60 Bible Online

SHƐZUNGA TUZUNGANGANA AGWANGWAMA 60 - bassa bible

SHƐZUNGA TUZUNGANGANA AGWANGWAMA 60

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA maa Mbisogono Atwa, na Aka na tu baa Twa ifelu na Atwa Aram-naharaim keeni Atwa Aram-zoba. Ibɛ shɛ Aka na tu go Joab gwure ti bɛ Kwunɛ Atwa Idụm Igbɛɛ-icihiŋ (12,000) nu Ulomu-manɛ Oo Agwatana, bi ti jineci, abụ tụ 'wɛŋ; abu nduwa isɛbwɛ no tu; utu gwuricinje pụ bụ.

²Gabụ bi zhingiteni cɛnjɛ tu ga, ebi beji tu hwaa; nangangana ya tubagatagwụ ta tuba, iwɛnɛ ti tɛ ɛ zhɛ ta 'waŋtatangwụ.

³Gabụ bɛ njɛ maa ga atwa bu swe ụbaụta ụ'wụtụ; oo rungo ya golo golo gana atwa na mayaga ma ngba.

⁴Gabụ bi shikicingeni atwa na ma bu sụma inyɛsɛ igɛrigɛ iwɛ maa e berishiji iŋ maa e benengeni tu'wo ta a'inla.[40]

⁵Iti bicinji tedure nu u'ala bụ ukpahiŋ; jishijɛ adua tu, iwɛ maa atwa bụ a na obo lubo e benengeni.

⁶Agwatana jɛmɛ n-ndumwa no ohwolu ubwa tijilo,[41] bɛɛ hiɛŋ, N zhɛ mo bogotogwu Shɛkɛm na tụlasụ maa mo dwotwogonu atwa mi Ulomu Sukot.

⁷Gamba n 'yajɛ Giliad, keeni Manasɛ du; ge Ifrem ubwa shɛ ukata mu, go Juda ubwa shɛ okwuto mi tugwama.

⁸Go Moab i shɛ igbɛɛnibwɛ mi; N zhɛ ma 'wanga Idụm abida mi. N zhɛ ma kalana Afilistia n'ungwa mu tụlasụ?

⁹Oo Agwatana, gaaba zhɛ mo n tocingo nụ ụshɛpwụ ata 'yajɛ tukapaa? Gaaba zhɛ ma n zarɛga ni Idụm?

¹⁰Oo Agwatana, asha bi ti jineci ga mbowuu ree? Oo Agwatana, bu zhagajɛ shɛ kaa ne ejeshi tu maa e beni na bu o.

¹¹Iti mbiyeni na atwa i'ime tu; iwɛnɛ to timbiyono ta bụtụ ti te shi eshe!

¹²Agwatana namɛ geri tu, ti zhɛ kaa ta lasụ; ubwa zhɛ ba 'waŋtatanga atwa i'ime tu hwɛɛ.