Read bassa SHƐZUNGA TUZUNGANGANA AGWANGWAMA 74 Bible Online

SHƐZUNGA TUZUNGANGANA AGWANGWAMA 74 - bassa bible

SHƐZUNGA TUZUNGANGANA AGWANGWAMA 74

¹Azunga-ụzhɛla na ga Asaf Zunganganɛ AGWANGWAMA Oo Agwatana, Iwembe po ebi ti Jineci mbowuu? Bi zhɛ suu ba nda isɛbwɛ na atwa bu ɛkɛnyi bu unyizo-nom?

²Teyinje atwa bu na ebi meme teleji cala cala iwɛ ikɛnyi bu, aba ata na ebu gwube na tijama maa a shɛ ụlamụ bụ! Teyinje Ishɛmɛ Zayon, no ofwo na abɛ jɛjɛ la.

³No rukoto atwa ga njɛ ufwu mbowuu na tahaŋnụ tụ bụ; atwa i'ime tu iricinji iyi elele no ohwolu bu tijilo.

⁴Atwa i'ime bu a kala n'ungwa mụ tụlasụ na amɛ umwono bu; ee shikecenji n-ngarɛga ma aba apata maa mɛ shɛ useyida ụ tụlasụ ta aba.

⁵Abụ ngbaracɛ aŋ aa nda gana etwenyi na hempi shigwubo maa e leji i'wɛ'wɛ uwapa.

⁶Ɛ zhɛ a bagataga tɛmbɛrɛ ti i'wɛ'wɛ no shigwubo sha aba keeni ashamụ.

⁷E sepi ofwo bu tijilo ulwa, maa o hwuŋzwo na cɛnjɛ, ee heshigeni ofwo na aa ga bu zhɛba.

⁸A jala maa a tu kwukwutanganɛ hwɛɛ; e hwoŋzhenji ofwo tijilo elele na cɛnjɛ ta ata.

⁹Tu kwụbɛ shɛ ya eseyida tu o, bigesere be elele kaa zasaba ya o, i zasa kaa bụtụ be elele na ashashɛ tu na mepi ụkwụmbwụ na yɛɛ zhɛ yo togo.

¹⁰Oo Agwatana, aka naa atwa i'ime tu zhɛ ma bu ganga ilɛtu tihingaa? Ɛ zhɛ a twaga suu izeci bu unyizo-nom?

¹¹Iwembe po abu lacɛ maa iti mbiyenii? Iwembe po ebu hwuceci i'ɛlɛ bu no tuu?

¹²Ama oo Agwatana, gabụ kaa bɛ shɛ agwuma tu taa nu umozhigo, gabụ kaa bu mo tu bicingo aka elele.

¹³Nu ukpahiŋ bụ ụ'wụtụ obu bogotogwu itekwu; ebi bwereteji ohiuhiu edegbe ata namɛ ne meni ma ata.

¹⁴Gabụ bu bwereteji ohiuhiu Buduwo ata. Ebi peni bu iyi-uumwa[61] ụshɛka maa sha iyimɛyɛ ya aba.

¹⁵Gabụ bi kepeshenji ɛmɛzhinjɛ keeni nsoso maa mu fwụnjɛ; gabụ kaa bu hwuŋcanjɛ erefu na helenji.

¹⁶Gabụ bu karɛ uwaŋna keeni ụjita; Gabụ bi shikicinji uŋwana nu upiana no ofwo ata aa namɛ.

¹⁷Gabụ bi imanganjɛ tugwungwu ta cɛnjɛ tu unyizo hwɛɛ, abɛ njɛ ushwo nu uvwaza.

¹⁸Oo AGWANGWAMA, teyinje gana na atwa i'ime ma bu hinga ilɛtu, atwa tusashɛ kaa abu ngbaracɛ cwɛŋ.

¹⁹To jinoko atwa bu maa atwa i'ime ya aba a na 'yajɛ shimiaụŋ suji aŋ o; kede isɛbwɛ ya atwa bu a na aa shɛka ibu 'wi o!

²⁰Ne teyinje unu na abu twa no tu;[62] iwɛnɛ ta atwa abwagara shidinji ofwo tishi ta cɛnjɛ tu ga kpaaŋ na tuswakaka.

²¹To lono maa ezuye shɛ atwa na aa nda umungwuta o; lono maa okofwo na atwa na zasa iyi na bu shɛtana.

²²Oo Agwatana, ishijɛ maa meme le ni iyi nɛ aa ma bu nda! Teyinje maa atwa tusashɛ a bu hinga ilɛtu uuwa gụ ụrụmɛ!

²³Kede isɛbwɛ n'ungwa ma atwa i'ime bu a na a nda isɛbwɛ ibu 'wi o, atwa bu ifelu uranjɛ rundu tɛnda aka elele!