Read bassa SHƐZUNGA TUZUNGANGANA AGWANGWAMA 69 Bible Online

SHƐZUNGA TUZUNGANGANA AGWANGWAMA 69 - bassa bible

SHƐZUNGA TUZUNGANGANA AGWANGWAMA 69

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA Oo Agwatana, m bicinji! Iwɛnɛ po meni mu munje me ci urworwo mu.

²Gamba na mo ilo nu udwodwo na iri, no ofwo na cɛnjɛ tu zasa ikɛnyi; N zhijɛ no ofwo na meni mi iri, tizhagajɛ ta muba kaa tɛ m mɛcɛ, too mo n sugo.

³N lukwumi nu n'ungwa iwɛ timbiyono, urworwo mu sụpanɛ. N hwuceci eshe mi Ngaa ngbaracɛ uhwaŋna iwɛ maa m mbiyeni.

⁴Atwa na o n to ni i'ime uzawa ecilo gembi ufwugwo ee hwuri tihiŋzhe tu uhiuhiu mu. Atwa i'ime a duma ụzagwụ iwe mi; a 'yajɛ ikɛnyi, aa jala maa a n kwụnɛ. A ma nda ni iji maa mo gwuricingo iyi nɛ Ngee nge zunji shi.

⁵Oo Agwatana, gabụ bi mepi ụlagwụ mu; tụwụma ti mi kaa tụ bụ swakanɛ shɛ o.

⁶Oo AGWANGWAMA na shɛ Agwatana na Hwuri Kpaaŋ; to mo lonono maa ma nda atwa na ubu tɛtanɛ rishe ezuye o! Oo Agwatana Isrɛl, to mo lonono kaa maa ma nda atwa na ma bu zhɛba ụpụrụsa o!

⁷Iwɛnɛ po iwɛ bu upo aa ma n twagaga, ibɛ po ezuye urigeni eshe mi.

⁸Ibɛ po Ngaa shanɛ miaụŋ-mo-bino mi gana bugaiŋ, Ngaa shanɛ kaa atwa ukpogwu mu gana bụtụ ba cɛnjɛ ti nya.

⁹Iwɛnɛ po tɛzhɛgɛdana ti iwɛ umwono bu tu ma n ya; tutwa tu na kaa aa ma bụ twaga tu n layɛtanɛ.

¹⁰Aka na Ama twa-u'wo[52] Ama nda ezumi, nazhɛ atwamwa ma n twagaga.

¹¹Aka na Ama nda ụcɛnjɛ, Ngee urigeni tugwuno tụ ụcɛnjɛ tɛnda, nazhɛ aa ma hinga ya ilɛtu.

¹²Atwa na jɛjɛ ne ekpekiti ụshɛpwụ a dumanga iwe mi, eswe-mayaga o n to azunga.

¹³Oo AGWANGWAMA, inee mi shɛ, pụ bụ Ama nda adua; Oo Agwatana, n jishijɛ na aka na ibi teneni cɛŋ. N jishijɛ iwɛ tulubo ta ata tụ bụ ti tikpeke tụ 'wụtụ, keeni iwɛnɛ aba ụrɛcɛnga onu bu tishilo.

¹⁴M bicinji maa kede mo ilo nu udwodwo ga o; n leshiji na atwa i'ime mi, n leshiji ne me'ilwo mi meni mu ga tedure na tɛcara tụ bụ.

¹⁵To lono maa tɛzhagajɛ te meni tu n suji o; to lono kaa maa mo ilo ne me'ilwo kwo kaa maa mo zwo nu u'uye o.

¹⁶Oo AGWANGWAMA, n jishijɛ, iwɛnɛ to tulubo tụ bụ ti tikpeke tɛ zhɛmɛ; gwure pi mi gana na ti iwɛ tumapa bụ gembi tebiye.

¹⁷Ta ma n swakana Gamba yɛu gɛ bu ugondu o; N namɛ na amɛ-tụhaŋtụ a'wụtụ, nda kakayɛ maa n jishijɛ!

¹⁸Zhajɛ maa n leshiji; n gwube na atwa i'ime mi.

¹⁹Gabụ bi mepi tutwa tu na aa ma n twaga, te ezuye mi keeni ụpụrụsa mu; gabụ kaa bi mepi atwa i'ime mi kpaaŋ.

²⁰Tutwa tu na aa ma n twagaga ti heshigeni amɛ mi tebiye, ibɛ po ahaŋsa mi gembi ufwugwo. N jelekeci bụtụ na maa yigana, okwo bu ko zasaba o; keeni bụtụ na maa ma n ingatanga, ama N kwụbɛ shɛ okwo bu ko.

²¹Aka na ti imunɛ i n gwụmɛ, mangayɛ ee m peni, aka na ti i'uyɛ i n gwụmɛ, ee m peni meni mu na mi sembi.

²²Gɛ iyimɛyɛ ya aba i shɛ ugwuru; ga tiyabwada[53] ta aba tɛ shɛ tuhwuŋzwo ta aba.

²³Ge eshe 'wi aŋ tishi maa kede a kwụbɛ uhwaŋna o! Nda aŋ maa a shɛ nkwuko aka elele!

²⁴Dudugono aŋ isɛbwɛ bu; gɛ isɛbwɛ bu tumunje jiteni aŋ.

²⁵Go urubwo wa aba ụ shɛ osombo, maa kede bụtụ be elele vwɛ ya no shidulo sha aba o.

²⁶Iwɛnɛ po a shɛka atwa ata[54] ebi peni ulwapɛ; aa dumanga ushaura iwɛ ụbaụta wa atwa ata na abụ gwụcanjɛ. Iwɛ maa e keeni amɛ-tụhaŋtụ nu ụngwụ wa aba tuhwuga ugombo.

²⁷Na kaangana aŋ ulwapɛ tụpana; to lono maa a 'yaga ụpadụ we elele nu ubino bu o.

²⁸'Woricingo nzeci ma aba nu utakada bụ uraiŋ; kede e 'nyeci nzeci ma aba na atwa bu tiririri o.

²⁹Ama ma nda ụbaụta nụ ụngwụ-tuhwuga; Oo Agwatana, n shepi na azuba maa m bicinji!

³⁰N zhɛ ma shɛtana Agwatana na azunga; N zhɛ ma ananga ugombo ubwa tedure na a'walụ.

³¹Inɛ ɛtɛ zhɛ yo lomicingo AGWANGWAMA amɛ uhwuri maa ma pana bụ buna be eyi, upwaŋ uhwuri ụrụpɛ tuta nu ugborofwu buna.

³²Ga atwa na aa nda umungwuta kwụbɛ iŋ maa amɛ aba lemi; gɛ i hicinjɛ shɛmɛ sha atwa na a zhɛba Agwatana.

³³Iwɛnɛ po AGWANGWAMA a shɛlagana atwa na ukekeshi iyi wa nda, bi keri shi kaa eye iwɛ atwa ubwa na namɛ nu umwono-tishi o.

³⁴Ga azuba keeni cɛnjɛ tu unyizo shɛtana Agwatana, tu ntokwu keeni iyi elele nɛ zweni na muba.

³⁵Iwɛnɛ po Agwatana zhɛ o bicingo atwa Zayon, bɛɛ zhɛ kaa ba maanana ashɛpwụ ata Juda. Atwa ubwa kaa zhɛ[55] a gɛga apata, ɛɛ zhɛ a 'yaga cɛnjɛ ta ata;

³⁶miaụŋ ma ajama ubwa mi zhɛ ma ya ogwu u tuba, atwa na kaa o lubo bu zhɛ a nama na tuba.