Read bassa SHƐZUNGA TUZUNGANGANA AGWANGWAMA 76 Bible Online

SHƐZUNGA TUZUNGANGANA AGWANGWAMA 76 - bassa bible

SHƐZUNGA TUZUNGANGANA AGWANGWAMA 76

¹No Ofwo Iyɛri ya Azụnjɛ: Azunga na ga Asaf Zunganganɛ AGWANGWAMA ni iyi Ti'nyama nɛ 'Yajɛ Ihwehwe E mepi Agwatana na cɛnjɛ tu Juda, ee peni kaa izeci ibwɛ ụjɛrụma na ashashɛ atwa Isrɛl.

²Bi 'yajɛ ihwɛ nu Jɛrusalɛm; baa jɛjɛ ni Ishɛmɛ Zayon.

³Apata baa kwusatajɛ a'inla atwa i'ime, ta shabula sha aba shɛ ujasa keeni otokwobi aba, ti i'wɛŋnɛ ya aba ujasa hwɛɛ.

⁴Oo Agwatana, ụjɛrụma bụ gembi duwa! Igɛhi nɛ abɛ 'yajɛ ta abu banɛ nu nshama ma ata mu unyizo-nom,[65] ibɛ shɛ ofwo ata ebi rikeci atwa bu ifelu.

⁵Asaza aba na ga 'imɛ-isɛbwɛ vwụnjɛ iyi elele nɛ aa ga 'yajɛ, hwuwayɛ go e leyi ya malabụ mo tu'wo; tu ukpahiŋ wa aba keeni tugwoni ta aba kpaaŋ tɛ shɛ ya bohondo.

⁶Oo Agwatana Jekob, aka na abu tazhɛganɛ aŋ, ibɛ po e leyegeji ee 'wi, ti idɛkwɛ keeni asụcɛ ibɛ.

⁷Ama AGWANGWAMA, atwa kpaaŋ ma bu sụma inyɛsɛ. I zasa bụtụ okwo bu ko na eri bo shikono na agba bụ na aka na ti isɛbwɛ bu ishijɛ o.

⁸Gabụ bɛ njɛ maa e mepi ụshɛrɛya na aba duma na azuba; ibɛ po unyizo wa nda inyɛsɛ, waa 'imɛ ilɛmɛ shiruu

⁹na aka na ɛbi ishijɛ maa shikicinji ụshɛrɛya bụ, maa bicinji atwa na aa nda umungwuta na cɛnjɛ tu unyizo ga kpaaŋ.

¹⁰Ashɛtwa kiri atwa na aba nda isɛbwɛ na aba zhɛ na bu kaana tụpana tilɛɛ. Gabụ tuba bi zhɛ ba ganga isɛbwɛ bu tɛnda no ofwo atwa na ta vwɛ nu ujasa ata.

¹¹Pana ma AGWANGWAMA na shɛ Agwatana hiŋ iyi nɛ ehi shileni bu unu ibɛ; ahiɛba na hi gwumwongonu kpaaŋ, suje ma apwaŋ hiŋ kpaaŋ no ofwo Bụtụ ata lanɛ ni inyɛsɛ tụsụma.

¹²Ubwa be zucinje miaụŋ mu tugwama mu na ma nda unyangana, ubwa na bo holono shɛgwuma shɛ cɛnjɛ tu unyizo.